राजविराज–कोरोना भाईरसको संक्रमणले माहामारीको रुप लिन थालेपछि चैत ११ गतेदेखि सरकारले पहिलो चरणको लकडाउन घोषणा गर्यो। लगत्तै भारतले पनि २१ दिन लामो लकडाउन घोषणा गरेको छ। तर, अहिले पनि नेपाल–भारत सीमा क्षेत्रमा मानिसको आवागमन रोकिएको छैन।
रोजगारीका लागि लामो समयदेखि भारतमा रहेका सप्तरीको कञ्चनरुप नगरपालिका ४ का ३० वर्षीय पुरुषोत्तम सिंह शनिबार राति घर आए। उनी न त स्वास्थ्य जाँच गर्न गए, न कसैसँग समन्वय नै गरे। कोरोना भाईरसका कारण चौतर्फी त्रास फैलिरहेका बेला उनी घरमै बसेको जानकारीपछि स्वास्थ्यकर्मीको टोली उनको घर पुग्यो र तत्कालै क्वारेन्टाईनमा राखेर निगरानी सुरु गरेको छ।
सिंहमात्र होईन, तीन दिनभित्र घर आएका ७ जनालाई कञ्चनरुप नगरपालिकाले क्वारेन्टाईनमा राखेर निगरानी सुरु गरेको नगरपालिकाका स्वास्थ्य संयोजक डम्वर गुप्ताले बताए।
राति–राति घर आउने र लुकेर बस्न थालेपछि नगरपालिकाले पछिल्लो समय घरमै पुगेर त्यस्ता ब्यक्तिलाई क्वारेन्टाईनमा पुर्याउने गरेको छ भने सूचना नै जारी गरेर त्यस्ता ब्यक्तिले अनिवार्य क्वारेन्टाईनमा बस्न सूचित गरेको उनले जानकारी दिए । ‘लकडाउन अघि आएकाभन्दा पनि लकडाउन सुरु भएपछि घर आउनेका कारण अहिले नागरिक असुरक्षित छन्’ उनले भने, ‘सुटुक्क घर आउने र लुकेर बस्ने गरेका छन्। छिमेकीसम्मलाई उनीहरु आएको जानकारी हँुदैन।’
घर आएका ब्यक्तिलाई फर्काउन नमिले पनि अनिवार्य रुपमा १४ दिन क्वारेन्टाईनमा राख्ने निर्णय अनुसार हाल सातै जनालाई नगरपालिकाले क्वारेन्टाईनमा राखेको उनले जानकारी दिए । ‘कतिपयलाई वोलाएर राख्यौ, नमान्नेलाई प्रहरी लगाएर ल्याएका छौं,’गुप्ताले भने।
लकडाउन सुरु हुनुअघि घर आएकालाई पनि होम क्वारेन्टाईनमा राखिएको नगरपालिकाले जनाएको छ। कोरोना भाईरसको संक्रमण सुरु भएपछि घर आएका ७४ जनालाई हाल होम क्वारेन्टाईनमा राखिएको गुप्ताले जानकारी दिए। ‘हामीले उनीहरुको सम्पुर्ण विवरण राखेका छौं र निगरानी पनि गरिरहेका छौं’ उनले भने, ‘अवस्था हेरेर उनीहरुलाई वोलाउन वा अन्यत्र पठाउनु परे पनि हामी तयारी अवस्थामा छौं।’
यसबाहेक सप्तरीका अन्य स्थानीय तहले पनि भारतलगायत अन्य मुलुकबाट आएका नागरिकको पहिचान र उनीहरुको निगरानी गर्ने काम सुरु गरेका छन् । ९ नगरपालिकासहित १८ वटै स्थानीय तहमा रहेका त्यस्ता ब्यक्तिको पहिचान सुरु गरिएको जिल्ला स्वास्थ्य कार्यालय सप्तरीका निमित्त प्रमुख दुनियाँलाल यादवले बताए । ‘हामीले आफनो संयन्त्र प्रयोग गरेर बाहिरवाट आएका ब्यक्तिको वारेमा जानकारी संकलन गरिरहेका छौं’ उनले भने, ‘अब स्थानीय तहसँग पनि समन्वय गरेर उनीहरुको तथ्यांक संकलन गरी निगरानीमा राख्ने योजना छ ।’
जिल्लाभरि विभिन्न क्वारेन्टाईनमा रहेकाहरुको सोमबारसम्म र अन्यका हकमा स्थानीय तहको समन्वयमा तथ्यांक संकलन गर्ने यादवले वताए। ‘जिल्ला सुरक्षा समितिको बैठकबाट स्थानीय तहलाई त्यस विषयमा आग्रह गर्ने योजना छ’, उनले भने।
बााहिरबाट आएकाहरुलाई निगरानी गर्न थालेकै कारण क्वारेन्टाईनमा हरेक दिन संख्या थपिदै गएको उनले स्पष्ट पारे । आईतबार दिउँसोसम्म विभिन्न क्वारेन्टाईनमा गरी सप्तरीमा ८ महिलासहित १ सय २९ जना रहेको यादवको भनाइ छ। आईतबार वोदेवरसाईन नगरपाकिलामा ६ र तिरहुत गाउँपालिकाको क्वारेन्टाईनमा १ जना थप भएका छन्। शनिबारसम्म क्वारेन्टाईनमा ८ महिलासहित १ सय २२ जना थिए ।
अलपत्र परेका ५० जनाको उद्दार
लकडाउनका कारण अलपत्र परेका ५० जना नेपाली नागरिकलाई प्रहरीले उद्दार गरेको छ ।
विराटनगर, ईटहरी, राजविराज लगायत विभिन्न स्थानवाट घर हिडेका तर लकडाउनका कारण बाटोमै अलपत्र परेकालाई जिल्ला प्रहरी कार्यालय सप्तरीले उद्दार गरेको हो ।
सर्लाहीका ३८, रौतहटका ४, बाराका ४ र सिरहाका ४ गरी ५० जनालाई उद्दार गरी ना १ क ६२६७ नं. को ट्रिपरमार्फत सर्लाहीको लालबन्दीसम्म पु¥याईएको जिल्ला प्रहरी कार्यालय सप्तरीका डिएसपी तिलक भारतीले जानकारी दिए ।
स्थानीय तहसँग समन्वय गरी उनीहरुलाई खाजा÷नास्ता पनि खुवाईएको भारतीले वताए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
