एजेन्सी–भारतको बिहारमा कोरोना भाइरसको संक्रमणलाई ख्याल गर्दै ८३ जना डाक्टरहरुले प्रधानमन्त्री नरेन्द्र मोदीलाई पत्र लेखेर सेल्फ क्वारेन्टाइनमा पठाइदिन माग गरेका छन्।
कोरोना भाइरसविरुद्ध लड्ने तयारीलाई ध्यानमा राख्दै केन्द्रीय स्वास्थ्य मन्त्रालयले हरेक राज्यमा आफ्नै एक कोरोना विशेष अस्पताल बनाउन भनेको छ। पटनाको एनएमसीएचलाई बिहार कोरोना अस्पताल बनाउने केन्द्रीय स्वास्थ्य मन्त्रालयले घोषणा गरेको छ। तर बिहारका डाक्टरले नरेन्द्र मोदी सरकारको उक्त निर्णयमाथि प्रश्न उठाएका छन् । यही क्रममा ८३ जना जुनियर डाक्टरहरुले अस्पताल व्यवस्थापनसँगै प्रधानमन्त्री कार्यालय, बिहार स्वास्थ्य विभाग र मुख्यमन्त्री कार्यालयलाई पत्र लेखेर यस्तो माग गरेका हुन् ।
‘अस्पतालमा डाक्टर र नर्सका लागि अत्यावश्यक पीपीई र एन ९५ मास्क नै प्राप्त भएको छैन ’ उनीहरुको पत्रमा भनिएको छ ‘ यस्तो अवस्थामा कसरी संक्रमितहरुको उपचार गर्ने र बिरामीलाई सुरक्षित राख्नुका साथै उनीहरुलाई यी सामग्री उपलव्ध गराउने?’
डाक्टरहरुले यही अवस्थामा आफूहरु संक्रमणको उच्च जोखिममा रहेको भन्दै चिन्ता व्यक्त गरेका छन्। ‘यही जोखिमलाई ध्यानमा राखेर हामीलाई सेल्फ क्वारेन्टाइनमा पठाइयोस्,’ उनीहरुको पत्रमा भनिएको छ। एनएमसीएचमा दुई जना कोरोना पोजेटिभ बिरामी छन्। ती बिरामी भर्ना भएसँग यो अस्पताल कोरोना अस्पतालको रुपमा घोषणा भएको थियो। दुई जना बिरामी हुँदा अब अस्पतालका सबै शंकास्पद बिरामी भएका छन्। एनइमसीएचका जुनियर डाक्टर्स एशोसियसनका अध्यक्ष रवि रमन भन्छन्, हामी केही दिनदेखि संक्रमित विरामीको उपचार विना पिपिई र मास्कमा गरिरहेका छौ किनकि ती सामग्री यो अस्पतालमा उपलव्ध नै छैन ।’
आफूहरुले पटक–पटक यस्तो अत्याववश्यकीय वस्तु अस्पताल व्यवस्थापनसँग माग गरे पनि पुरा नभएपछि मोदीलाई पत्र लेखेको उनले बताए।
‘जब–जब हामी यस्ता सुरक्षाका सामग्री अस्पताल व्यवस्थापनसँग माग गर्छोै तब उनीहरु माथिबाट मागिरहेको भन्दै आउनु हुन्छ ’ उनले भने ‘ तर अहिलेसम्म यो उपलव्ध हुन सकेको छैन जबकि यो कोरोना अस्पताल भएर यहाँ संक्रमितको उपचार भइरहेको छ ।’ यस्तो अवस्था सार्वजनिक हुनु नै दुखद भएको उनको भनाइ छ।
‘डाक्टरलाई थाहा छ कि विश्व स्वास्थ्य संगठनको गाइडलाइनको पालनाविना संदिग्ध बिरामीको उपचार गर्न हुदैन ’ रविले भने ‘ तर अस्पतालमा बिरामी भर्ना भएपछि उपचार गर्दिनँ भन्न सकिदैन त्यसैले उपचार गरिरहेका छौं।’ केही दिन पहिले केही डाक्टरलाई पनि फ्लु देखिएपछि बिदामा बस्न भनिएको उल्लेख गर्दै उनले भने, ‘यसरी जोखिममा काम गर्नुभन्दा सेल्फ क्वारेन्टाइनमा पठाइदिन माग गरेका हौं।’
तर अनुमति नमिलेकाले अहिले सावधानी र आवश्यक सुविधा विना नै काम गरिरहेको उनले बताए। यो विषय सार्वजनिक हुन नदिन अस्पताल व्यवस्थापनले डाक्टरहरुलाई धम्की दिइरहेको छ। डाक्टरको प्रमाणपत्र लिन बाँकी भएकाले त्यसमा तलमाथि हुने धम्की पनि कतिपयले खेपिरहेको एक डाक्टरले बताए ।
डाक्टरका तर्फवाट लगाइएको आरोपका बारेमा बीबीसीले अस्पतालका सुपरिटेन्डेन्ट गोपाल कृष्णलाई ‘कोरोनासँग लड्ने तयारी के छ’ भनि सोधेको थियो। उनले अस्पतालसँग ५०० भन्दा धेरै शय्या रहेको, ४३ भेन्टिलेटर रहेको तर पीपीई र मास्कको कमि रहेको बताए। अस्पतालले छिटै आवश्यक सामग्री उपलव्ध गराउने प्रतिबद्धता जनाएकाले चिन्ता लिनु नपर्ने उनको दाबी छ। बिहारमा ५०० बेडको कोरोना अस्पताल पर्याप्त होइन। बिहारका विभिन्न अस्पतालमा १ हजार २ सय २८ शंकास्पद कोरोनाका बिरामी भर्ना भएका छन् ।
यो संख्या दैनिक रुपमा बढ्दो छ। बिहार भारतमै तेस्रो धेरै जनसंख्या भएको राज्य हो । केन्द्र सरकारले २१ दिन लक डाउन घोषणा गरेको छ तर त्यसको उल्लघन कार्य पनि यहाँ बढिरहेको छ । लकडाउन उल्लघन गरेको आरोपमा २१५ जना विरुद्ध सरकारले मुद्दा नै दर्ता गरेको छ। ८५ जनालाई थुनामा राखिएको छ भने ६९ लाख ७३ हजार २ सय ५० रुपैयाँ त जरिवाना नै असुल गरेको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
