काठमाडौं- सर्वोच्च अदालतले भैरवकुण्ड हाइड्रोपावर लिमिटेडको सम्पत्ति लिलामी प्रक्रिया रोक्न अल्पकालिन अन्तरिम आदेश जारी गरेको छ। आयोजनाका संचालक सूर्यबहादुर थापाले लिलामी प्रक्रिया रोकिपाउँ भन्दै सर्वोच्चमा फागुन १६ गते दायर गरेको मुद्दामाथि आइतबार सुष्मालता माथेमाको एकल इजलाशले अल्पकालिन अन्तरिम आदेश जारी गरेको हो।
आयोजनामा सानिमा बैंक लिमिटेडको अगुवाइमा बैंक अफ काठमाडौं, एनएमबि बैंक, एनआईसी एसिया बैंक र ग्लोबल आइएमई बैंकको लगानी कर्जा लगानी रहेको छ। भैरवकुण्ड हाईड्रोपावरबाट विद्युत् उत्पादन गर्न ४ वटा बैंकबाट सहवित्तीयकरण कर्जा लिएकोमा बैंकलाई समयसमयमा बुझाउनुपर्ने साँवा, व्याज, किस्ताबापतको ४० करोड बढी रकम आयोजनाले बुझाएको छैन।
सिन्धुपाल्चोक जिल्लामा रहेको ३ मेगावाट उत्पादन क्षमताको भैरवकुण्ड हाइड्रोपावर लिमिटेडका २३ जना संचालकविरुद्ध सानिमा बैंक लिमिटेडले गत पुस १६ गते कर्जा भुक्तानी गर्ने ३५ दिने सार्वजनिक सूचना प्रकाशित गरेको थियो। संचालकहरुले उक्त समयमा कर्जा नतिरेपछि बैंकले फागुन ८ गते सम्पत्ति लिलामीको सूचना जारी गरेको थियो। ३५ दिनभित्र कर्जा रकम नबुझाएपछि सानिमा बैंकले नेपाल राष्ट्र बैंकको निर्देशनअनुसार भैरवकुण्ड हाइड्रोपावरलाई कर्जा सुचना केन्द्रको कालो सूचीमा राख्ने तथा कर्जाको सुरक्षणका लागि बैंकमा धितो रहेको परियोजनालगायत अन्य चल/अचल सम्पत्ति बैंक तथा वित्तीय संस्थासम्बन्धी ऐन २०७३ बमोजिम लिलामी प्रक्रिया अगाडि बढाएको जनाएको छ।
भैरवकुण्ड हाइड्रोपावर लिमिटेडका नाममा मालपोत कार्यालय सिन्धुपाल्चोकमा दर्ता रहेको साविक तातोपानी गाविस वडा नंम्बर ४ को कित्ता नंम्बर १९२ को १० रोपनी ५ आना ३ पैसा र कित्ता नंम्बर २०६ को ४ रोपनी ३ आना १ पैसा १ दाम जग्गा धितोका रुपमा राखिएको छ। त्यस्तो त्यो जग्गामा निर्मित ३ मेगावाट जडित क्षमता रहेको भैरवकुण्ड हाइड्रोपावर परियोजना र सोअन्तर्गत रहेका घर, भवन, टहरा, र आयोजनामा जडान भएका मेसिनरी उपकरणलाई समेत धितोका रुपमा राखिएको छ।
यो आयोजनाका लागि ऋण लिँदा काठमाडौं महानगरपालिका वडा नंम्बर २५ मा रहेको सामना मल्टिपल इन्भेस्टमेन्ट प्राली, वडा नंम्बर ३४ मा रहेको एनएमके ग्रुप प्रालि, ललितपुर साविक वडा नंम्बर ९ मा रहेको सुविधा शक्ति इन्भेन्टमेन्ट कम्पनी प्रालि तथा मल्टिपल इन्भेस्टमेन्ट कम्पनी प्रालि र ललितपुर उपमहानगरपालिका वडा नंम्बर ३ मा रहेको लालिगुराँस बहुउेद्देश्यीय सहकारी संस्था लिमिटेड जमानिकर्ता बसेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
