धनगढी- धनगढी उपमहानगरपालिकाले कोरोना भाइरस (कोभिड-१९) रोकथामका लागि धनगढी बजार क्षेत्रका सडकमा औषधि छर्कन सुरु गरेको छ। बिहीबार चौराहादेखि मनहेराको पेट्रोल पम्प र हसनपुर राष्ट्र बैंक चोकदेखि धनगढी उपमहानगरपालिकाको गेटसम्म औषधि छर्कने काम गरिएको छ।
धनगढी उपमहानगरपालिकाका प्रमुख नृपबहादुर वडले सम्भव भएसम्म नगरका सबै क्षेत्रमा औषधि छर्कने बताए। उनले भने, ‘औषधि छर्कने काम पानी छर्किने ट्यांकरबाट गरिरहेकाले सबै गल्लीहरुमा ट्याक्टर प्रवेश नगर्न सक्छ। धनगढी उपमहानगरपालिकाले आफ्नो श्रोत र साधनले भ्याएसम्म काम गरिरहेको छ‚’ नगरप्रमुख वडले भने, ‘संवेदनशील अवस्थामा सबैको समन्वय आवश्यक छ।’
धनगढी उपमहानगरपालिकाले बिहीबारमात्रै १ सय बेडसम्मको क्वारेन्टाइन तयार गरिसकेको नगरप्रमुख वडले बताए। उनले भने, ‘शुक्रबार २ सयभन्दा बढी बेड तयार गरिसक्छौं। उपमहानगरपालिकाले पूर्व तयारीअन्तर्गत समिति नै बनाएर जिम्मेवारी बाँडफाँड गरेर काम गरिरहेको बताइएको छ।
धनगढी उपमहानगरपालिका दमकल शाखा इन्चार्ज काशीराम अर्यालले नगरक्षेत्रमा निरन्तर औषधि छर्कने बताए। उनले औषधि केही गन्हाउने भइकाले त्यसमा अप्ठेरो नमान्न नगरबासीलाई अनुरोध गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1761632277.png)
