काठमाडौं- ठीक एक महिनाअघि १४ सय ३४ अंकमा रहेको नेपाल स्टक एक्सचेन्ज (नेप्से) सूचक त्यसको केही दिनसम्म उच्च अंकले बढिरह्यो। उच्च अंकले बढ्दै जाँदा फागुन १५ गते नेप्से सूचक १६ सय ३२ अंकसम्म पुग्यो।
तर त्यसयता बजार उच्च अंकले घटिरहेको छ। बुधबार कारोबार बन्द हुँदा पुँजी बजार सूचक १२ सय ५५ अंकमा झर्यो। कोरोनाको जोखिमले अर्थतन्त्रमा गम्भीर धक्का लाग्न सक्ने आँकलनका बीच पुँजी बजार पनि उच्च अंकले घटिरह्यो।
बजारमा अस्वाभाविक गिरावट आएपछि मंगलबार अर्थ मन्त्रालयले नियमनकारी निकाय नेपाल धितोपत्र बोर्डलाई एउटा पत्र पठायो। मन्त्रालयको पत्रमा तीव्र गतिमा पुँजी बजारमा उतारचढाव देखिनुको कारण सोधिएको छ।
'पुँजी बजारमा स्वभाविक घटबड भन्दा पनि उच्च उतारचढाव देखिएपछि धितोपत्र बोर्डलाई पत्र पठाइएको हो,' स्रोतले भन्यो, 'हामी बजारमा उतारचढाव देखिनुका कारणबारे जानकारी दिन उहाँहरुलाई भनेका छौँ।'
अर्थ मन्त्रालयको वित्तीय क्षेत्र व्यवस्थापन महाशाखाले बोर्डलाई पत्र लेखेको हो। पत्रमा मन्त्रालयले पुँजी बजारको विद्यमान अवस्था र बजार घट्नुका कारणबारे जानकारी दिन भनेको छ।
अर्थको पत्रपछि बोर्डको प्रेस विज्ञप्ति
अर्थ मन्त्रालयले पत्र पठाएपछि बुधबार नै बोर्डले एउटा प्रेस विज्ञप्ति प्रकाशन गर्यो। विज्ञप्तिमा केही दिनयता धितोपत्रको दोस्रो बजारको कारोबारका सम्बन्धमा आएका समाचार तथा बजारको अवस्था प्रति बोर्डको ध्यानाकर्षण भएको जनाइएको छ। यसैगरी धितोपत्र बोर्डले बजारलाई बजारको रुपमा नै चल्न दिनुपर्दछ भन्ने मान्यता राखेको र नियमनकारी निकायको रुपमा बोर्डले सधैं धितोपत्र बजारको अवस्थालाई सूक्ष्मरुपले अध्ययन समेत गरिरहेको उल्लेख छ।
बोर्डले पछिल्लो समय धितोपत्र बजारलाई कोरोना भाइरससँग जोडेर बजार प्रति नकारात्मक हल्लाहरु फैलाइएको विज्ञप्तिमा जनाएको छ। यसैगरी बोर्डले धितोपत्रको प्राथमिक र दोस्रो बजार विकास तथा सुधारका विभिन्न कार्यहरु अगाडि बढाइरहेको, देशको समष्टिगत आर्थिक अवस्था तथा समग्रमा सूचीकृत कम्पनीहरुको वित्तीय अवस्थासमेत सन्तोषजनक रहेकाले लगानीकर्ताहरु हतोत्साही हुनु नपर्ने पनि उल्लेख गरेको छ।
'धितोपत्र लगानीकर्ताहरुलाई धितोपत्र खरिद विक्री सम्बन्धी निर्णय गर्दा सम्बन्धित क्षेत्र, उद्योग तथा कम्पनीहरुको हरेक पक्षको जानकारी लिनुका साथै धितोपत्र बजारको अवस्था तथा बजार सुधारका कामकारबाहिहरुको अध्ययन गरेर हतोत्साही नभइ हल्लाको पछि नलागी सुझबुझ तवरले लगानी सम्बन्धी निर्णय लिन बोर्ड विशेष अनुरोध गर्दछ,' विज्ञप्तिमा भनिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
