साहित्य डबली

फोटो भाइरल बनाएकै छु बा!

सरोजराज पन्त बुधबार, भदौ ३, २०७७ १५:०४

बा,
जन्मदिने, कर्मदिने, पालन पोषण गर्ने हजुर
आफू सधैँ जोतिएर सन्तानलाई सुखदिने हजुर
घरको छानो चुहिएर मजेरीबाट पानी वर्षिँदा
सन्तानलाई कुखुराले जस्तै तोप्ने र सेक्ने हजुर
घरमा नअटाएर पाली कोठामा बस्न विवश पनि हजुर!
तर बा अहिले फोटो फेसबुकमा सजाएकै छु।

बुबा,
जीवनभर पानी माग्दा पनि एक घुट्को दिन नसक्ने म
घरमा नअटाएर छुटटै कटेरामा बसाउनुमा जित ठानेँ,
मृत्युपछि खिरको पिण्ड दिई वर्षेनी लोकाचारमै सम्झेकै छु
धर्म संस्कार, लोक परलोकलाई वाहियात भन्ने छोरो म,
तर मृत्युपछि लाखौँ खर्चेर तामधाम गर्दै दानपुण्य गरेकै हुँ।
तर बुवा अहिले फेसबुकमा फोटो भाइरल बनाएकै छु!

बाबा,
हजुर बाँचुन्जेलसँगै बसेर तितामीठा कुरा गर्न सकिनँ
तरपनि मृत्युपछि एकाह, सप्ताह पुराण सुनाएकै छु!
जीवनभर हजुरले बाबु यता आऊ भनी बोलाउँदा नजिक आइनँ
मेरो लागि पेटकसी सम्पत्ति जोडेर, मेरै चिन्ताले मृत्युवरण गर्दा,
मृत्युपछि पितृ बोलाउन ठाउँठाउँमा धाएकै छु!
तर बाबा अहिले फेसबुकमा फोटो भाइरल बनाएकै छु!

ड्याडी,
सँगै बस्दा स्त्रीलिप्त भई अपजस दिई सधै बेवास्ता गर्ने छोरो म
न पैसा चिनेँ, न समय चिनेँ, न आफन्त चिनेँ हजुरको कमाइमा रमेँ
कटाक्ष सम्बन्ध बनाई नसामा डुबेर सधै तड्पाउन साहसी छोरो,
बाबु! तीर्थ जान्छु खर्च लेऊ भन्दा हपारेर पुरुषार्थ देखाएको म!
सच्चा ईश्वर खोज्न जाऊ भनी वृद्धाश्रममा छोडेर आएको छु!
तर ड्याडी फेसबुकमा फोटो भाइरल बनाएकै छु!

सुड्डो,
बाबा आमा देवता हुन् भनी पढाउँदा विश्वास नगर्ने छोरो म
मातृपितृ स्नेह लिन मात्र जानेको छु तर दिन जान्दिनँ म
सबल, सक्षम, बन भनी आफू भोकभोकै बसी अवसर दिँदा
राम्रो संस्कार बसाल तिम्रो छोराले पनि यही सिक्छ भन्दा।
धरधरी आँसु वर्षाउँन विवश पार्नमा जीत देख्ने छोरो म !
तर सुड्डो फेसबुकमा फोटो भाइरल बनाएकै छु!

अब,
अहिले सच्चा ईश्वर बाबा भएको बोध गरी तड्पिएर!
पश्चातापमा मुर्ति पुज्न ठाउँ ठाउँ धाउनु भन्दा,
सृष्टिदाता बाचुन्जेल स्याहार गरी पितृत्व सत्कार गरे मात्र
कुनै स्वार्थमा नपरी विश्वास गरी सेवक बन्ने छोरो
तर मृत्युपछि होइन जिउँदै सच्चा प्रेम गर्ने छोरो खाज्दै छु!
फेसबुकमा नभै अन्तस्करणमा सदा सजाउने छोरो खोजी रहेछु!