काठमाडौं- अखिल नेपाल फुटबल संघ (एन्फा) ले आर्थिक वर्ष २०७७/०७८ का लागि ७० करोड ४१ लाख १९ हजार ६ सय ८५ रुपैयाँ बजेट विनियोजन गरेको छ। गएको वर्ष एन्फाको बजेट ४३ करोड बराबरको थियो।
यसका साथै कोरोना भाइरस (कोभिड १९) ले फुटबलमा पारेको प्रभावमा राहतका लागि एन्फाले विश्व फुटबल महासंघ फिफासँग एक लाख अमेरिकी डलर बराबरको राहत सहयोग माग गर्ने पनि निर्णय गरेको छ।
वार्षिक बजेटका सम्बन्धमा छलफल गरी एन्फा कोषाध्यक्ष रविन्द्र जोशीले पेश गरेको बजेट पारित गरी अब संघको आगामी साधारण सभामा अनुमोदनका लागि पेश हुनेछ। यस्तै कोभिडको असरका सम्बन्धमा राहत वितरण समितिले फिफामार्फत एक लाख अमेरिकी डलर बराबरको सहयोग माग्ने निर्णय गरेको हो।
फिफासँग मागिएको सहयोगमा ४८ जिल्ला फुटबल संघहरु, ४ सदस्य समितिहरु, १४ ए डिभिजन क्लब, १२ बी डिभिजन क्लब, १४ सी डिभिजन क्लब, एन्फाबाट मान्यता प्राप्त मोफसलका प्रतियोगितामा सहयोग गरिने जनाइएको छ।
त्यसका साथै एन्फामा आबद्ध रहेका सबै तहमा एन्फा प्रशिक्षक, कर्मचारी, रेफ्रिसहित गरी ३० जनालाई राहत वितरण गर्ने, नेपाली राष्ट्रिय महिला र पुरुष टिमका खेलाडीलाई खुराकका लागि प्रतिव्यत्तिः १५ हजार रुपैयाँ उपलब्ध गराउने पनि एन्फाले जनाएको छ।
यस्तै ललितपुर जिल्ला फुटबल संघका अध्यक्ष पुरुषोत्तम थापालाई गरिएको अस्थायी कारवाहीलाई एन्फा कार्यसमितिले अनुमोदन गर्दै अनुशासन समितिमा पठाएको छ। उनको जवाफ चित्तबुझ्दो नभएकाले आउँदा साधरण सभासम्मका लागि अस्थायी निलम्बन गरिएको एन्फाले जनाएको छ।
एन्फाले १९ औं साधारण सभा भदौ १५ गते सोमबार गर्ने निर्णय पनि गरेको छ। चैतमा हुने भनिएको साधारण सभा कोरोना भाइरसका कारण स्थगित भएको थियो। यदि कोरोनाकै कारण नयाँ तोकिएको मितिसम्म अवस्था असामान्य रहे एएफसी र फिफाबाट समेत मान्यता प्राप्त अनलाइन भर्चुअल माध्यमबाटै साधारण सभा बैठक बस्ने निर्णय भएको एन्फा प्रवक्ता किरण राईले जानकारी दिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1761726523.jpg)
