काठमाडौं- कोरोना भाइरस (कोभिड-१९) विश्वका १ सय ७३ देशमा फैलिसकेको छ। कतिपय देशले हवाई सेवा, सार्वजनिक यातायातसमेत बन्द गरिसकेका छन्। यस्तो अवस्थामा विश्वका ठूला सवारी उत्पादकहरुले समेत धमाधम आफ्नो उत्पादन बन्द गर्ने घोषणा गर्न थालेका छन्।
इटालियन अटो उत्पादक ग्रुप एफसिएले १६ मार्चमा तत्कालका लागि युरोपभर रहेका आफ्ना सवारी उत्पादन प्लान्ट बन्द गर्ने निर्णय गरेको थियो। एफसिएअन्तर्गत रहेका विभन्न ब्रान्डका सवारीको उत्पादन बन्द गरेको एफसिए ग्रुपले जनाएको छ। यो निर्णय मार्च २७ सम्म लागू हुने र त्यसपछि के गर्ने भन्ने विषयमा कम्पनीले अर्को निर्णय लिने भएको छ।
एफसिएले उपग्रेडेड उत्पादनसमेत रोक्ने बताएको छ। एफसिएको इटाली, सर्बिया र पोल्यान्डमा रहेको प्लान्ट बन्द भएका हुन्।
त्यस्तै बेलायती बिलासी अटो निर्माता ज्यागुअर ल्यान्ड रोभरले समेत बेलायतमा रहेको प्लान्ट बन्द गर्ने घोषणा गरेको छ। कम्पनीले बिहीबार प्लान्टबाट उत्पादन बन्द गर्ने बताएको हो। आगामी अप्रिल २० पछि भने उत्पादन सुचारु गर्ने ल्यान्ड रोभरले जनाएको छ।
तर ज्यागुअर ल्यान्ड रोभरले ब्राजिल तथा भारतमा रहेका प्लान्टबाट भने उत्पादन साविककै अवस्थामा भइरहेको उल्लेख गरेको भारतीय सञ्चार माध्यमहरुले लेखेका छन्।
विश्वकै ठूलो कार उत्पादकमध्येको एक फक्सवागन ग्रुपले समेत युरोपियन मुलुकमा रहेका प्लान्टबाट हुने सवारी उत्पादन बन्द गर्ने घोषणा गरेको छ। कोरोना भाइरसको संक्रमण बढ्दै गएको, सवारीको माग न्यून भएको कारण युरोपमा रहेका प्लान्टहरुबाट सवारी उत्पादन बन्द गर्ने तयारीमा फक्सवागन रहेको छ। ग्रुपले जर्मनी, स्लोभाकिया, स्पेन र पोल्यान्डमा रहेका प्लान्टहरु बन्द गर्ने भएको हो।
कोरोना भाइरसका कारण सवारी बिक्रीमा उल्लेख्य रुपमा कमी आएकाले फोर्ड, जनरल मोटर्स (जिएम) तथा फियाट क्राइसलरले उत्तर अमेरिकामा रहेका प्लान्टहरु मार्च ३० सम्मका लागि बन्द गर्ने निर्णय गरेका हुन्।
उत्तर अमेरिकी देशहरुका अटोमोबाइल क्षेत्रमा काम गर्नेहरुको संस्था युनाइटेड अटो वर्कर्सले कामदारको सुरक्षाका लागि भन्दै २ सातासम्म उत्पादन बन्द गर्ने बताएका हुन्। त्यसैअनुसार उत्पादक कम्पनीहरुले प्लान्ट बन्द गर्ने निर्णय गरेका हुन्।
विश्वका अन्य देशमा रहेका सवारी उत्पादक कम्पनीहरुले समेत प्लान्ट बन्द गर्ने विषयमा तयारी तथा छलफल गरिरहेका छन्। कोरोनाको संक्रमण बढ्दै गएकाले सवारी किन्ने मानिसहरुको संख्या व्यापक रुपमा घटेको हो। त्यसैलाई मध्यनजर गर्दै उत्पादक कम्पनीहरु प्लान्ट बन्द गर्ने वा कटौती गर्ने तयारीमा लागेका हुन्।
हालसम्म भारतीय सवारी उत्पादकहरुले उत्पादन प्लान्ट बन्द गर्ने निर्णय नै गरिसकेका छैनन्। तर भारतमा समेत कोरोनाको संक्रमण बढ्दै गएकाले कम्पनीहरुले यसबारेमा केही दिनमा निर्णय गर्ने अनुमान गरिएको छ।
यता भारतीय अटो उत्पादक कम्पनीहरुले कतिपय कर्मचारीलाई घरबाटै काम गर्ने अनुमति दिएका छन्। विभिन्न कम्पनीमा कार्यरत उच्च तहका करीब २५ हजार कर्मचारीलाई घरमै बसेर काम गर्ने अनुमति दिएको द इकोनोमिक टाइम्सले लेखेको छ।
नेपालमा हालसम्म प्रमाणित रुपमा कोरोनाको संक्रमण नदेखिएको भएपनि व्यापार व्यवसाय ठप्प प्रायः हुन थालेका छन्। यता अटोमोबाइलको व्यापार भने शून्य उन्मुख रहेको व्यवासयीहरुले बताएका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।