काठमाडौं- राष्ट्रियसभाका सदस्यहरुले विदेशमा आपतकालीन अवस्थामा रहेका नेपाली नागरिकलाई तुरुन्त फिर्ता ल्याउन माग गरेका छन्।
बुधबार बसेको बैठकको शून्य र विशेष समयमा सांसदहरुले अतपत्र परेका नागरिकलाई तुरुन्तै फिर्ता ल्याएर क्वारेन्टाइनमा राख्न सुझाव दिएका हुन्। अहिले नेपालमा बनेका क्वारेन्टाइन गुणस्तरहीन पाइएकाले होटलहरुलाई क्वारेन्टाइनका रुपमा प्रयोग गर्न सांसदहरुको आग्रह छ।
सांसद हरिराम चौधरीले कोरोनाका कारण देश भयाभह अवस्थामा पुग्न लागेको उल्लेख गर्दै भारतबाट आउने नागरिकहरुलाई व्यवस्थित गर्न सुझाव दिए। विशेष गरी सुदूरपश्चिम प्रदेशका नागरिकहरु भारतका विभिन्न ठाउँमा रहेको र उनीहरु घर फर्किने क्रम रहेकाले संक्रमणको सम्भावना पनि उत्तिकै रहेको बताउँदै सरकारलाई अस्पतालहरु व्यवस्थित बनाउन सुझाव दिए।
‘सुदूरपश्चिमका नागरिक कामका लागि भारत जान बाध्य भएका छन्। भारतमा कोभिड–१९ लागेपछि फर्किने क्रम जारी छ, त्यहाँ पनि अवस्था नाजुक बन्दै गएको अवस्थामा छ’, सांसद चौधरीले भने, ‘त्यहाँ सुविधा सम्पन्न अस्पतालको आवश्यक भएको छ।’
सांसद चौधरीले भने, ‘३० लाख जनसंख्यालाई महाकाली अस्पतालले नागरिकलाई सुविधा दिन सक्दैन। प्राइभेट अस्पतालको अवस्था पनि नाजुक छ।’
अस्पतालहरुमा भेन्टिलेटरसहितको सुविधाको व्यवस्था गर्नुपर्ने सांसदहरुले माग गरे।
सांसदले कोभिड–१९ का कारण किसानहरु पनि मर्कामा परेको उल्लेख गर्दै आवश्यक मलखाद र बीउको व्यवस्था मिलाउन आग्रह गरे।
सांसद जितेन्द्रनारायण देवले नेपालमा कोरोना महामारी उत्कर्षतिर गइरहेकाले सरकारलाई गम्भीर बन्न ध्यानाकर्षण गराए। सांसद देवले भारतमा रहेका नागरिकलाई तत्काल फिर्ता ल्याउन माग गरे।
‘आठ लाख नागरिक अहिले घर आउन चाहिरहेका छन्। जो कामविहीन भएका छन्, भोकमरीमा परेका छन, उनीहरुलाई ल्याऔँ’, देवले भने, ‘सबैलाई ल्याउनुपर्छ भनेको होइन। देशमा रोजगारी नहुँदा नागरिक बाहिर जानु स्वभाविक हो। संकटका बेला राज्यले अभिभावकीय भूमिका खेल्न आवश्यक छ।’
उनले नेपालमा बनेका नेपालको क्वारेन्टाइनहरु अव्यवस्थित हुँदा रोग सार्ने थलोका रुपमा परिणत हुने संभावना भएकाले भन्दै उनले क्वारेनटाइनहरुको गुणस्तर सुधार गर्न माग गरे।
सांसद शेखर नारायण सिंहले आवश्यक मात्रमा किटको व्यवस्था गर्न माग गरे। दुई नम्बर प्रदेशमा अझै पनि किटको मात्रा कम भएको भन्दै उनले सरकारको ध्यानाकर्षण गराए।
त्यस्तै सांसद प्रकाश पन्थले पनि विदेशमा आपतकालीन अवस्थामा रहेका नेपालीलाई छिटो ल्याउनुपर्ने उल्लेख गरे। उनले होटलहरुलाई क्वारेन्टाइनका रुपमा प्रयोग गर्ने विकल्प सरकारसँग रहेको उल्लेख गरे। सांसद नन्दा चपाईंले कोरोना लागेका र अन्य रोगीका बिरामीको उपचार अझै पनि एउटै अस्पतालमा भएको भन्दै आपत्ति जनाइन्।
‘कोरोना भाइरस र गर्भवती अस्पताललाई फरकफरक गरौं’, उनले भने, ‘सबै प्रदेशमा सुत्केरी कोरोना र अरु रोगको उपचार गर्ने व्यवस्था होस्।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791520578.jpg)
-1786602170.png)
