धनगढी- शनिबार बिहान बारा र सर्लाही जिल्लामा पहिलोपटक देखिएको सलह किराको फौज सुदूरपश्चिममा पनि देखिन थालेको छ।
प्रदेशको भूमि व्यवस्था, कृषि तथा सहकारी मन्त्रालय मातहत रहेको कृषि निर्देशनालयले कैलालीको लम्की चुहा नगरपालिका, वर्दगोरिया र कैलारी गाउँपालिकामा सलह किरा देखिएको जानकारी आएको जनाएको छ।
निर्देशनालयका निर्देशक यज्ञराज जोशीले भने‚ ‘कैलारी गाउँपालिकामा देखिएको किराको फोटो संघीय कृषि मन्त्रालयमा पठाउँदा पुष्टि भएको छ। लम्की र वर्दगोरिया गाउँपालिकामा पनि फेला परेको भन्ने जानकारी आएको छ।’
लम्किचुहा नगरपालिका- १ थकालिपुरको बारीमा सलह देखिएको स्थानीय लक्ष्मी रावलले जानकारी दिए। रावलले सलहलाई आफूहरुले मारेर राखेको बताए।
लम्की चुहा नगरपालिकाका कृषि शाखा अधिकृत सुरेश ढुङ्गानाले रावलको बारीमा देखिएको किरा सलह नै भएको पुष्टि गरे। उनले भने‚ ‘फिल्डमा गएर हेर्दा सलह किरा नै रहेछ। यसको नियन्त्रणका लागि नगरपालिकाले प्रयास गरिरहेको छ।’ उनले झुण्डमा नआएकाले जोखिम अहिले खासै नभएको पनि बताए। उनले भने‚ ‘बारीमा गएर बोट बिरुवा हल्लाउँदा १५/२० वटा किरा देखिएका छन्। शायद साँझ परेकाले कम होला। अब बिहान आएर हेर्छौं। के कति छन् भनेर?’
यता प्रदेशको भूमि, व्यवस्था कृषि तथा सहकारी मन्त्रालयका प्रवक्ता खगेन्द्र शर्माले सलह किरा कैलालीमा पनि देखिएको बताए। ‘सलह किरा ठूलो झुण्डमा छैन,’ उनले भने, ‘कुनै झुण्डबाट छुट्टिएर कैलाली पुगेको हुनसक्छ। मंगलबार बिहानसम्म विभिन्न स्थानमा प्राविधिको टोली पठाउने तयारी भइरहेको छ।’
यस्तै सुदूरपश्चिम प्रदेश सरकारले एक किलो सलह फट्यांग्रा संकलन गरेर ल्याए २५ रुपैयाँ दिने यसअघि नै निर्णय गरिसकेको छ। कैलालीको टीकापुर र लम्कीचुहा नगरपालिका तथा जोशीपुर र जानकी गाउँपालिका भएर सलहको समूह भित्रिन सक्ने भएकाले चारवटा तहमा क्षति कम गर्न आवश्यक तयारी पनि थालिएको कृषि मन्त्रालयले जनाएको छ।
सलहको समूह आएर बाली खान थालेमा होहल्ला गरेर भगाउन तथा विषादी, जाल आदिको प्रयोग गर्न कृषकहरूलाई आग्रह गरिएको प्रदेश कृषि निर्देशनालयका निर्देशक यज्ञराज जोशीले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
