एजेन्सी–अमेरिकाका पूर्व राष्ट्रिय सुरक्षा सल्लाहकार जोन बोल्टनले राष्ट्रपति डोनाल्ड ट्रम्पले पुनः राष्ट्रपतीय चुनाव जित्न चिनियाँ राष्ट्रपति सी चिनफिङको सहयोग लिने प्रयास गरेको खुलासा गरेका छन्। उनले प्रकाशन हुन लागेको आफ्नो नयाँ पुस्तकमा यस्तो खुलासा गरेका हुन्।
बोल्टनको पुस्तकका अंश उद्दृत गर्दै अमेरिकी सञ्चार माध्यमहरुले भनेका छन्, ‘ट्रम्प चाहन्थे चीनले अमेरिकी किसानका उत्पादन किनोस्।’ ट्रम्प प्रशासनले यो पुस्तक प्रकाशित हुनबाट रोक्ने प्रयास गर्दैछ। अमेरिकी न्याय मन्त्रालयको दाबी छ–यो पुस्तकमा गोप्य सूचनाहरु छन्।
पुस्तकको शीर्षक ‘द रुम ह्वेयर इट हापेन्ड’ दिइएको छ, जसलाई यही जुन २३ मा प्रकाशन गर्ने तय गरिएको छ।
गत जनवरीमै ह्वाइट हाउसले पुस्तकमा कैयौं गोप्य जानकारी भएको उल्लेख गर्दै तिनलाई हटाउनुपर्ने बताएको थियो। तर बोल्टनले यसलाई अस्वीकार गर्दै आएका छन्।
बोल्टनकै जानकारीका आधारमा ट्रम्पविरुद्ध महाअभियोग प्रक्रिया सुरु भएको थियो। ट्रम्पमाथि युक्रेनका राष्ट्रपतिलाई डेमोक्रेटिक पार्टीका अर्का उम्मेदवार जो बाइडन र उनका छोराविरुद्ध भ्रष्टाचारको अनुसन्धान गर्न दबाब दिएको आरोप लागेको थियो। दबाब दिन युक्रेनलाई अमेरिकाले दिँदै आएको सैन्य सहायता रोक्न चेतावनी दिएको आरोप पनि ट्रम्पमाथि लागेको थियो। यद्यपि यसलाई उनले अस्वीकार गर्दै आएका छन्।
२०१८ को अप्रिलमा राष्ट्रिय सुरक्षा सल्लाहकार पदमा नियुक्त भएका बोल्टनले सोही वर्ष सेप्टेम्बरमा राजीनामा दिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
