सप्तरीमा ३ जना क्वारेन्टाइनमा, एकलाई धरान पठाउने तयारी

कोरोना अपडेट

दिनेश शर्मा मंगलबार, चैत ११, २०७६, १२:५७

राजविराज- कतारबाट आएका सप्तरीका तीन जनालाई क्वारेन्टाइनमा राखिएकाे छ। कोरोना भाइरसको संक्रमणको आशंकामा उनीहरुलाई क्वारेन्टाइनमा राखिएकाे हाे।

सप्तरीको हनुमानगर कंकालिनी नगरपालिकाका १, डाकनेश्वरी नगरपालिकाको पातोका १ र भारतीय क्षेत्रबाट नेपाल छिरेका १ गरी तीन जनालाई क्वारेन्टाइनमा राखिएकाे जिल्ला स्वास्थ्य कार्यालय सप्तरीका निमित्त प्रमुख दुनियाँलाल यादवले बताए।

हनुमाननगर र पातोका दुवै जनाले राजविराजस्थित गजेन्द्रनारायण सिंह अस्पतालमा चेकजाँच गराएका थिए। जसमध्ये हनुमाननगरका व्यक्तिलाई कोरोनाको कुनै लक्षण नदेखिएपछि होम क्वारेन्टाइनमा पठाइएको अस्पतालका प्रमुख मेडिकल सुपरिटेन्डेन्ट चुमनलाल दासले जानकारी दिए।

यसैगरी, पखालाकाे समस्या देखिएका पातोका एक जनालाई पखाला ठीक भएपछि होम क्वारेन्टाइनमा पठाइएको जिल्ला स्वास्थ्य कार्यालय सप्तरीका निमित्त प्रमुख यादवले बताए। सोमबार भारतीय नाका कुनौलीबाट नेपाल प्रवेश गरेका एक व्यक्तिलाई तिलाठी कोईलाडी गाउँपालिकाको क्वारेन्टाइनमा राखिएको यादवले जानकारी दिए।

यसैगरी, गत चैत ८ गते कतारबाट नेपाल आएका सुरुङ्गा नगरपालिका-८ का एक युवकलाई रुघाखोकी र लगातार ज्वरो आएपछि उपचारका लागि धरानस्थित बिपी कोइराला स्वास्थ्य विज्ञान प्रतिष्ठान पठाइएको छ। २७ वर्षीय ती युवकले केही दिनअघि स्थानीय स्वास्थ्य केन्द्रमा जाँच गराएका थिए। उनमा ज्वरो र रुघाखोकी नरोकिएपछि उपचारमा पठाइएको प्रदेश २ का प्रेदशसभा सदस्य एवं नेकपाका प्रदेश सचिव गोविन्दबहादुर न्यौपानेले बताए।

‘ज्वरो र रुघाखोकी लगातार आइरहेको छ, तर घट्दै पनि गएको छ,’ उनले भने, ‘निर्क्याैल गर्न नसकेपछि हामीले उपचारमा पठाउन पहल गरिरहेका छौं,’ बिरामी युवा परिवारसँगै बसिरहेकाले सबैलाई चेकजाँचका लागि सल्लाह दिइएको उनले बताए।

सप्तरीका प्रमुख जिल्ला अधिकारी सुनील खनाल र जिल्ला स्वास्थ्य कार्यालयका प्रमुख यादवले ती युवाको बारेमा जानकारी आएपछि मेयरसहितका जनप्रतिनिधिलाई उक्त स्थानमा गएर यथार्थ बुझ्न र आवश्यक कदम चाल्न आग्रह गरिएको बताए।

यसैबीच, बिहान ६ बजेदेखि सुरु भएको लकडाउन सफल बनाउन सप्तरीमा सेना परिचालन गरिएको छ।

सप्तरीमा रोकथामको तयारी
कोरोना भाइरस रोकथाम तथा नियन्त्रणका लागि सप्तरीका विभिन्न अस्पतालमा गरी ५६ वटा आइसोलेसन वेड र १३ वटा आइसियू कक्ष तयार भएका छन्।

राजविराजको गजेन्द्रनारायण सिंह अस्पतालमा ६ वेड, छिन्नमस्ता अस्पतालमा २० वेड, रुपनी स्थित युनिक एसुकेसनल अस्पतालमा २० वेड र पूर्व क्षेत्रिय प्रहरी अस्पतालमा १० वेडको क्वारेन्टाईन व्यवस्थापन गरिएको छ। यसैगरी, छिन्नमस्ता अस्पतालमा ८ र युनिक अस्पतालमा ५ गरी आवश्यक्ता अनुसार १३ वटा आइसियू वेडसमेत प्रयोग गर्न सकिने सप्तरीका प्रजिअ खनालले बताए।

भारतसँग सीमा जोडिएका विभिन्न स्थानीय तहले समेत २ दिनभित्र २५ देखि ३० वेडको क्यारेन्टाइन तयार गरिसक्ने प्रतिबद्धता जनाएका छन्। सोमबार जिल्ला प्रशासन कार्यालयमा बसेको सुरक्षा समिति र स्थानीय तहका प्रमुखहरुको बैठकमा राजविराजसहित ९ वटा स्थानीय तहले क्वारेन्टाइनका निर्माणका लागि प्रतिबद्धता जनाएको जिल्ला प्रशासन कार्यालय सप्तरीका प्रशासकीय अधिकृत जनार्दन कट्टेलले बताए।