काठमाडौं–नेपाल दूरसञ्चार प्राधिकरणले रिचार्ज बोनस र सापटी रकमका विषयमा दिएको निर्देशन दूरसञ्चार सेवा प्रदायकले मानेका छैनन्। मंगलबार दिउँसो प्राधिकरणले दूरसञ्चार सेवा प्रदाकयहरुलाई रिचार्जमा शतप्रतिशत बोनस र २ सय रुपैयाँ सापटी रकम दिन निर्देशन दिएको थियो।
प्राधिकरणको अनलाइन बोर्ड बैठकले उक्त निर्णय गरेको थियो। बैठकले सरकारले लकडाउन गरेको समयमा दूरसञ्चार सेवामा सर्वसाधरको पहुँचमा कुनै असर नपरोस भन्दै यस्तो निर्देशन दिएको थियो।
निर्देशन पछि बुधबार दिउँसो बसेको नेपाल टेकिलमको बैठकले रिचार्जमा शतप्रतिशत बोनस दिने निर्णय गरे पनि सापटी रकमको विषयमा भने केही निर्णय गरेन। सापटी रकमको विषयमा टेलिकम प्रवक्ता राजेश जोशीलाई प्रश्न गर्दा उनले केही प्राविधिक कारणले साप्टी रकम दिन नसक्ने निर्णय गरेको जानकारी दिए।
तर, उनले प्राविधिक कठिनाइ भने पनि अहिले टेकिलमले ग्राहकले खर्च गर्ने गरेको रकममा आधारमा भने सापटी रकम दिइरहेको छ। तर, प्राधिकरणले २ सय रुपैयाँ सापटी रकम विना ब्याजमा दिन निर्देशन दिएको थियो। तर, यसमा भने टेलिकम प्राविधिक समस्या भन्दै पछि हटेको छ।
त्यतिमात्रै नभइ टेलिकमले रिचार्जमा शत प्रतिशत बोनस दिए पनि बोनस रकम खर्च गरिसक्नु पर्ने समयसीमा अति नै न्यून राखेको छ।
रिचार्ज कार्ड प्रयोग गरी ५० र रु १०० को रिचार्ज गर्दा प्राप्त हुने बोनस रकम २ दिनभित्र खपत गरिसक्नुपर्छ भने २ सय र ५ सयको रिचार्जमा प्राप्त हुने बोनस रकम ४ दिनभित्र खपत गरिसक्नुपर्ने टेलिकलमे जनाएको छ।
त्यसैगरी १ हजारको रिचार्जमा प्राप्त हुने बोनस रकम ६ दिनभित्र खपत गरिसक्नु टेलिकमले जनाएको छ।
एमपोस वा विद्युतीय रिचार्जअन्तर्गत १० देखि ९९ रुपैयाँसम्मको रिचार्जमा प्राप्त हुने बोनस २ दिनभित्र खपत गरिसक्नुपर्नेछ भने १०० देखि ४९९ रुपैयाँसम्मको रिचार्जमा प्राप्त हुने बोनस ४ दिनभित्र खपत गरिसक्नुपर्ने टेलिकलमे जनाएको छ।
यसैगरी ५०० देखि ९९९ रुपैयाँसम्मको रिचार्जमा प्राप्त हुने बोनस ८ दिनभित्र खपत गर्नुपर्ने हुन्छ भने १००० वा सोभन्दा माथिको रिचार्जमा प्राप्त हुने बोनस १० दिनभित्र खपत गरिसक्नुपर्ने टेलिकमले जनाएको छ।
एनसेलबाट निर्देशन पूर्ण रुपमा उल्लंघन
निजी दूरसञ्चार सेवा प्रदायक कम्पनी एनसेलले नेपाल दूरसञ्चार प्राधिकरणको निर्देशन पूर्ण रुपमा उल्लंघन गरेको छ।
प्राधिकणले रिचार्जमा शत प्रतिशत बोनस दिन भने पनि ५० प्रतिशतमात्रै बोनस दिने निर्णय गरेको छ। अहिले सोही अनुसार एनसेलले बोनस दिँदै आएको छ।
यसैगरी प्राधिकरणले सापटी रकममा थप शूल्क नलिन भने पनि एनसेलले २ रुपैयाँ सेवा शूल्क लिने निर्णय गरेको छ।
