काठमाडौं- वाणिज्य, आपूर्ति तथा उपभोक्ता संरक्षण विभागले गर्ने बजार अनुगमनका क्रममा सुरक्षाका लागि खटिने प्रहरी टोलीलाई महानगरीय प्रहरी परिसर टेकुले फिर्ता बोलाएपछि अनुगमन कार्य प्रभावित भएको छ।
विभागबाट अनुगमनका लागि खटिने निरीक्षण अधिकृत र अन्य कर्मचारीको सुरक्षाका लागि खटाएका सुरक्षाकर्मीले व्यापारीलाई फोन गरेको विषयमा महानगरीय प्रहरी परिसरले आपत्ति जनाँउदै त्यहाँबाट ४ जना सुरक्षाकर्मीको टोली गत जेठ २३ गते फिर्ता बोलाएको थियो।
जिल्ला प्रशासन कार्यालय काठमाडौंबाट खटाइएको सुरक्षाकर्मीको टोली महानगरीय प्रहरी परिसरले बिनासूचना फिर्ता बोलाएपछि हालसम्म अर्को टोली त्यहाँ पठाइएको छैन।
सुरक्षाकर्मी नभएपछि विभागले दैनिक बजार अनुगमनको संख्या घटाएको छ। यसअघि दैनिक ३/४ टोली बजार अनुगमनका लागि खटिने गरेकोमा अहिले दैनिक एउटा टोलीमात्रै अनुगमनका लागि निस्किने गरेको छ। अनुगमनमा खटिने कर्मचारीले बिनासुरक्षाकर्मी बजारमा जानुपर्दा उनीहरुमा व्यापारीबाट आक्रमण हुनसक्ने मनोवैज्ञानिक त्रास देखिएको विभागका महानिर्देशक नेत्रप्रसाद सुवेदीले बताए। ‘अनुगमन अधिकृतहरु बेला–बेलामा व्यापारीको घेरामा परेको, आक्रमण नै भएको घटनाहरु पनि थुप्रै छन्। त्यसमा मनोविज्ञान पनि जोडिन्छ। जसकारण प्रत्यक्ष‚ अप्रत्यक्ष असर देखिहाल्छ नै।’ महानिर्देशक सुवेदीले भने।
पछिल्लो समय बजार अनुगमन चुस्त भएको विषयमा कर्मचारीले सुरक्षा चुनौती महशुस गर्नुसँगै अरु कारण पनि रहेको उनको भनाइ छ। ‘सुरक्षा थ्रेटको विषय पनि एउटा कारण हो। अर्को भनेको हामी फलोअपमा लागेर पनि अनुगमनको संख्या केही कम भएको हो। गतवर्षदेखिका कारबाही र त्यसको भुक्तानी हुन बाँकी रहेका छन। त्यसको फलोअप गर्दा पनि बजारमा अनुगमन कम भएको हो। सधै जरिवानाभन्दा पनि बजार अध्ययन पनि गर्नुपर्छ भन्ने तरिकाले जान खोजेका छौं’ सुवेदीले भने।
सुरक्षा नभएपछि बजार अनुगमनमा खट्ने कर्मचारीको मनोबल कम भएको र उपभोक्ता हितविपरीत काम गर्ने व्यापारीको मनोबल बढेको विभागका प्रवक्ता रविन्द्र आचार्यले बताए। ‘आफूसँग सुरक्षाकर्मी नभएपछि अनुगमनमा खटिने कर्मचारीलाई आफूमाथि कसैबाट आक्रमण हुन्छ कि भन्ने डर त छँदैछ, गल्ती गर्ने व्यापारीले विभागलाई टेर्न पनि छोडेको हामीले अनुभव गरेका छौं’ आचार्यले भने। ‘हामीले फलोअपका लागि व्यापारीलाई फोन गर्दा पनि उनीहरुले चाँसो दिँदैनन्। हामीले मागेका कागजपत्र बुझाउँदैनन्। सुरक्षाकर्मी नहुनुको फाइदा उनीहरुले उठाएको जस्तो देखियो।’
छुट्टै टोली मागसहित मन्त्रालयमार्फत गृहलाई पत्र
महानगरीय प्रहरी परिसरले विभागबाट बिनासूचना सुरक्षाकर्मीको टोली फिर्ता बोलाएपछि विभागले अर्को टोली खटाइदिन भन्दै उद्योग, वाणिज्य तथा आपूर्ति मन्त्रालयमार्फत उद्योग विभागलाई पत्राचार गरिसकेको छ। ‘हामीले मन्त्रालयमार्फत गृहलाई २८ गते चिट्ठी पठाएका थियौं। उद्योग, वाणिज्य तथा आपूर्ति मन्त्रालयका सचिव र गृह सचिवसँगको सल्लाहपछि नै हामीले प्रहरी हेडक्वार्टरमार्फत नै सुरक्षाकर्मी माग्न खोजेका हौं’ महानिर्देशक सुवेदीले भने।
यसअघि विभागले जिल्ला प्रशासन कार्यालय मार्फत सुरक्षा माग गर्ने गरेको थियो। तर अहिले विभागले अनुगमनका लागि गृह मन्त्रालयबाट नै खटिनेगरी प्रहरी टोली विभागमा पठाउन अनुरोध गर्दै मन्त्रालयलाई पत्राचार गरेको हो। प्रहरी प्रधान कार्यालयबाट नै छुट्टै डेडिकेटेड फोर्स पठाइदिन भन्दै पत्राचार गरिएको सुवेदीले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
