काठमाडौं- कोरोना भाइरस रोकथाम र नियन्त्रणका लागि सरकारले चैत ११ गतेदेखि लकडाउन गरेको भए पनि खाद्यान्न र कोरोना रोकथामका लागि प्रयोग हुने औषधिको नियमित आयात भइरहेको छ।
कोरोना रोकथामका लागि प्रयोग हुने मास्कदेखि उपचारका लागि आवश्यक पर्ने भेन्टिलेटर र खाद्यान्नको आयात नियमति भइरहेको भन्सार विभागले जनाएको छ।
विभागका अनुसार चैत १ गतेदेखि २८ गतेसम्म ३९ हजार ८९३ मेट्रिक टन खाद्यान्न आयात भएको छ। यसैगरी यो अवधिमा २२ हजार ७६४ मेट्रिक टन तरकारी, १५ हजार ५९६ मेट्रिक टन दलहन तथा गेडागुडी र ६ हजार ८६ मेट्रिक टन फलफूल आयात भएको छ। यस्तै लकडाउनकै बीचमा ७९ मेट्रिक टन दुग्धजन्य पदार्थ आयात भएको विभागले जनाएको छ।
'अत्यावश्यक वस्तु एवं खाद्यान्नको आयात सहज बनाउन भन्सार विभाग लागिरहेको छ,' विभागका महानिर्देशक सुमन दाहालले भने, 'भन्सार प्रशासनले आयात सहजका लागि जोखिमपूर्ण अवस्थमा पनि काम गरिरहेको छ।' विभागले सम्पूर्ण भन्सार प्रशासनलाई सहज जाँचपास मिलाउन यसअघि नै निर्देशन दिइसकेको छ।
विभागका अनुसार आयातित वस्तुमध्ये दुग्धजन्य वस्तु सबैभन्दा धेरै काठमाडौं गन्तव्य उल्लेख गरेर आयात भएको छ। यो अवधिमा ६७ मेट्रिक टन दुग्धजन्य वस्तु काठमाडौं गन्तव्य उल्लेख गरेर आयात भएको तथ्यांकमा उल्लेख छ।
अन्य खाद्यवस्तु भने काठमाडौंसँगै तराईका जिल्ला गन्तव्य उल्लेर गरेर आयात भएको तथ्यांकमा उल्लेख छ। खाद्यान्न, गेडागुडी, तरकारीको आयात रुपन्देही, बारा, पर्सा, मोरङ, बाँकेलगायतका जिल्लामा गन्तव्य उल्लेख गरेर धेरै आयात भएको छ।
'आयातका क्रममा उल्लेखित गन्तव्यले सबै सामान त्यही जिल्लामा खपत भयो भन्न त सकिँदैन तर यसले विभिन्न जिल्लामा सामान पुगेको देखाउँछ,' महानिर्देशक दाहालले भने। विभागको तथ्यांकअनुसार पूर्वदेखि पश्चिसम्मका भन्सार कार्यालयबाट आयात भइरहेको छ।
४५ लाख मास्क भित्रियो
विभागको तथ्यांकअनुसार चैतको २८ गतेसम्ममा ४५ लाख वटा मास्क नेपाल भित्रिएको छ। ५ करोड ७९ लाख रुपैयाँ बराबरको मास्क भित्रिएको विभागले जानकारी दिएको छ। विभागका अनुसार यो अवधिमा २ हजार थान पर्सनल प्रोटेक्टिभ इक्युपमेन्ट (पिपिई) पनि नेपाल भित्रिएको छ।
यसैगरी यो अवधिमा १४ थान भेन्टिलेटर भित्रिएको छ। यस्तै यो अवधिमा ३९ हजार २२७ लिटर स्यानिटाइजर पनि नेपाल भित्रिएको तथ्यांकमा जनाइएको छ। यस अवधिमा ६२ हजार ३६८ थान थर्मोमिटर आयात भएको पनि तथ्यांकमा जनाइएको छ।
विभागका अनुसार १ लाख थान र्यापिड टेस्ट किट पनि नेपाल भित्रिएको छ। यो अवधिमा ३ हजार ९९ थान फेस सिल्ड पनि आयात भएको तथ्यांकमा जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
