अश्वत्थामाको निधारबाट बागमती बग्छ [कविता]

साहित्य डबली

काशीराम बजगाईं शुक्रबार, जेठ ३०, २०७७ १३:०१

यो भूगोल अलिकति मात्र तलमाथि भैदिए
यतिबेला तँ ईरानी बन्दुक खेलाइरहेको हुनेथिइस्
यो भूगोल अलिकति मात्र तलमाथि भैदिए
यतिबेला तँ तालिवानी भैसकेको हुनेथिइस्
यो भूगोल अलिकति मात्र तलमाथि भैदिए
तँ सुडान, सोमालिया र सिरिया भइसकेको हुनेथिइस्
अलिकतिले
तँ तैले ओढेको राष्ट्रवादको कात्रो च्यातेर
खोला पारीबाट हिर्काउँन सक्थिस्
आफ्नै अथारामा गोलढुंगा
अलिकति मात्रैले डगमगाउने तेरो इमान
अलिकति मात्रैले पोखिइहाल्ने तेरो पहिचान
अलिकति मात्रैले
चल्न सक्छ तेरो छातीमा विश्व नोबेल शान्तिको स्क्याभेटर
अलिकति मात्रैले
'आई कान्ट ब्रेथ'को गीत गाउँदै
त्याग्न सक्छस् तैले तेरो प्राण।

तर अलिकतिले
यतिबेला सगरमाथा तेरै देशमा पर्छ
तेरै देशमा जन्मियो गौतम बुद्ध
तैले खेत जोतेर फेला पारिस् सितालाई
र अन्माएर भृकुटीलाई
गरिदिइस् मानव जातीको कल्याण।

तँ कहिले बहादुर भइस्
तँ कहिले गोर्खाली भइस्
माओवादी, गणतन्त्रवादी, राजावादी, प्रजातन्त्रवादी
तँ बगरको काँचो माटो
मालिकको मुठ्ठीले जुन जुन आकार बनायो
तँ त्यही त्यही भइस्
कहिले मकैबारीमा साँढे छाडेर
खाएर बसिस् माटो
कहिले छुरा रोपेर आफ्नै घाँटीमा
त्यही माटोका लागि त्यही माटोमा बगाइदिइस् रगत
कहिले पूँजीवादको चौतारोमा बसेर
तैले लेखिस् त्यही चौतारोको ढाडमा समाजवादको नारा।

स्कूलका भट्टीमा पोलेर
तेरो देशमा पढाइन्छ काँचा केटाकेटीलाई वीरताको पाठ
डरलाग्दा सिमानाका किस्सा
छोप् छोप् ए छोप् छोप्
बग्यो तेरो लिम्पियाधुरा कर्णालीमा
हेर् हेर् कसको हो महाकालीमा बगेको नागरिकता
समात् ए समात्
हान् हान् त्यो कालो छ
खुँडा हान् खुँडा।

मालिकको अट्टालीमा कैद
तँ यो देशको 'ब्ल्याक मार्क' सेतो परेवा
एक स्वतन्त्रता दिवसको दिन
आजाद गरिदियो मालिकले तलाई
तँ भुर्र उडेर पुगिस् केही परसम्म
भुर्र उडयो मालिकको रेड स्ट्याम बाज
पंजा फ्याकेर टप्प टिप्यो तँलाई
र लिएर गयो अर्को स्वतन्त्रता दिवसका लागि
तँ बसिरही पिंजडा बदलेर
अर्को एक स्वतन्त्रता दिवसको दिन पर्खिएर
जाल ओडिस् जाल ओछ्याइस्
के फरक पर्छ?
जाल धागोको होस् या सुनको !

नागरिकता त तँसंगै छ
तलाई तेरो नागरिकताले सोध्दैन?
कसको हो यो देश?
कसको हो यो सरकार?
को होस् तँ भनेर?
बाँचेर बेचिइरहने गोरु जस्तो जिन्दगी
बेचेर जवानी
बगाएर पसिना मुलुकबाहिर
हेर् त कति बिरानो भैसक्यो तेरो मुलुक
अब तलाई आफ्नै घर फर्किनेवेला
परदेश हिँडे जस्तो लाग्छ कि लाग्दैन?

ए राष्ट्रवादी साथी
यतिबेला म देशविरुद्ध लड्ने तयारी गरिरहेको छु
च्यातेर नागरिकता
म माटोविरुद्ध मोर्चा खडा गरिरहेको छु
तर हैन यो तँ विरुद्धको लडाईं
मलाई घृणा छ मेरो दासतादेखि
र लडिरहेको हुँ युगौंदेखि
हेर् त
मेरो दासताभन्दा घिनलाग्दो छ तेरो स्वतन्त्रता
मेरो युद्ध, तेरो शान्तिभन्दा शान्तिपूर्ण छ
किनकि मेरो लडाईं
माटोको हैन मुटुको लडाईं हो
र यतिबेला मेरो मुटु मेरो निधारमा दुखिरहेको छ।