काठमाडौं। भिनिसियस जुनियरले दुई शानदार गोल गरे पनि ब्राजिल जापानसँग ३–२ ले पराजित भएको छ। शनिबार सिंगापुरमा भएको प्रतिस्पर्धात्मक अन्तर्राष्ट्रिय मैत्रीपूर्ण खेलमा जापानले इन्जुरी समयको पहिलो मिनेटमा निर्णायक गोल गर्दै ब्राजिलमाथि ऐतिहासिक जित निकालेको हो।
खेलमा जापानले सुरुआतमै दुई गोलको अग्रता बनाएको थियो। खेलको १५औँ मिनेटमा ताकेफुसा कुबोले मध्यभागबाट बल अघि बढाउँदै पेड्रो मोरिस्कोलाई छक्याएर तल्लो कुनामा गोल गरे। त्यसको चार मिनेटपछि केइटो नाकामुराले जापानको अग्रता दोब्बर बनाए। उनले शुतो नाकानोको क्रसलाई नियन्त्रणमा लिँदै गोल गरेका थिए।
खेलको आधा घण्टा बितेपछि भिनिसियस जुनियरले उत्कृष्ट गोल गर्दै ब्राजिललाई खेलमा फर्काउने प्रयास गरे। ब्रुनो गिमारेसको पासलाई पेनाल्टी क्षेत्रबाहिर नियन्त्रणमा लिएका रियल म्याड्रिडका स्टार भिनिसियसले शक्तिशाली प्रहार गर्दै बललाई गोलपोस्टको माथिल्लो कुनामा पुर्याए।
खेल सकिन १५ मिनेट बाँकी रहँदा भिनिसियसले व्यक्तिगत दोस्रो गोल गरे। बायाँतर्फबाट बल अघि बढाएका उनले लामो दूरीबाट प्रहार गरेको बल दायाँ पोस्टको भित्री भागमा ठोक्किएर बायाँ पोस्ट हुँदै गोललाइन पार गरेको थियो।
तर, जापानले हार मानेन। इन्जुरी समयको पहिलो मिनेटमा टाट्सुहिरो साकामोटोले गोल गर्दै जापानलाई ३–२ को जित दिलाए। कभेन्ट्रीका खेलाडी साकामोटोले विपक्षीको खुकुलो बल नियन्त्रणमा लिँदै नजिकैबाट गोल गरेका थिए।
निर्णायक गोल हुनुअघि भएको घटनालाई लिएर ब्राजिलका खेलाडी तथा टोलीका सदस्यले फाउल भएको भन्दै विरोध गरेका थिए। उक्त विवादपछि ब्राजिलका प्रशिक्षक कार्लो एन्सेलोटी र बार्सिलोनाका स्टार राफिन्हाले रातो कार्ड पाए। प्रतिस्थापन भइसकेका राफिन्हा मैदानबाहिरबाट खेल हेरिरहेका थिए।
यस जितसँगै जापानले १३ महिनाभित्र दोस्रोपटक ब्राजिललाई पराजित गरेको छ। विदेशी भूमिमा ब्राजिलविरुद्ध जापानको यो पहिलो जितसमेत हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1700232978.jpg)
-1786602170.png)
