काठमाडौं–लकडाउनका बीच पनि आफ्ना प्रकाशनका एक हजारभन्दा बढी पुस्तकको इ-बुक प्रती पाठकले किनेपछि उत्साही भएको ‘नेपालय’ ले आउँदो प्रकाशन पनि इ-बुकमार्फत् सार्वजनिक गर्ने भएको छ। आर्थिक टिप्पणीकार सुजीव शाक्यको पुस्तक ‘अर्थात् परिवर्तन’ सार्वजनिक गर्न लागेको हो। यो पुस्तक इ-बुकमार्फत् सार्वजनिक हुने नेपालयको पहिलो प्रकाशन हुनेछ।
सुजीब शाक्यको अर्थतन्त्रमा आधारित नेपाली पुस्तक ‘अर्थात् अर्थतन्त्र’ नेपालयबाटै प्रकाशित छ भने अंग्रेजीमा लेखिएको ‘अनलिसिङ नेपाल’ र ‘अनलिसिङ द बज्र’ पेंगविन प्रकाशनबाट प्रकाशित छ।
‘मेरो नयाँ पुस्तक इ-बुकमार्फत् नेपाली पुस्तक बजारमा आउन लागेको कुराले म उत्साहित छु,’ लेखक शाक्य भन्छन्, ‘मेरो पुस्तकको शीर्षकमै परिवर्तन अंकित छ, पुस्तक बजार पनि परिवर्तनतर्फ अग्रसर छ। पुस्तक बजारका निम्ति यो एउटा नयाँ आरम्भ हो । इ-बुक विस्तारमार्फत् नेपाली पुस्तक बजारले नयाँ आयाम भेट्ने छ भन्ने कुरामा म आशावादी छु ।’
नेपालयका किरणकृष्ण श्रेष्ठले पुस्तक विमोचन हुनुभन्दा पहिले पुस्तकका केही अध्यायलाई एकल अध्यायको रुपमा सार्वजनिक गर्ने पनि बताए। ‘यो सम्भावनालाई हामीले संगीतमा प्रयोग हुँदै आएको नमूनाबाट टिपेका हौँ। संगीत क्षेत्रमा एल्बम सार्वजनिक हुनुभन्दा पहिले कुनै एउटा गीतको एकल गीत वा सिंगल ट्रयाकमात्र सार्वजनिक गरिएको हामीले देख्दै आएका छौं। त्यस्तै अनुरुप, हामी पुस्तक सार्वजनिक गर्नुभन्दा पहिले किताबका ४ वटा अध्यायलाई छुट्टाछुट्टै सार्वजनिक गर्ने छौं,’ उनले भने।
एकल अध्यायलाई साप्ताहिक रुपमा सार्वजनिक गरिने छ, जसको सुरुवात असार ४ बाट सुरु भएको छ। अनलाइन प्लेटफर्म ‘थुप्रै’ को एपमार्फत् पुस्तकको एकल अध्याय पन्ध्र रुपैयाँमा पढ्न सकिन्छ भने पूरै पुस्तक सार्वजनिक भएपछि २५० रुपैयाँमा उपलब्ध हुनेछ। एकल अध्याय किनेर पढ्नेले पूरै पुस्तक किन्दा पहिलेको रकम छुटको रुपमा कट्टी गरिने व्यवस्था एपले गरेको जनाइएको छ।
यो एकल अध्याय खरिद गर्ने पाठकले पुस्तकका अध्यायहरु पढ्दा सँगसँगै लेखकले आफै वाचन गरेको ‘अडियो’ पनि सुन्न सकिने गरि प्राबिधिक तयारी गरिएको छ। अब आफ्ना सबै नेपाली पुस्तकहरुलाई संस्थागत रुपमा ‘अडियो बुक’ को संस्करणमा ल्याउने प्रयासमा रहेको नेपालयका किरणकृष्ण श्रेष्ठले बताए। इ-बुक असार ३० गते पूर्ण रुपमा सार्वजनिक हुने नेपालयले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772777462.png)
