डडेल्धुरा- डडेल्धुराका दुई सीमा क्षेत्रमा ‘हेल्थ डेस्क’ स्थापना गरिएको छ। स्वास्थ्य कार्यालय र परशुराम नगरपालिकाले कोरोना भाइरस (कोभिड–१९)को संक्रमणकाे जोखिम बढ्दै गएपछि हेल्थ डेस्क स्थापना गरेको हो।
नगरपालिकाले स्वास्थ्य कार्यालय डडेल्धुरासँगको समन्वयमा नगरपालिकाको वडा नं ५ परिगाउँको बाङ्घाट र वडा नं ६ तातापानीको सिसमजाला घाटमा हेल्थ डेस्कको स्थापना गरेको स्वास्थ्य कार्यालय डडेल्धुराका प्रमुख अशुतोष श्रेष्ठले बताए। भारतबाट नेपाल भित्रिने यात्रुहरुको स्वास्थ्य परीक्षणका लागि बिहीबारदेखि हेल्थ डेस्क सञ्चालनमा ल्याइएको स्वास्थ्य कार्यालय डडेल्धुराका प्रमुख श्रेष्ठले जानकारी दिए। हेल्थ डेस्कमा हाललाई एक–एकजना स्वास्थ्यकर्मी शीर्ष स्वास्थ चौकीबाट खटाइएको छ। आवश्यकताअनुसार थप जनशक्ति परिचालन गर्ने प्रमुख श्रेष्ठले बताए।
आइसोलेसन वार्डको व्यवस्था
कोरोना भाइरसको सम्भावित संक्रमण फैलिन नदिन र कोही संक्रमित भइहाले उपचार र रोकथामका लागि परशुराम नगरपालिका–१२ मा रहेको जोगबुडा अस्पतालमा आइसोलेसन वार्डको व्यवस्था गरिएको छ।
जिल्ला सदरमुकामस्थित डडेल्धुरा अस्पतालमा पनि आइसोलेसन वार्डको व्यवस्था गरिसकिएको स्वास्थ्य कार्यालय डडेल्धुराले जनाएको छ। जोडबुडा अस्पतालमा आइसोलेसन ३ बेडको निमार्ण गरी आवश्यक औषधि पनि स्वास्थ्यल कार्यालयले व्यवस्थापन गरिसकेको जनाएको छ। यस्तै जोगबुडा अस्पतालले खुल्लामञ्च अगाडीको दुई कोठे भवन र रेडक्रसको भवन आवश्यक तयारीका लागि खाली गरिएको अस्पतालका प्रमुख जितेन्द्र चौधरीले बताए।
सिसमजाला घाट र बाङ्घाटबाट दैनिक १५० देखि २०० को हाराहारिमा मानिस नेपाल–भारत आवतजावत गर्छन्। दैनिक उपभोग्यका सामग्रीदेखि अन्य लत्ता कपडासमेत किनबेच गर्न स्थानीय यिनै नाकबाट जानेआउने गर्दछन्। त्यहाँका स्थानीयहरू डुंगा र ट्युबको प्रयोग गरी महाकाली नदी तरेर भारतबाट सामान ल्याउँछन्।
जिल्ला प्रशासन कार्यालय डडेल्धुराले भारतसँग जोडिएका सीमानाकामा हेल्प डेस्क स्थापना गर्न स्थानीय तहलाई फागुन २२ गते लिखित रुपमा पत्राचार गरेको थियो। प्रशासनले जिल्लाभित्र सार्वजनिक स्थानहरूमा धेरै भीडभाड नगर्न, अति आवश्यक कामको लागि मात्र बाहिर जान, हात मिलाउनुको साटो नमस्कार गर्न, भेला, जमघट तथा मेला महोत्सवजस्ता कार्यक्रमहरू नगर्न सबैमा यसअघि नै अनुरोध गरिसकेको छ।
कोरोनाबाट जोगिन विद्यार्थीलाई मास्क वितरण
कोरोना भाइरसको सङ्क्रमणबाट जोगिन डडेल्धुराको अमरगढी नगरपालिकाले विद्यार्थीहरुलाई मास्क वितरण गरेको छ। नगरमा रहेका कक्षा ८ को परीक्षामा सहभागी ५ सय ३६ विद्यार्थीलाई मास्क वितरण गरिएको नगरपालिकाका शिक्षा शाखा प्रमुख हेमन्तराज पन्तले जानकारी दिए।
फागुन ३० गतेबाट सञ्चालन हुने उक्त परीक्षामा सहभागीहरुको लागि परीक्षा केन्द्रमै गएर केन्द्रलाई मास्क हस्तान्तरण गरेको उनले बताए। ‘नगरपालिकामा रहेका २२ वटा विद्यालयका कक्षा ८ मा अध्ययनरत विद्यार्थीहरुको ६ वटा केन्द्रमा परीक्षा हुँदै छ,’ पन्तले भने, ‘परीक्षामा सामेल हुने सबै विद्यार्थी र परीक्षा केन्द्रमा रहने सबै जनशक्तिलाई मास्क वितरण गरेर अनिवार्य मास्क लगाउन भनेका छौ।’
शिक्षा विज्ञान तथा प्रविधि मन्त्रालयले चैत ५ गते भित्र कक्षा १ देखि ९ सम्मको वार्षिक परीक्षा सञ्चालन गरिसक्न निर्देशन दिएपछि नगरभरका विद्यालयहरुमा परीक्षा सुरु भइसकेको छ। नगरपालिकाभरी संस्थागत र सामुदायिक गरी जम्मा ४१ वटा विद्यालय रहेका छन्। ती विद्यालयमा ६ हजार ८१ जना विद्यार्थी अध्ययनरत छन्।
कक्षा ८ बाहेक कक्षा १ देखि कक्षा ९ सम्मका विद्यार्थीहरुलाई मास्क दिन प्रति विद्यार्थी २० का दरले विद्यालयलाई रकम दिने निर्णय भएको नगरपालिकाका शिक्षा शाखा प्रमुख हेमन्तराज पन्तले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
