काठमाडौ- मृत्यु भएको मान्छेको नामबाट अर्को व्यक्तिको नाममा मालपोत कार्यालयले जग्गा पास गरेको पाइएको छ। अख्तियार दुरुपयोग अनुसन्धान आयोगले गरेको अनुसन्धानमा सुनसरी जिल्ला मालपोत कार्यालयले धरान-१० की रनमाया लिम्बुको जग्गा उनको मृत्यु भएपछि अर्को व्यक्तिको नाममा वकसपत्र पास गराएको हो।
२०७० कात्तिक १० गते मृत्यु भएकी रनमाया लिम्बुको जग्गा मालपोत कार्यलयको मिलेमतोमा २०७६ मंसिर २८ गते रत्नदेवी लिम्बुको नाममा हालैको वकसपत्र पास भएको थियो। ३१ लाख ४५ हजार बराबरको जग्गा मालपोतका कर्मचारीहरुको मिलेमतोमा रनमायाको कीर्ते औंठाछाप बनाई लिखत पास गराइएको थियो।
एक लाख ८७ हजार घुस
३१ लाख ४५ हजार बराबरको जग्गा खरिद गर्न मालपोत कार्यालयका कर्मचारीले १ लाख ८७ हजार घुस दिएको अख्तियारको अनुसन्धानमा पाइएको थियो। उक्त जग्गा हालैको वकसपत्र मार्फत पास गर्नका लागि रत्नमायाले दुई लाख ३५ हजार छुट्टाएको र त्यसमध्ये ४७ हजार १ सय ७५ रुपैयाँ राजस्वमा दाखिला गरेको र अन्य रकम मालपोत कार्यालयका कर्मचारीलाई बुझाएकी थिइन्। एकमुष्ट रुपमा मालपोत कार्यालयका कर्मचारीहरुले उक्त जग्गा ३१ लाख मुल्यांकन गर्दै २ लाख ३५ हजार लिएका थिए।
मालपोत अधिकृतसहित ४ जनाविरुद्ध भ्रष्टाचार मुद्दा
अख्तियारले जग्गा किर्तेमा संलग्न भएको आरोपमा मालपोत कार्यालय सुनसरीका तत्कालीन मालपोत अधिकृत दधिराम गुरागाईं, नासु मनोज घिमिरे, खरिदार कृष्णप्रसाद नेपाल र मोठफाँटका खरिदार रामप्रसाद भट्टराईविरुद्ध सोही बराबरको बिगो र कैद सजाय माग गर्दै मुद्दा दायर गरेको छ। विशेष अदालतमा अख्तियारले भ्रष्टाचार निवारण ऐनअनुसार कैद र बिगो बराबर जरिवाना पनि असुल गर्न माग गरेको छ।
उपमहानगरका शाखा अधिकृतविरुद्ध मतियारको मुद्दा
अख्तियारल इटहरी उपमहानगरपालिका सुनसरीका शाखा अधिकृत राजेन्द्र धिमाललाई जग्गा किर्तेमा मतियारको भूमिका खेलेको भन्दै भ्रष्टाचार मुद्दा दायर गरेको छ। जग्गाधनी स्वयं उपस्थित नभई घरबाटो सिफारिस निवेदन दिएको र मृतकको नाममा रहेको जग्गा कसरी हक हस्तान्तरण हुन सक्छ भनी गलत लिखत तयार पारेको अख्तियारको अभियोगपत्रमा उल्लेख छ।
हालैको बकसपत्रको लागी घरबाटो सिफारिस गरी गलत लिखत तयार गर्ने कार्यमा मतियारको भूमिका निर्वाह गरेको पुष्टि भएको भन्दै अख्तियारले धिमालविरुद्ध भ्रष्टाचार निवारण ऐन, २०५९ को दफा ९ को मतियारको रुपका कैद र जरिवाना गर्न आरोपपत्रमा माग गरेको छ।
लेखनदासविरुद्ध मुद्दा
अख्तियारले जग्गा किर्तेमा संलग्न भएको आरोपमा लेखापढी व्यवसायी पुस्करप्रसाद पोखरेलको जग्गाधनी व्यक्ति स्वयं उपस्थित नहुँदै निजको नामको लिखत लेखी झुठा सहिछापसहित लिखत तयार गरी अंशियारको हक मास्ने र रत्नदेवी लिम्बुले लाभ पाउने गरी गलत लिखत तयार गरेको आरोपमा भ्रष्टाचार मुद्दा दायर गरेको छ। लेखनदास पोखरेललाई भ्रष्टाचार निवारण ऐन २०५९ को दफा ८ मतियारको रुपमा कैद र जरिवाना गर्न आरोपपत्रमा माग गरिएको छ।
जग्गा धनीलाई ३१ लाख बिगो र कैद माग
अख्तियारले किर्ते गरी जग्गा आफ्नो नाममा जग्गा ल्याउने रत्नदेवी लिम्बुलाई ३१ लाख ४५ हजार बिगो र जरिवानाका साथै कैद सजायको माग दाबी गर्दै भ्रष्टाचार मुद्दा दायर गरेको छ। मृत्यु भइसकेको व्यक्ति रनमाया लिम्बुको नाममा रहेको जग्गा उनको मृत्यु भएपछि गलत कागजात बनाई, झुठा औंठाछाप लगाई पेश गरी लिखत पारित गराई गैरकानूनी कार्यमा संलग्न भएकाले सजाय गर्नुपर्ने माग गरिएको छ।
साक्षीविरुद्ध पनि मुद्दा
मरेको व्यक्तिको जग्गा पास गर्न साक्षी बसेका गोविन्द कोइरालालाई पनि अख्तियारले भ्रष्टाचार मुद्दा दायर गरेको छ। मालपोत कार्यालय सुनसरीको हालैको बकसपत्रको किर्ते औंठाछाप र दस्तखतसमेत गरी पारित लिखतमा साक्षीको रुपमा बसी दस्तखत गर्ने महलमा अर्का लेखनदास कोइरालाले किर्ते दस्तखत गरी झुठा लिखत पारित गर्ने काममा साक्षी बसी मतियारको काम गरेको अख्तियारको आरोप पत्रमा उल्लेख छ। अख्तियारले कोइरालालाई भ्रष्टाचार निवारण ऐनअनुसार मतियारको रुपमा कारबाही हुनुपर्ने माग गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1768395492.png)
