काठमाडौं- कोरोना भाइरसको संक्रमण रोकथाम तथा नियन्त्रणका लागि सरकारले लकडाउन गर्दा दैनिक गुजारा चलाउन नसक्ने मानिसहरुलाई धोविचौर युवा समूहले निःशुल्क खाना खुवाउने गरेको छ। क्लबले वैशाख ४ गतेदेखि गरीब, असहाय, अपाङ्ग, अशक्त तथा बालबालिकालाई साँझ ५ बजेदेखि ७ बजेसम्म शाकाहारी खाना खुवाउँदै आएको छ।
काठमाडौं महानगरपालिका- १७ धोविचौर क्षेत्रपाटीका युवाले आफ्नो टोलमा भोक भोकै मानिसहरु हिँड्न थालेपछि उक्त अभियान सुरु गरेका थिए। सुरुमा २० जना युवाले स्वयं ५४ सय रुपैयाँ संकलन गरी खाना खुवाउन सुरु गरेका थिए।
वडा नम्बर १७ का अध्यक्षले २५ किलोको ५ बोरा चामल उक्त कार्यमा सहयोग गरेका थिए। सामाजिक दूरी कायम गरी खाना खुवाउन वडाले निर्देशन दिएसँगै टोलबासीले आफूले सकेको सहयोग गरेका थिए। सबैको सहयोगपछि उक्त समूहले सुरुको दिनमा एक सय ७६ जनालाई खाना खुवाउन सुरु गर्यो। यस क्रममा व्यापारीहरुले नगद, चामल, दाल, तरकारी, ग्याँस, मसला दिने गरेका छन्।
क्लबले अहिलेसम्म ८० हजार नगद संकलन गरिसकेको छ। अहिलेको नगद तथा सामानले अझै १० दिनसम्म खाना खुवाउन सकिने समूहले जनाएको छ। टोलको आमा समूहले बिहान तरकारी केलाउनेदेखि सरसफाइका लागि सहयोग गर्ने गरेको छ।
सुरुमा साबुन पानीले हात धुनेदेखि एक अर्कालाई नछोई खाना खाने व्यवस्था मिलाइएको छ। धोविचौरमा खाना खुवाउन थालिएको थाहा पाएसँगै दिन दिनै मानिसहरु थपिने गरेका छन्। सरकारले लकडाउन गर्दा हवाई‚ यातायात ठप्प छ। यसैक्रममा आफ्नो देशमा फर्किन नपाएका २० जना विदेशी पर्यटकले समेत दैनिक खाना खाँदै आएका छन्।
धोविचौरमा दैनिक ज्यालादारी गरी जिविकोपार्जन गर्नेको संख्या ठूलो छ। उनीहरु भोकभोकै पाटीमा बसेको देखेर खाना खुवाउन सुरु गरिएको समूहका किशोर मगिनले जानकारी दिए। बाहिर हिँडडुल गर्न नसक्ने कतिपय असक्त मानिसहरुलाई घरमै खाना पुर्याइदिने गरिएको छ। घरमा खाना नभएका तर समूहमा खान नचाहनेले घरमा प्याकिङ गरेर लैजान पाउँछन्।
अनुमान गरिएका भन्दा धेरै मानिस आएमा तत्काल खाना बनाएर खुवाउन युवाहरु तल्लीन छन्। टोलमा खाना खुवाउँदा रोगको संक्रमण फैलिने डर भएकाले कतिपय टोलबासीले यस्तो कार्य नगर्न दबाब पनि दिएका थिए। कतिपय टोलबासीले त यदि रोगको संक्रमण फैलियो भने यसको जिम्मेवार तिमिहरू हुने भन्दै धम्की समेत दिए।
यस अभियान लकडाउन हुन्जेलसम्म जारी राख्ने उक्त समूहको योजना छ। यदि संक्रमण फैलिन सुरु गर्यो भने यो अभियान रोक्ने तर सामान्य अवस्थामा जारी राख्ने क्लबको योजना रहेको छ। टोलमा कोही पनि बिचल्ली भएर खाना खान नपाई बस्न नपरोस् भनेर यस्तो अभियान सुरु गरिएको समूहका एक सदस्यले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787802736-1787803515.jpeg)
-1786602170.png)
-1786513116.png)
