फाइल फोटो
काठमाडौं- राष्ट्रियसभामा सांसद रामनारायण बिडारीले कोरोना भाइरसको संक्रमण फैलाउने कार्यमा सांसद, नेता र सिडिओको भूमिका भएको अरोप लगाए।
‘सांसद र नेताहरु गाउँगाउँ घुमेर कोरोना फैलाउने काम गरे भने सिडिओले मनलाग्दी पास वितरण गरेर फैलाए’, नेकपा सांसद बिडारीले बुधबारको राष्ट्रियसभा बैठकमा बोल्दै भने, ‘टोलटोलका गुन्डाहरु कसले दिएको पास लिएर कुदेका छन्, सिधा जनता घरभित्र थुनिएका छन्।’
सिडिओले दारु खाँदा र तास खेल्दाका साथीलाई पनि पास बाँडेको आरोप उनले लगाए।
‘नेता, मन्त्री र सांसद धेरै हिँड्नु भएन’, विशेष समयमा उनले भने, ‘उनीहरुका कारण पनि रोग फैलिएको छ।’
उनले सरकारचाहिँ बस्न नपाउने बताए। ‘लकडाउन र संकटमा सरकारचाहिँ घरमा बस्ने होइन, औषधि ल्याउनुपर्यो’, उनले भने, ‘नीति बनाउने, कानुन बनाउने काम गरौं।’
हाल भएको कानुन अपर्याप्त रहेको उनले बताए। विभिन्न स्थानीय तह र सिडिओबाट आफू अनुसार आदेश जारी भएकाले अब कानुन बनाउनुपर्ने आवश्यकता भएको उनले बताए।
‘सदन चलिरहेको छ कानुन किन नबनाउने? विपक्षीले पनि मानिहाल्छ कानुन बनाउनेतिर लागौं’, उनले भने।
व्यापारी, कानुन र अदालतमा पनि समस्या परेकाले अब सम्बोधन गर्नुपर्ने उनले बताए।
भारत र नेपालको सीमा विवाद अहिले उच्च बिन्दुमा पुगेको उनले बताए। यो संवेदनशील कुरा भएको भन्दै सचेत भएर छिटोभन्दा छिटो कुटनीतिक रुपमा सुल्झाउनुपर्ने बताए। इपिजी प्रतिवेदन नबुझ्ने तर सीमामा नेपालको भाग मिचेर सडक बनाउने कुरा हुन नसक्ने उनले बताए। गाउँगाउँ पुगेर सरकारले तरकारी उठाएर बिक्री गर्ने व्यवस्था मिलाउन बिडारीले माग गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751188744.png)
-1749826086.png)
