रोल्पा- प्रदेश ५ का आन्तरिक मामिला तथा कानूनमन्त्री कुलप्रसाद के.सीले रोल्पा जिल्लाका सबै स्थानीय तहलाई राहत उपलब्ध गराएका छन्।
विदेश र बाहिरी जिल्लाबाट फर्किएर क्वारेन्टाइनमा बसेकालाई खाद्यान्न अभाव भएपछि जिल्लाका १० वटै स्थानीय तहलाई लक्षित गरी व्यक्तिगत पहलमा राहत उपलब्ध गराएका हुन्।
सोमबार एक औपचारिक कार्यक्रमको आयोजना गरी प्रमुख जिल्ला अधिकारीलाई मन्त्री के.सी.ले राहत सामग्री हस्तान्तरण गरेका हुन्। राहतस्वरुप ७५ क्विन्टल चामल, ३ सय लिटर तेल, ६ हजार मास्कलगायतका सामग्री उपलब्ध गराइएको छ। उक्त राहत जिल्ला प्रशासनमार्फत सम्पूर्ण स्थानीय तहलाई वितरण गरिनेछ।
कोरोना भाइरसको महामारी फैलिएको बेला रोगले भन्दा पहिले भोकले कोही पनि नागरिक आक्रान्त हुन नपरोस् भनेर राहत सामग्री उपलब्ध गराएको मन्त्री के.सी. ले जानकारी गराए। आगामी दिनमा समेत प्रदेश सरकार र व्यक्तिगत पहलमार्फत रोल्पाका लागि गर्न सकिने सहयोगका लागि तत्पर रहेको बताए।
यसअघि प्रदेश सरकारले कोरोना राहत कोषबाट जिल्लाका सबै स्थानीय तहलाई राहत रकम पठाएको थियो। तर, क्वारेन्टाइनमा बस्नेको संख्या अत्यधिक भएपछि स्थानीय तहलाई व्यवस्थापन गर्न समस्या भएको थियो। मन्त्री के.सीले यी अवस्थाका बारेमा जानकारी पाएपछि राहत बोकेर जिल्ला पुगेका थिए भने स्थानीय तहका प्रमुखसँग वस्तुगत अवस्थाका बारेमा छलफल समेत गरेका थिए।
त्यस्तै राहत हस्तान्तरण कार्यक्रममा मन्त्री के.सी.ले प्रमुख जिल्ला अधिकारीलाई कोरोना भाइरस रोकथाममा उच्च सतर्कता उपनाउन निर्देशन दिएका छन्। सामान्य लापरवाहीले भविष्यमा ठूलो जोखिमको सामना गर्नुपर्ने भएकाले यसतर्फ सजग रहन निर्देशन दिएका हुन्। त्यस्तै जिल्लाका सम्पूर्ण स्थानीय तहका प्रमुखलाई समेत अप्ठ्यारोमा खट्न र नागरिकको जीवन रक्षा गर्न आग्रह गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
