समाचार

प्रदेश २ का एकपछि अर्को जिल्लामा निषेधाज्ञा घोषणा

रासस बुधबार, साउन २१, २०७७ १०:०८

महोत्तरी- लकडाउन हटेर आवागमन खुकुलिँदै जाँदा प्रदेश २ मा कोभिड–१९ संक्रमण जोखिम झनै बढेको छ। साउन ७ गते लकडाउन हटेपछि हालसम्म ७८१ नयाँ संक्रमित थपिएका छन्। साउन ६ गतेसम्म कुल संक्रमित रहेका चार हजार २६४ सङ्ख्या आज पाँच हजार ४५ पुगेको प्रदेश २ को सामाजिक विकास मन्त्रालयले जनाएको हो। प्रदेशमा हालसम्म यो व्याधिले १९ जनाको ज्यान लिइसकेको छ।

साउन ७ गतेयता संक्रमण झन् बढेपछि प्रदेश २ का एकपछि अर्को जिल्ला र नगरमा खुला आवागमन रोक्न सम्बन्धित जिल्ला प्रशासन कार्यालयले निषेधाज्ञा जारी गर्दैछन्। प्रदेशको अस्थायी राजधानी जनकपुरधाममा सोमबार मध्यरातदेखि नै सात दिनको निषेधाज्ञा लागू छ। त्यसैगरी वीरगञ्ज महानगरमा मात्र रहेको निषेधाज्ञालाई पर्सा जिल्ला प्रशासन कार्यालयले मंगलबारदेखि जिल्लाभरमै लागू गरेको छ। पूर्वको सप्तरी जिल्लाको राजविराज र महोत्तरीको जलेश्वर नगरमा तीन दिनपूर्व नै निषेधाज्ञा जारी छ भने सर्लाही जिल्ला प्रशासनले आजदेखि लागू हुने गरी सात दिनको निषेधाज्ञा आदेश जारी गरेको छ।

लकडाउन हटेसँगै सबैतिर भीडभाड बढेको, शारीरिक (भौतिक दूरी) को ख्याल नगरिएको, मास्क नलगाई हिँडडुल गर्ने क्रम बढेको र भारतसँगको खुला सीमाबाट दोहोरो आवतजावत निकै बढेपछि महामारी संक्रमण र थप जोखिम बढेको विज्ञ बताउँछन्। प्रदेशमा लकडाउन हटेयता महोत्तरी, पर्सा, सप्तरी र धनुषा बढी जोखिममा देखिएका छन्।

यसैबीच प्रदेश २ सरकारले कोभिड–१९ संक्रमण बढ्न नदिन आवश्यकतानुसार प्रभावित जिल्ला र त्यसभित्रका खास क्षेत्रमा लकडाउन लगाउने, भारतसँगको सीमाक्षेत्रमा आवागमन कडाई गर्ने, पिसिआर जाँच बढाउने र उपचार प्रबन्ध व्यवस्थित गर्न स्वास्थ्य उपकरण बढाउने रणनीति तय गरेको प्रदेशका आन्तरिक मामिला तथा कानुनमन्त्री ज्ञानेन्द्रकुमार यादवले बताएका छन्।

यस क्रममा प्रादेशिक अस्पतालमा पिसिआर मेसिन थप गर्ने, प्रदेशका अस्पतालमा थप ५० भेन्टिलेटर बढाउने र ५०० शैयाको आइसोलेसन अस्पताल थप्ने निर्णय गरिएको मन्त्री यादवको भनाइ छ। अब पिसिआर जाँच बढाउँदै दैनिक एक हजार स्वाब परीक्षण गरिने गरी प्रादेशिक अस्पतालको क्षमता पुर्‍याइने मन्त्री यादवले बताएका छन्।

प्रदेशमा सबैभन्दा बढी रौतहटमा हालसम्म एक हजार २५९ मा सङ्क्रमण पुष्टि भएको छ। यद्यपि लकडाउन हटेयता त्यहाँ संक्रमण दर घटेको सामाजिक विकास मन्त्रालयका सचिव रामप्रसाद घिमिरेले बताए। रौतहटमा लकडाउन हटेयता पाँच जनामात्र संक्रमित बढेका छन्।

पछिल्लोपटक लकडाउन हटेको साउन ७ देखि २० गतेबीचको १४ दिनमा पर्सा जिल्लाको संक्रमण निकै बढेको छ। त्यहाँ यस अवधिमै ३९८ नयाँ संक्रमित थपिएका छन्। त्यसैगरी यसै अवधिमा सप्तरीमा १३६, धनुषामा १२७ र महोत्तरीमा ८७ नयाँ संक्रमित थपिएको मन्त्रालयको अभिलेखले देखाएको छ।

तथ्यांकअनुसार, अहिलेसम्म महोत्तरीमा ८३८, धनुषामा ७४१, सर्लाहीमा ७१२, पर्सामा ५७५, सप्तरीमा ५२२, सिरहामा २१५ र बारामा १७८ संक्रमण पुष्टि भएको छ। लकडाउन हटेयताको अवधिमा कम संक्रमण देखिएका जिल्लामा रौतहटका अतिरिक्त सर्लाही, सिरहा र बारा छन्। यस अवधिमा सर्लाहीमा पाँच, सिरहामा आठ र बारामा १५ मा संक्रमण पुष्टि भएको छ।

प्रदेशभित्र हालसम्म (मंगलबारसम्म) ६२ हजार २८८ जनाको स्वाब परीक्षण गरिएको छ। यसमा ५४ हजार ७०५ को जाँच नतिजा नेगेटिभ छ। प्रयोगशालाबाट नतिजा आउन बाँकी दुई हजार ५३८ छन्। प्रदेशमा उपचारपछि निको भएर घर फर्कनेको संख्या तीन हजार २११ पुगेको छ। अहिले दुई हजार २३७ आइसोलेसन शय्या छन्। यिनमा ६८० जनाको उपचार हुँदैछ। तीमध्ये ३६१ गम्भीर प्रकृतिका रहेका जनाइएको छ।

लकडाउन अवधिमै पनि प्रदेशमा सुरक्षा सतर्कता अत्यन्त कमजोर स्थितिमा रहेको र पछिल्लो चरणमा लकडाउन हटेपछि झनै जताततै भीडभाड बढेको छ। सीमाक्षेत्रमा दोहोरो आउजाउ बढेको र हिँडडुलमा लापरबाही बढेपछि संक्रमण जोखिम बढेको स्वास्थ्यकर्मी बताउँछन्। खासमा शारीरिक (भौतिक) दूरीको निर्वाह नगरिँदा, मास्कको प्रयोग नहुँदा, बजारहाटमा भीडभाड बढ्दै जाँदा र सीमाक्षेत्र वारपारको बाक्लो ओहोरदोहोर बढ्दा सङ्क्रमण जोखिम बढेको स्वास्थ्यकर्मीको भनाइ छ।