कोरोना अपडेट

विदेशमा समस्यामा परेकाको उद्धारमा पनि ‘बार्गेनिङ’

निर्मला घिमिरे आइतबार, जेठ ३२, २०७७ १७:४९

सांकेतिक तस्बिर

काठमाडौं– विदेशमा समस्यामा परेका नेपाली नागरिकहरूको उद्धारका लागि चार्टर जहाजको भाडा सरकारले २ पटक घटाइसकेको छ।

पहिलो पटक तय गरेको भाडा अत्याधिक महंगो भएको भन्दै सर्वत्र विरोध भएपछि संस्कृति, पर्यटन तथा नागरिक उड्डयन मन्त्रालयले शुक्रबार जहाज भाडा घटाएको थियो।

न्यूनतम २५ डलरदेखि अधिकतम ८० डलरसम्म घटाएको उक्त भाडादर समस्यामा परेकाहरू अनुकुल हुन नसकेको भन्दै थप आलोचना बढेपछि पर्यटन मन्त्रालयले शनिबार दोस्रो पटक भाडादर घटाएको हो।

शनिबार नेपालीहरूका मुख्य श्रम गन्तव्य मुलुकहरूबाट नेपालीहरू स्वदेश फर्काउने भाडामा २० प्रतिशत वा १०० डलरसम्म भाडा घटाउने निर्णय गरेको छ।

यो निर्णयपछि अब मलेसियाको भाडा ४ सय ६५ डलरबाट घटेर ३७२ डलर निर्धारण भएको छ।

कतारको दोहाको हकमा ४ सय ९० डलरबाट ३ सय ९२ डलर, युएईको हकमा ४ सय ५० डलरबाट घटेर ३ सय ९०, साउदी दमामको हकमा ५ सय ३० डलरबाट ४ सय ३० डलर कायम भएको छ। खाडीस्थित अन्य गन्तव्यका यसअघिको घाडामा १ सय डलर घटाइएको छ।

जेद्दाको ६ सय ९० बाट घटेर ५ सय ९० डलर, ओमनको हकमा ४ सय ६० बाट घटेर ३ सय ६८ डलर, बराइनको हकमा ३ सय ९२ डलर, कुवेतको हकमा ४ सय १० डलर‚ जोर्डनको हकमा ६ सय ७५ डलर, साइप्रसको हकमा ७ सय ३० डलर नयाँ भाडा तय भएको छ। अन्य गन्तव्यको भने यथावत नै रहेको संस्कृति, पर्यटन तथा नागरिक उड्डयन मन्त्रालयले जनाएको छ।

यो पनि पढ्नुहोस्

फेरि घट्याे उद्धार उडानकाे भाडा [सूचीसहित]शनिबार, जेठ ३१, २०७७

तर दोस्रो पटक घटाएको भाडा पनि समस्यामा परेकाहरूलाई राहत दिने खालको भने हुन सकेको छैन। यसरी जहाजभाडाका सम्बन्धमा सरकारले हेरफेर गरिरहेको भाडादरबाट पनि यसअघि तोकेको भाडा श्रमिकहरूसँग मोटो रकम असुल गर्न खोजिएको हो भन्ने स्पष्ट बुझ्न सकिन्छ।

अन्य मुलुकले समस्यामा परेका आफ्ना नागरिकहरूलाई आफ्नै खर्चमा उद्धार गरिरहँदा नेपाल सरकारले चर्को भाडादर कायम गरी समस्यामाथि समस्या थपिदिएको छ।

समस्यामा रहेका आफूहरूको आलो घाउमाथि सरकारले बार्गेनिङ गरेर आलो घाउमा नुनचुक छर्किदिएको प्रवासीहरूको आरोप छ।

सरकारले आफूहरूको पीडालाई बजारमा पाइने सामानको मोलतोल गरेझैं रमिता देखाएको भन्दै विभिन्न सामाजिक सञ्जालमार्फत प्रवासी नेपालीहरूले चर्को विरोध गरिरहेका छन्।

पर्यटन मन्त्रालयले दोस्रो पटक भाडादर घटाउँदा पनि अझै ३ गुणा बढी भाडा कायम रहेको भन्दै विदेशमा रहेका नेपालीहरूले आक्रोश पोखिरहेका छन्। सरकारले अप्ठ्यारोमा परेकालाई निःशुल्क उद्धार गर्नुपर्ने माग उनीहरूको छ।

सरकारले बजारको सामान झैँ बार्गेनिङ गर्‍यो
अनुप मगर, मलेसिया
सरकार धेरै नाटक नगर। हामीले सित्तैमा लैजा पनि भनेको होइन। पहिलाकै भाडा कायम गर। हामी समस्यामा परेर आफ्नो देश फर्कन्छु भन्दा पनि बजारमा राखेका सामान किनबेच गर्दा बार्गेनिङ भएजस्तै सरकारले हाम्रो पसिनासँग बार्गेनिङ गर्‍यो। आफ्ना नागरिकप्रति अलिकति पनि दया छैन है?

हामी परदेशीसँग पटक–पटक नाटक किन ?
सुरेश कुमाल, साउदी
सरकारले हामी परदेशीमाथि निकै खेलवाड र नाटक गर्‍यो। पटक–पटक नाटक किन? यो सबै लुट्ने बहाना हो। हामीले कति दुःख पाउने? समस्या परेको बेला आफ्नो जन्मभूमि पनि फर्कन नपाउने?

हामी अलपत्र परेकासँग कहाँ पैसा हुन्छ र बार्गेनिङ गर्नु?
यादवप्रसाद दुलाल, युएई
भाडा दुई पटक घटाउँदा पनि अझ बढी नै भयो सरकार। हामी ३ महिनादेखि अलपत्र परेकाहरूसँग कहाँबाट पैसा हुन्छ र बार्गेनिङ गरिरहनु? यस्तो समस्यामा त आफ्ना नागरिक उद्धार गर्ने दायित्व सरकारको हो। यो दायित्वबाट सरकार भाग्न मिल्दैन। निःशुल्क स्वदेश लैजाने व्यवस्था गरियोस्।

‘चार्टर उडानभन्दा नियमित उडान खोलिदिए यात्रुहरूले चर्को भाडा तिर्नु पर्दैन थियो। हामीले यसबारेमा पनि कुरा राख्यौं। सरकारले आफ्नै अडान नछाड्दा श्रमिकहरूले निकै महंगो भाडा तिर्नुपर्ने अवस्था आएको छ’ एक राजदूत भन्छन्।

सरकारले एयरलाइन्ससँग समन्वय गरेर उचित भाडा लागू गर्न नसक्दा पटक–पटक भाडा हेरफेर गरिरहनुपर्ने अवस्था आएको उनको भनाइ छ।

भाडा हेरेफेर भएसँगै केही मुलुकबाट अप्ठ्यारोमा रहेका नेपाली स्वदेश फर्काउन तय गरिएको उडान रद्ध गरिएको छ। केही उडान तालिका समेत हेरफेर गरिएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।