भैरहवा- कोरोना भाइरसका कारण नेपाल र भारत दुवै देशमा भएको लकडाउनका कारण सीमानाका सुनौलीमा राेकिएका २९ जना नेपाली नागरिकलाई नेपालस्थित क्वारेन्टाइनमा पठाइएको छ। बेलहिया नाकाबाट प्रवेश गराएर उनीहरुलाई रुपन्देहीका तिलोत्तमा नगरपालिका, शुद्धोधन गाउँपालिका र सियारी गाउँपालिकामा रहेका क्वारेन्टाइनमा पठाइएको हो।
झापाका ११, बर्दियाका पाँच र बाँकी रुपन्देहीका गरी २९ जनालाई क्वारेन्टाइनमा पठाइएको रुपन्देहीका प्रहरी प्रवक्ता प्रहरी नायब उपरीक्षक खडकबहादुर खत्रीले बताए। तिलोत्तमा नगरपालिकाको शंकरनगर दुर्गादत्त मावि, सियारी गाउँपालिकाको जनता मावि र यज्ञोदय दुधनाथ बहुमुखी क्याम्पसमा रहेको क्वारेन्टाइनमा पठाइएको हो।
उनीहरुलाई १४ दिन क्वारेन्टाइनमा राखेपछि मात्र घर पठाइने प्रहरी नायब उपरीक्षक खत्रीले बताए। 'चार/पाँच दिनदेखि नै सुनौली नाकामा रोकिएका रहेछन्, मानवीय हिसावले पनि प्रवेश गराएर क्वारेन्टाइनमा राख्नु उपयुक्त ठानेर प्रवेश गराइएको हो, अहिलेसम्म उनीहरु स्वस्थ नै छन्', उनले भने, 'अब १४ दिन क्वारेन्टाइनमा बसेपछि मात्रै घर पठाइने छ।'
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।