फाइल तस्वीर
काठमाडौं- कोरोनाबाट सिर्जित संकटमा परेकालाई स्वदेश फर्काउन सरकारमाथि चौतर्फी दबाब परेपछि सरकारले तयारी सुरु गरेको छ।
विदेशमा रहेका रोजगारी गुमेका कामदार, परिवार भेट्न गई फर्कन नपाएका, नियमित औषधी सेवन गर्नुपर्ने, समस्यामा परेका विद्यार्थीलगायतलाई फर्काउने तयारी सरकारले गरेको छ। संकटमा परेकामध्येबाट पनि बढी समस्या देखिएकालाई पहिलो चरणमा स्वदेश फर्काउने तयारी सरकारको छ।
आइतबारको मन्त्रिपरिषद बैठकमा नेपालीलाई फर्काउने विषयले प्रवेश पाएको थियो। परराष्ट्रमन्त्री प्रदिप ज्ञवालीले प्रधानमन्त्रीसँग आइतबारको मन्त्रिपरिषदको बैठकमा समस्यामा परेका नेपाली ल्याउनुपर्ने प्रस्ताव पेश गरेका थिए।
समस्यामा परेका नेपालीको पहिचान र नेपाल ल्याएपछि क्वारेन्टाइनमा राख्ने मोडालिटीको जिम्मेवारी परराष्ट्र मन्त्रालयलाई दिइएको छ। विदेशबाट ल्याएका नेपालीहरुलाई व्यवस्थापन गर्न ज्ञवालीलाई जिम्मेवारी दिइएको हो। परराष्ट्रमन्त्री ज्ञवालीले राखेको प्रस्तावअनुसार स्वदेश फर्काउने निर्णय मन्त्रीपरिषदले गर्ने बताइएको छ।
जटिल समस्यामा परेका श्रमिकहरुलाई प्राथमिकताका आधारमा स्वदेश छिटो फर्काउनु पर्नेमा परराष्ट्रमन्त्री ज्ञवालीको जोड छ। सरकारले विदेशबाट नेपाली ल्याउँदा खान‚बस्न समस्या भएका, गर्भवती महिला, तथा आफन्तको निधन भएर पनि लकडाउनका कारण काजकिरियामा आउन नपाएका, विदेशमा अवैध रुपमा रहेर आममाफी पाएका, रोजगारी गुमाएर अलपत्र परेकाहरुलाई विशेष प्राथमिकता दिने बताइएको छ।
जटिल अवस्थाका नागरिकहरुको उद्धार गरिसकेपछि अध्ययनका लागि विदेश गएर आफ्नै खर्चमा स्वदेश फर्किई क्वारेन्टाइनमा समेत आफ्नै खर्चले बस्नेहरुलाई पनि सरकारले फर्काउने छलफल भएको छ। त्यस्तै, रोजगारी वा विभिन्न सिलसिलामा विदेश गएका‚ समस्यामा नभए पनि आफ्नै खर्चमा स्वदेश फर्किन चाहने नेपाली नागरिकहरुलाई पनि बिस्तारै ल्याउनेबारे छलफल अघि बढेको छ।
आफ्नै खर्चमा क्वारेन्टाइनमा बस्न सक्ने अवस्था रहेकालाई होटलमा राख्नेगरी सरकारले व्यवस्था गर्ने भएको छ। अलपत्र परेर रोजगारी गुमाएर फर्किएकालाई सरकारले क्वारेन्टाइनको व्यवस्था गर्नेछ। स्थानीय तहसँगको सहकार्यमा उनीहरुलाई आफ्नै स्थानीय तहमा पठाउने विकल्पमा समेत छलफल भएको छ। व्यवस्थापनका लागि आवश्यक रकम सरकारले कोरोना कोषबाट स्थानीय तहलाई उपलब्ध गराउनेछ।
श्रम, रोजगार तथा सामाजिक सुरक्षा मन्त्रालयले तत्काल विदेशबाट फर्काउनुपर्ने अवस्थाका २ लाखभन्दा बढी नेपाली श्रमिकहरु रहेको अनुमान गरेको छ। आफन्त भेट्न गएर फर्कन नपाएका र केही विद्यार्थीहरु समेत संकटले फर्कन लागेका छन्।
वैदेशिक रोजगार व्यवसायी संघले सोमबार सार्वजनिक गरेको एक अध्ययनअनुसार कोरोनाका कारण रोजगारी गुमाएर ६ लाख श्रमिकहरु स्वदेश फर्कनेछन्। रोजगारी, भ्रमण, अध्ययन तथा विभिन्न सिलसिलामा विदेश पुगेका १० लाख नेपालीहरु फर्किने एक अध्ययनले देखाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
