काठमाडौं- नेपाली कांग्रेसका केन्द्रीय सदस्य कल्याण गुरुङले कोरोना भाइरसले ल्याउने आर्थिक विपतिसँग जुध्न ३ खर्ब १० अर्बको राहत प्याकेज ल्याउन सरकारसँग अनुरोध गरेका छन्।
नेपाल लाइभसँग कुरा गर्दै उनले दैनिक ज्यालादारी र मजदुरी गरेर आफू र आफ्नो परिवार पालिरहेका मानिसहरु भोकमरीको सिकार बन्न सक्ने सम्भावना रहने बताए। दैनिक ज्यालादारीमा निर्भर रहेका र न्युन आय भएका व्यक्ति र तिनका परिवारहरुलाई तत्काल विशेष राहत प्याकेज घोषणा गर्न उनले सरकारसँग अनुरोध गरेका छन्।
साना र ठुला व्यावसायीहरुको साथै किसानहरुको पनि यस अवधिको कर छुट र ऋणको ब्याज मिनाहा गर्नुपर्ने उनले सुझाव दिएका छन्। बैंकलाई तिर्नुपर्ने किस्ता पर सार्न समेत अनुरोध गरेका छन्।
करिब दुई करोडको संख्यामा नेपालमा रहेका दैनिक ज्यालादारी गर्ने, कम आय र न्यून आय भएका व्यक्ति र तिनका परिवारको बेरोजगारहरुलाई दैनिक दुई सय रुपैयाँको दरले एक महिनाको लागि आर्थिक राहत दिन आग्रह गरेका छन्।
करिब दुई करोड जनसंख्या विशेष राहत प्याकेजका लागि दुई खर्ब ४० अर्ब खर्चुनुपर्ने उनको आकलन छ। अन्य देशका सरकारले समेत आफ्ना नागरिकहरुको लागि विशेष राहत प्याकेजको व्यवस्था र घोषणा गरिरहेकाले आर्थिक जोहो गर्न सरकारको पहल हुनुपर्ने उनले बताए।
संकटको घडीमा एक अर्कालाई दोषारोपण र राजनीतिक रङ नदिई संकटलाई पार लगाउनु सबैको दायित्व भएको उनले बताए।भाइरसको महामारीबाट सुरक्षित हुनको लागि सेल्फ क्वारेन्टाईनमा घरमा बस्नुको बिकल्प नभएकाले नागरिकलाई लकडाउनकोे पालना गर्न आग्रह गरे।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।