धनगढी- सुदूरपश्चिममा कोरोना संक्रमितको संख्या चार पुगेको छ। प्रदेशमा एक सय ५१ जनाको प्रयोगशाला परीक्षण गरिएकोमा चार जनामा कोरोना संक्रमण देखिएको हो। प्रदेश स्वास्थ्य निर्देशनालयले दिएको जानकारीअनुसार १८ जनाको रिपोर्ट आउन बाँकी रहेको जनाइएको छ।
यस्तै प्रदेशको सेती प्रादेशिक अस्पतालमा मात्र अहिलेसम्म ४९ जनाको परीक्षण गरिएको छ। अस्पतालले सूचना जारी गर्दै आठ जनाको रिपोर्ट आउन बाँकी रहेको जनाएको छ।
सेती प्रादेशिक अस्पतालले दिएको जानकारीअनुसार कोरोना पोजेटिभ देखिएका चारै जनालाई अहिले क्वारेन्टाइनमा राखेर उपचार गरिएको छ। अस्पतालले ती सबैको अवस्था सामान्य रहेको जनाएको छ।
कोरोना भाइरसको संक्रमण भएका मानिसमा सामान्यतयाः रुघाखोकी लाग्ने, ज्वरो आउने, शरीर दुख्ने, सास फेर्न गाह्रो हुनेलगायतका लक्षण देखापर्ने चिकित्सकहरुले बताउँदै आएका छन् तर शनिबार पुष्टि भएका तीनै जनामा बिनाकुनै लक्षण कोरोना पोजेटिभ देखिएको सेती प्रादेशिक अस्पतालका चिकित्सकहरुले बताए।
अस्पतालका डाक्टर जगदिश जोशीले भने, ‘कोरोना पुष्टि भएका तीनै जनामा कोरोनाको खासै लक्षण देखिएको छैन। लक्षणबिनै कोरोना पोजेटिभ देखाउन थालेपछि अब स्वाब संकलनमा समेत अन्योल बढेको छ।’
यसअघि कोरोना भाइरस कोभिड-१९ को संक्रमण भएका धनगढीका ३४ वर्षीय युवकका परिवारलाई लक्षण देखा नपरेको भन्दै नमूना संकलन नगरी घर पठाइएको थियो। पछि अस्पताल बोलाएर नमुना संकलन गरिएको थियो।
सेती प्रादेशिक अस्पतालमा हालसम्म २७ जना शंकास्पद बिरामीको उपचार गरिएको जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
