काठमाडौं- सरकारले निर्माणको काम अन्तिम चरणमा पुगेको गौतम बुद्ध अन्तर्राष्ट्रिय विमानस्थल आगामी आर्थिक वर्ष २०७७/७८ भित्रै निर्माण सम्पन्न गरी सञ्चालन गर्ने उद्घोष गरेको छ।
आगामी आर्थिक वर्ष २०७७/०७८ लागि बजेट प्रस्तुत गर्दै अर्थ मन्त्री युवराज खतिवडाले गौतम बुद्ध अन्तर्राष्ट्रिय विमानस्थल आगामी आर्थिक वर्षभित्रै निर्माण सम्पन्न गरी सञ्चालन गर्नका लागि आवश्यक रकम विनियोजग गरेको जानकारी दिएएका छन्। यसका लागि अन्तर्राष्ट्रिय विमानस्थलहरुका लागि विनियोजन भएको एक मुष्ट रकम १९ अर्ब ४२ करोडबाट हुने मन्त्रीले जानकारी दिए।
यसअघि गते जेठ १५ गते संसदमा चालू आर्थिक वर्षका बजेट प्रस्तुत गर्दै गर्दा पनि अर्थ मन्त्री खतिवडाले चालू आर्थिक वर्षमै विमानस्थल सञ्चालनका लागि भन्दै ३ अर्ब ३३ करोड ६४ लाख रुपैयाँ विनियोजन गरेका थिए। तर, चालू आवमा कोरोनाका कारणले विमानस्थल निर्माणको काम नसकिएपछि पुनः सरकारले आगामी आर्थिक वर्षभित्रै विमानस्थल सञ्चालन गर्ने उद्घोष गरेको छ।
यो आयोजना सन् २०१५ मा सुरु भई सन् २०१७ को डिसेम्बरमा सम्पन्न हुने अपेक्षा गरिएकोमा उक्त अवधिभित्र निर्माण कार्य सम्पन्न हुन नसकेको हुँदा संशोधित कार्यतालिकाअनुसार ३१ मार्च, २०२० मा सम्पन्न गर्ने लक्ष्य लिइएको थियो। उक्त समयमा पनि निर्माण सम्पन्न नभए पनि पुन समय थप भएको छ। यो आयोजनाको कुल लागत ३० भन्दा बढी भइसकेको छ।
विमानस्थल निर्माणका लागि जग्गाको मुआब्जा वितरणमा मात्रै २३ अर्ब भन्दा बढी खर्च भएको छ।
त्रिभुवन अन्तर्राष्ट्रिय विमानस्थलको वैकल्पिक अन्तर्राष्ट्रिय विमानस्थल निर्माण मार्फत् दिगो पर्यटन विकास गर्ने लक्ष्यसहित रूपन्देही जिल्लाको भैरहवास्थित गौतम बुद्ध विमानस्थलको निर्माण थालिएको थियो।
विमानस्थलको रन–वे ३ हजार मिटरको हुनेछ। साथै विमानस्थलमा अन्तर्राष्ट्रिय भवन, एयरपोर्ट अपरेशन, प्रशासनिक भवन, कन्ट्रोल टावर, अग्नि नियन्त्रण तथा जीवनोद्धार भवन लगायत सञ्चार तथा पथ प्रदर्शक सामग्री जडान गरी अन्तर्राष्ट्रिय विमानस्थलको रूपमा स्तरोन्नति गर्ने उद्देश्य सरकारको लक्ष्य छ।
हालसम्म रन–वेको निर्माण कार्य सम्पन्न भएको, टर्मिनल भवनको संरचना सम्पन्न भई ९० प्रतिशत भइसकेका छ। अहिले विमानस्थलमा फिनिसिङ कार्य भएको र उपकरण जडानको काम भइरहेका छ। कतिपय उपकरण भने कोरोनका कारण आउन सकेको छैन। तर, चालू आवका लागि विनियोजन भएको रकम भने ५० प्रतिशत पनि खर्च हुन सकेको छैन।
कहाँ पुग्यो काम
विमानस्थल निर्माणको काम अहिले अन्तिम चरणमा पुगेको छ। विमानस्थल सञ्चालनका लागि चाहिने पूर्वाधार र उपकरण हो। आइसिबी जिरो १ (पूर्वाधार निर्माण) को काम ९० प्रतिशत सम्पन्न भइसकेको छ।
आइसिबी जिरो २ (सञ्चार उपकरण तथा सर्भिलेन्स जडान) पनि भइरहेको छ। अन्तर्राष्ट्रिय विमानस्थल सञ्चालनका लागि कस्टम, अध्यागमन, क्वारेन्टाइन, एयरलाइन्सहरुलाई उडान अनुमति लगायतका काम पनि भइरहेका छ।
दक्षिण एसियाली पर्यटन पूर्वाधार विकास परियोजना अन्तर्गत रहेको यो विमानस्थल निर्माणमा एसियाली विकास बैंक एडिबीको सहयोग छ। यो परियोजना कुल ८५.५५७ मिलियन डलरको हो। प्राधिकरणले चिनियाँ कम्पनीसँग आइसिबी–१ का लागि ७८.३ मिलियन डलरमा सन् २०१४ नोभेम्बर १३ मा सम्झौता गरेको थियो। विमानस्थल निर्माणमा चिनियाँ कम्पनी नर्थ वेस्ट सिभिल एभिएसनले गरिरहेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।