तस्बिर सौजन्य : रविन्द्रप्रताप गुप्ता
भैरहवा–विश्वव्यापी रुपमा फैलिएको कोरोना भाइरसका कारण नेपाल अहिले उच्च जोखिममा छ। यहीकारण सरकारले अन्तर्राष्ट्रिय सीमा नाका,, उडानलगायत लकडाउन गरे पनि खुल्ला सिमानाका कारण जोखिम बढेको भन्दै सुरक्षा सतर्कता बढाएको छ।
सरकारले आव्हान गरेको लकडाउन प्रभावकारी बनाउन तथा सीमा क्षेत्रबाट कोही पनि व्यक्तिलाई नेपाल प्रवेशमा रोक्नका लागि उच्च सुरक्षा सतर्कता अपनाइएको छ।
रुपन्देहीको दक्षिणी सीमा क्षेत्र मर्चवारनजिकै भारतको कोल्हुईमा कोरोनाको संक्रमण देखिएपछि जिल्लाको सीमा क्षेत्रमा उच्च सतर्कता अपनाइएको हो। सीमा क्षेत्रमा व्यापक सुरक्षाकर्मी परिचालन गरिएको छ भने स्थानीय तहहरुले समेत निगरानी बढाएका छन्।
मर्चवार क्षेत्रबाट ५ किलोमिटर क्षेत्रभित्रै भारतीय क्षेत्र कोल्हुई र त्यस आसपासमा कोरोना संक्रमण देखिएपछि अहिले त्यस क्षेत्रका भारतीयहरु नेपालमा आफन्तकहाँ आउने सम्भावना बढेको छ। सीमा क्षेत्रमा हुने दोहोरो आवागमन रोक्न प्रहरीसँंगै स्थानीय तहले पनि अहिले महत्वपूर्ण भूमिका निर्वाह गरिरहेका छन्।
रुपन्देही प्रहरी प्रवक्ता खडकबहादुर खत्रीले सीमा क्षेत्रमै कोरोनाको संक्रमण देखिएकाले थप सजकता अपनाईएको बताए। उनले एक जवानले अर्को जवानलाई देख्न सक्ने गरी सीमामा प्रहरी र शसस्त्र प्रहरी खटाईएको बताए ।
भारतसँग जोडिएका साना गोरेटो बाटोदेखि ठूला सबै नाकामा जनशक्ति खटाएर निगरानी भइरहेको छ। सशस्त्र प्रहरी बल नेपाल नम्बर २७ गण रुपन्देहीले पनि शनिबारदेखि जिल्लामा ८० जना थप जनशक्ति परिचालन गरेको छ। सीमा क्षेत्रमै बेस बनाएर यी शसस्त्र प्रहरीले निगरानी गरिरहेका छन्।
प्रवक्ता खत्रीले कपिलवस्तुदेखि नवलपरासीसम्म ६० किलोमिटरको दूरीमा ५८ वटा स्थानमा पिकेट तथा मोबाइल गस्तीबाट निगरानी गरिएको जानकारी दिए । सशस्त्र प्रहरी रहेको ५२ वटा स्थानमा ६ वटा गाडी मोबाइलबाट गस्ती गरिएको उनले बताए । ‘सीमा नाकामा रहेका ६ वटा युनिटलाई बढाएर १० वटा फरवार्ड बेसको रुपमा स्थापित गरेका छौं,’ उनले भने।
लकडाउनलाई प्रभावकारी ढंगले कार्यान्वयन गर्न तथा सीमा क्षेत्रमा कुनै पनि आवतजावत हुन नदिन निगरानी बढाइएको उनले बताए। एक देशका नागरिकको आवागमन अर्को देशमा हुन नदिन स्थानीय नागरिक पनि सचेत रहेको पाइएको उनको भनाइ छ। ‘अर्को देशको नागरिकको आवागमनलाई सकेसम्म आफैं रोक्न प्रयास गर्ने र नसके स्थानीय प्रहरीलाई खबर गर्ने काम सीमा क्षेत्रमा रहेका नागरिकहरुले गर्नुभएको छ, उहाँहरुमा चेतना बढेको छ, यसले सशस्त्र प्रहरीलाई ड्युटी गर्न सजिलो भएको छ,’ सशस्त्र प्रहरी उपरीक्षक तेज पोखरेलले भने ।
प्रहरी प्रवक्ता खत्रीले २४ घण्टा नै प्रहरी खटिएको उल्लेख गर्दै रुपन्देहीका प्रहरी प्रमुख नै सीमा क्षेत्रको अवलोकन गर्न खटिएको बताए।
त्यस्तै लकडाउनलाई व्यवस्थित गर्न र थप प्रभावकारी बनाउन सशस्त्र प्रहरी र नेपाल प्रहरीले सीमा क्षेत्रको निरीक्षण गरेको उनले बताए। आवतजावत नहोस् भनेर भित्री सडकमा पनि प्रहरी खटाइएको उनको भनाइ छ।
स्थानीय तहले पनि विभिन्न प्रकारका जनचेतनामूलक कार्यक्रमहरुबाट अहिले सीमा क्षेत्रमा आफ्नो उपस्थिति जनाएका छन्। भारतबाट आउने आफन्तलाई तत्कालका लागि घर अथवा गाउँमा प्रवेश नदिने र यदि कसैले प्रवेश दिएको खण्डमा त्यस्तालाई क्वारेन्टाईनमा राखिने तथा अन्य कारबाही पनि गर्ने रोहिणी गाउँपालिका अध्यक्ष सनोजकुमार यादवले जानकारी दिए।
यस्तै सम्मरीमाई गाउँपालिका अध्यक्ष जितेन्द्रनाथ शुक्लले पनि सीमा क्षेत्रमा लकडाउनको सचेतनासँगै भारतबाट आउने ब्यक्तिहरु बारे पनि जागरुक गराउन स्थानीय तह लागिपरेको बताए । उनले सबैभन्दा बढी जोखिममा मर्चवार क्षेत्र नै रहेका कारण यस क्षेत्रका जनता अझै बढी सतर्क हुनुपर्ने औंल्याए।
सशस्त्र र नेपाल प्रहरी दुवैले सीमावर्ती क्षेत्रमा गाडी मोबाइल गस्ती, पैदल गस्ती, मोटरसाइकल गस्ती लगायतका माध्यमबाट सीमाको निगरानी गरिरहेका छन् ।
रुपन्देही ३ (१) बाट निर्वाचित प्रदेश ५ का सदस्य सन्तोषकुमार पाण्डेयले पनि लकडाउनलाई प्रभावकारी बनाउन सरकारको कार्यमा साथ दिइरहेका छन्। सीमा सुरक्षाप्रति चासो व्यक्त गर्दै उनी भारतसँग जोडिएका नाकाहरुको अवलोकन गर्न आफँै विभिन्न क्षेत्रमा पुग्ने गरेका छन्।
भारतसँग जोडिएको रुपन्देहीको रोहिणी गाउँपालिकाका विभिन्न सीमा क्षेत्रमा अवलोकन गरेका पाण्डेयले खुल्ला सीमाका कारण एक देशको नागरिक अर्को देशमा जान सक्ने परिस्थितिलाई मध्यनजर गर्दै नेपाल प्रहरी र सशस्त्र प्रहरीले समन्वयात्मक ढंगले उच्च सतर्कता अपनाउनु राम्रो कार्य भएको बताए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
