काठमाडौं– पूर्वराजा ज्ञानेन्द्र शाह पोखराबाट काठमाडौं फर्किने क्रममा उनका समर्थकले गर्ने प्रदर्शनलाई लक्षित गर्दै अहिले ११ बजेदेखि सुरक्षा व्यवस्थामा कडाइ गरिँदै छ। पूर्वराजा शाह अपराह्न ३ बजे हवाईमार्ग हुँदै पोखराबाट काठमाडौं आउने कार्यक्रम छ।
जिल्ला प्रहरी परिसर, काठमाडौंका प्रवक्ता एसपी अपिलराज बोहराका अनुसार आजको प्रदर्शनलाई लक्षित गर्दै नेपाल प्रहरीको काठमाडौं स्थित विभिन्न गण र गुल्मबाट थप मद्दत टोली तैनाथ हुँदैछन्। उनीहरू ११ बजेदेखि तोकिएको स्थानमा तैनाथ रहन्छन्।
काठमाडौंस्थित जिल्ला प्रहरी परिसरसहित सम्पूर्ण वृत्त र प्रभागका टोली आवश्यकताअनुसार विभिन्न ठाउँमा रहने एसपी बोहराले बताए।
सुरक्षा संवेदनशीलतालाई दृष्टिगत गर्दै अहिले ११ बजेदेखि नै त्रिभुवन अन्तर्राष्ट्रिय विमानस्थलको गोल्डेनगेटबाट विमानस्थल प्रवेशमा कडाइ गरिने भएको छ। विभिन्न गन्तव्यमा जाने यात्रुको पहिचान गरेर मात्रै गोल्डेनगेटबाट प्रवेश दिइने प्रहरीले जनाएको छ।
गोल्डेनगेटदेखि गौशालासम्मलाई उच्च सतर्कता स्थलका रूपमा लिइएको प्रहरी स्रोतले जनायो।
ट्राफिक व्यवस्था डाइभर्ट
आज दिउँसो तीनकुनेदेखि गौशालासम्मको सवारी आवागमन अस्तव्यस्त रहने ट्राफिक महाशाखाका प्रमुख एसएसपी विनोद घिमिरेले बताए।
महाशाखाले दिउँसो १२ बजेपछि उक्त रुटमा सवारी सवारी साधन प्रवेशमा रोक लगाउने सम्भावना रहेको घिमिरेले बताए। उनका अनुसार तीनकुनेबाट गौशाला जानुपर्ने सवारी साधनलाई नयाँ बानेश्वर तर्फ डाइभर्ट गरिने सम्भावना छ। चावहिल-जोरपाटी जाने सवारी साधनलाई पेप्सीकोला, काडाघारी हुँदै डाइभर्ट गर्ने सकिने उनले बताए।
‘त्यसबेलाको अवस्था हेरेर कताबाट गाडीहरू पठाउने भन्ने हुन्छ, तीनकुने-गौशालाको बाटो चलाउनचाहिँ गाह्रो पर्छु,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791869951.jpg)
-1786602170.png)
