लकडाउनको अवस्थामा सप्तरीको राजविराजमा परिचालन भएका एक सैनिक। तस्बिर : दिनेश शर्मा
राजविराज- नेपालमा कोरोना भाइरसका नयाँ संक्रमित फेला परेको र उनको सम्पर्कमा आएकाहरूको पहिचान गर्ने चुनौती बढेसँगै सोमबार सरकारले लकडाउन गर्ने निर्णय गर्यो। तर, सप्तरी, सिरहालगायत प्रदेश २ का अधिकांश स्थानमा सरकारको निर्णय उल्लंघन भएको छ।
सदरमुकामबाहेक अधिकांश क्षेत्रका बजार तथा पसल खुलेका थिए। प्रहरीको प्रयासले केही समय बन्द भएपनि मानिसको चहलपहल दिनभर नै कायम थियो। यसलाई रोक्न सप्तरीका केही स्थानमा नेपाली सेना परिचालन गरिएको छ भने बुधबारबाट जिल्लाभर नै सेना परिचालन गर्न लागिएको छ।
सप्तरीको कञ्चनरूप नगरपालिका रूपनगर चौकमा पसल बन्द गराउन प्रहरीले पटकपटक मानिस लखेट्नु परेको थियो। मोटरसाइकल, टेम्पोलगायतका सवारीसाधन संचालनमै रहे। फाट्टफुट्ट रुपमा चारचक्के सवारी साधन पनि संचालन भए। समग्रमा लकडाउन गर्ने सरकारको उदेश्य असफल जस्तो देखियो।
यसै अवस्थालाई मध्यनजर गरी सप्तरीमा सेना परिचान गरिएको छ। मंगलबारदेखि नै सप्तरीका विभिन्न स्थानमा सेनाको गस्ती सुरु भएको छ भने बुधबारदेखि जिल्लाभरका मुख्यमुख्य चौकमा सेना परिचालन गर्ने निर्णय भएको राजविराजस्थित भीमदल गणका गणपति प्रमुख सेनानी गुप्तबहादुर कुँवरले नेपाल लाइभसँग बताए।
‘जिल्ला सुरक्षा समितिको निर्णय र सेनाको आफ्नो च्यानलले पनि परिचालन हुन आदेश आएपछि हामीले प्रहरीलाई सहयोग गर्ने निर्णय गरेका हौं,’उनले भने,‘भोलि (बुधबार)देखि आजको जस्तो अवस्था रहँदैन।’
मंगलबार सप्तरीका राजविराज, हनुमाननगर, रूपनी, कल्याणपुरलगायतका स्थानमा सेनाले गस्ती गरेको बताएका उनले बुधबरादेखि जिल्लाका प्रायः सबै ठाउँमा सेना रहने उनको भनाइ छ।
‘बिरामी बोक्ने र सुरक्षाका सवारीबाहेक हामी सबैलाई रोक्छौ,’ कुँवरले भने, ‘हामी निस्किएपछि मानिसको ओहोरदोहोर रोकिन्छ।’सेनाले सरकारको निर्णय कार्यान्वयनमा प्रहरीलाई सहयोग गर्ने कुँवरको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
