काठमाडौैं- पर्यटन तथा होटल व्यवसायमा कार्यरत मदजुरहरुका तीन संगठनले कोरोना संक्रमण नियन्त्रणका लागि गरिएको लकडाउनको प्रभावका कारण श्रमिकहरुको जिवन निर्वाहमा समस्या परेको भन्दै राहतका लागि पहल गर्न सरकारलाई आग्रह गरेका छन्।
अखिल नेपाल होटल क्यासिनो तथा रेष्टुराँ मजदुर संघ, नेपाल स्वतन्त्र होटल क्यासिनो तथा रेष्टुराँ मजदुर संघ र नेपाल पर्यटन तथा होटल सम्बद्ध श्रमिक संघले सोमबार श्रम, रोजगार तथा सामाजिक सुरक्षा मन्त्रालयलाई ध्यानाकर्षण पत्र पठाउँदै राहत प्याकेज घोषणाका लागि आग्रह गरेका हुन्।
पर्यटन क्षेत्रमा कार्यरत श्रमिकहरुको रोजगारीको सुरक्षा, जिवन निर्वाह र रोजगारदाता तथा प्रतिष्ठानलाई दिगो रुपमा सञ्चालन गर्न सरकारले पहल गरिदिनुपर्ने उनीहरुको माग छ। केही होटल तथा प्रतिष्ठानहरुले कर्मचारी कटौती र तलब भत्ता नदिएको विषयमा पनि मजदुर संगठनहरुले आपत्ति जनाएका छन्।
यस्ता छन् तीन मजदुर संगठनले सरकार समक्ष राखेका ५ माग
१. होटल संघ नेपाल र यस क्षेत्रमा क्रियासिल व्यवसायीहरुका संस्थाबाट वैसाख ११ गते श्रम रोजगार तथा सामाजिक सुरक्षामन्त्रीसमक्ष पेश गरिएको ज्ञापनपत्रको सम्बन्धमा पूर्ण रुपमा असहमतिसहित मन्त्रालयको ध्यानाकर्षण।
२. अहिलेको विषम परिस्थितिमा पर्यटन क्षेत्रका श्रमिकहरुको रोजगारीको सुरक्षा र व्यवसायीहरुको व्यवसायको स्थायित्वका लागि कानुनको पूर्ण पालना गर्न र कानुन तथा सरकारको नीतिगत निर्देशनका विरुद्धका कुनै कार्य गरी श्रमिकहरुको रोजगारी र सुविधामा कुनै पनि प्रकारको निर्णय नगर्न/नगराउन आवश्यक निर्देशनात्मक आदेश गर्ने।
३. पर्यटन क्षेत्रका व्यवसायीहरुलाई तत्कालका लागि आन्तरिक पर्यटनको प्रवर्द्धनका लागि आवश्यक योजना निर्माणका गरी सरकारलाई पेश गर्न लगाई आन्तरिक पर्यटन प्रवर्द्धनका लागि सरकारको तर्फबाट सुविधा उपलब्ध गराउने।
४. श्रमिकहरुले खाईपाई आएको पारिश्रमिकसहित सेवासुविधा सहज रुपमा उपलब्ध गराउन पर्यटन क्षेत्रका व्यवसायीलाई आवश्यक निर्देशन दिनुपर्ने।
५. श्रम ऐन २०७४ को दफा १५ बमोजिम श्रमिकलाई जगेडामा राख्दा युनियनको सहमतिबाहेक १५ दिनसम्म मात्र जगेडामा राख्न सक्ने र सोभन्दा बढी समयसम्म जगेडामा राख्दा यूनियनको सहमतिमा मात्र जगेडामा राख्न सक्ने स्पष्ट कानुनी व्यवस्थाका विपरीत श्रम नियमावली २०७५ को नियम ५ को प्रक्रिया समेत पुरा नगरी जगेडामा राख्ने कार्य तत्काल बन्द गर्न र कानूनविपरीत जगेडामा राखिएको अवस्थामा सम्पुर्ण तलब भत्ता उपलब्ध गराउन आवश्यक निर्देशन दिनुपर्ने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
