फोटो : dailysabah.com/
काठमाडौं– सरुवा रोग विशेषज्ञ डा अनुप सुवेदीले नेपालमा परीक्षण एकदमै कम भइरहेको र यही अवस्थामा रहे नेपालमा कोरोना संक्रमण थाहै नपाई व्यापक रुपमा फैलनसक्ने कुरामा सचेत गराएका छन्।
पछिल्लो समय भारतबाट नेपाल छिरेका सबै नागरिकको व्यापक रुपमा परीक्षण गर्नुपर्ने, दूरदराजमा रहेका नागरिकलाई समेत परीक्षणको दायरामा ल्याउनुपर्ने डा सुवेदीले बताए। उनले पहुँच भएका र क्वारेन्टाइनमा भएकालाई मात्र होइन, भारतबाट नेपाल छिरेका अधिकांश व्यक्ति र उनीहरुको ट्रेसिङ गरी सबैलाई परीक्षणको दायरामा ल्याउनुपर्ने बताए।
यसैगरी त्रिवि शिक्षण अस्पताल इमर्जेन्सी विभागका डा रमेश महर्जनले अहिले ट्रेसिङको काम सुस्त गतिमा भएको र यसलाई तुरुन्त बढाउनुपर्ने बताए। सजिलै एकबाट दर्जनौमा सर्ने भएकोले हामी व्यक्तिगत रुपमा पनि सचेत हुनुपर्ने डा महर्जनको भनाई छ।
सर्वसाधारणको लागि सर्भिलेन्स र ट्रेसिङ एपहरुको प्रयोग बढाउनुपर्नेमा महर्जनले जोड दिए।
डा उदय कोइरालाले अहिले सबै मिलेर, सहकार्य गरेर कोरोनालाई लकडाउन गर्नुपर्ने बताए। कोरोनालाई लकडाउन गर्नसकेमा मात्र हामीले देशलाई धेरै समय लकडाउन गर्नु नपर्ने उनको भनाइ थियो। लकडाउन खोल्नेबारे हचुवाको भरमा निर्णय गर्नु नहुने भन्दै डा कोइरालाले परीक्षण बढाउदै देशभर स्वास्थ्य क्षेत्रलाई अपग्रेड गर्नुपर्ने बताए।
अहिलेसम्म देशमा २२ हजारको हाराहारीमा पिसिआर विधिबाट परीक्षण गरिएको छ। आरडिटी टेस्ट गरिएको संख्या ६० हजार बढी रहेको स्वास्थ मन्त्रालयले जानकारी दिएको छ। लकडाउनसँगै नेपाल भित्रिएका व्यक्तिहरु नै ४० हजारभन्दा बढी रहको अनुमान गरिएको छ। भित्रिएका व्यक्तिहरुको पूर्ण विवरण र डिजिटल डेटा तयार गरिएको छैन। पछिल्लो समय पनि भारतबाट लुकिछिपी नेपाल भित्रिने व्यक्तिहरु बढिरहेको अवस्था छ। काठमाडौंमा लकडाउन खुकुलो भएको केही दिनमा नै तीन व्यक्तिहरु संक्रमित भेटिएपछि सरकारले परीक्षण बढाउने बताएको छ।
लकडाउनको परिस्थितीले अब स्वास्थ क्षेत्रलाई सुधार गर्नुपर्ने सरोकारवालाहरुको जोड छ । हरेक जिल्ला र क्षेत्रमा प्रभावकारी मोनिटरिङ र डिजिटल डेटा म्यानेजमेन्टमा काम गर्नुपर्ने धेरैको बुझाइ छ। अहिले स्थानीय निकायले प्रभावकारी काम गर्नसक्ने भन्दै स्थानीय निकायलाई मनोबल बढाउँदै, क्वारेन्टाइनको व्यवस्था गर्ने, ट्रेसिङ गर्ने र शंकास्पद सबैलाई प्रशिक्षणको दायरामा ल्याउनुपर्ने कर्णाली प्रदेशका जनस्वास्थकर्मी रामहरी अधिकारीले बताए।
डा सुवास प्याकुरेलले प्रविधिलाइ उच्च प्राथमिकतामा राखेर स्थानीय निकायलाई परिचालन गर्नसके ट्रेसिङ सजिलो र प्रभावकारी हुने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