यस्तो छ एनसेलको अफर योजना
एनसेलले रिचार्जमा ५० प्रतिशत बोनस अफर ल्याएको छ। यसैगरी एनसेलले ५ सय रुपैयाँसम्मको ब्यालेन्स ट्रान्सफर पनि निःशुल्क गर्ने भएको छ। साथै २ सय ३० रुपैयाँमा १५ जिबी डेटा स्टेक होम प्याक ल्याएको छ।
ब्यालेन्स ट्रान्सफर सेवाअन्तर्गत प्रिपेड ग्राहकले एनसेल नेटवर्कभित्र रहेका आफ्ना परिवारका सदस्य तथा साथीभाइलाई आफ्नो मेन ब्यालेन्सबाट निःशुल्क रुपमा ब्यालेन्स रकम उनीहरुको मोबाइलमा पठाउन तथा उनीहरुबाट प्राप्त गर्न पनि सक्ने एनसेलले जनाएको छ। हालको परिस्थितिलाई ध्यानमा राखी ब्यालेन्स ट्रान्सफरको सीमा एक दिनमा अधिकतम ३ पटकबाट २० पटक पुर्याइएको छ।
प्रिपेड ग्राहकले १० देखि ५ सयसम्म आफ्नो मेन ब्यालेन्सबाट एनसेलको अन्य कुनै नम्बरमा ब्यालेन्स ट्रान्सफर गर्न सक्ने एनसेलले जनाएको छ।
ट्रान्सफर रकमबाट ग्राहकले कल गर्न, एसएमएस पठाउन तथा इन्टरनेट चलाउन सक्नेछन्। त्यस्तै एनसेल सापटी सेवाअन्तर्गतको सापटी रकमलाई बढाएको छ।
यससँगै एनसेलका ग्राहकले विगतमा यो सेवा प्रयोग गरेको व्यवहारका आधारमा न्यूनतम ४० देखि अधिकतम २ सयसम्म सापटी लिन सक्ने टेलिकलमे जनाएको छ। यसमा २ रुपैयाँ सेवाशुल्कमा सापटी लिन सक्ने टेलिकलमे जनाएको छ।
यसैगरी रिचार्ज बोनस भने एनसेल नेटवर्कभित्र कल गर्न, एसएमएस गर्न र इन्टरनेट चलाउन प्रयोग गर्न सक्ने कम्पनीले जनाएको छ। बोनस रकम सोही दिनको मध्यरातिसम्म मान्य हुने एनसेलले जनाएको छ।
पदको घडीमा कार्यालयको कामकाज घरबाटै पुरा गर्नुपर्ने ग्राहकहरुको आवश्यकतालाई ध्यानमा राख्दै एनसेलले १५ जिबी डेटा भोलुमसहितको स्पेशल डेटा प्याक‚ स्टे होम प्याक ल्याएको छ। ग्राहकले करबाहेक मात्र २ सय ३० (करसहित २९३.६९०मा यो प्याक सुचारु गर्न एनसेलले जनाएको छ।
यो डेटा प्याकमा रहेको १५ जिबी डेटामा १० जिबी डेटा सबै नेटवर्कमा (टुजी, थ्रिजी र फोरजी) मा लागू हुनेछ भने ५ जिबी डेटा फोरजी नेटवर्कमा मात्र लागू हुने कम्पनीले जनाएको छ।
यो प्याकको समयावधि सात दिनको रहेको छ र ग्राहकले मध्यरातदेखि बेलुका ६ बजेसम्मको समयमा डेटा प्रयोग गर्नुपर्ने एनसेलले जनाएको छ। एनसेलको यो योजनाअन्तर्गतका सबै अफरहरु ३० दिनका लागि सञ्चालनमा रहनेछ जनाएको छ।
के भन्छ प्राधिकरण?
दूरसञ्चार सेवा प्रदायक कम्पनीको नियमन गर्ने निकाय नेपाल दूरसञ्चार प्राधिकरणले भने यस विषयमा सेवा प्रदायकबाट जानकारी आएपछि अध्ययन गर्ने जनाएको छ।
सेवा प्रदायकले निर्देशन पछि दिएको सुविधा निर्देशन अनुसार भए नभएको अध्ययन गरेर आवश्यक निर्णय लिने प्राधिकरण प्रवक्ता मिनप्रसाद अर्याल बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
