काठमाडौं–नेपाल कम्युनिष्ट पार्टी (नेकपा)को ओलीइतर समूहले राष्ट्रिय सभामा बामदेव गौतमको विकल्प नखोज्ने निस्कर्ष निकालेको छ। नेकपा अध्यक्ष पुष्पकमल दाहाल प्रचण्ड निवासमा पूर्व प्रधानमन्त्री एवं नेकपा नेता माधवकुमार नेपाल, झलनाथ खनाल, उपाध्यक्ष गौतम र प्रवक्ता नारायणकाजी श्रेष्ठ प्रकाशलगायतको छलफलले त्यस्तो निस्कर्ष निकाले हो।
राष्ट्रिय सभामा वर्तमान अर्थमन्त्री युवराज खतिवडालाई फेरि सिफारिस गर्ने प्रधानमन्त्री ओलीको चाहनाविपरीत समूहले यस्तो निष्कर्ष निकालेको हो। प्रधानमन्त्री ओलीले चाहेमा खतिवडालाई ६ महिनाका लागि अर्थमन्त्रीमा निरन्तरता दिने विषयमा भने प्रचण्ड-माधव समूह लचिलो देखिएको छ।
शुक्रवार बिहान भएको गोप्य छलफलमा यस्तो निस्कर्ष निकालिएको हो। छलफलपछि चितवन पुगेका प्रचण्डले बैठकबारे नबोले पनि निस्कर्षका बारेमा संकेत गरेका हुन्। खतिवडालाई राष्ट्रिय सभामा निरन्तरता दिने विकल्पलाई भने उनले सिधै अस्वीकार गरेका छन्। उनले भने, ‘बामदेव गौतमजीलाई राष्ट्रिय सभामा मनोनित गर्न सिफारिस गर्ने सचिवालयले सर्वसम्मत निर्णय गरेको हो। यही आधिकारिक निर्णय हो।’
प्रधानमन्त्री ओलीले मन्त्रिपरिषद्ले गौतमलाई राष्ट्रिय सभा सदस्य सिफारिस नगर्ने कुरा आफूले कल्पना पनि गर्न नसक्ने बताए। प्रधानमन्त्री ओली त्यसमा सहमत नभएको प्रश्नमा उनले जोड दिएरै भने, ‘प्रधानमन्त्रीजीले मान्नुहुन्छ। मान्नैपर्छ।’
खतिवडालाई यो बजेटसम्म निरन्तरता दिने विषयमा भने आफूहरु लचिलो रहेको संकेत उनले गरेका छन्। खतिवडालाई अर्थमन्त्रीबाट हटाउने कुराचाहिँ प्रधानमन्त्रीकै हातमा रहेको उनको भनाइ छ। उनले भने, ‘अर्थमन्त्री बन्न राष्ट्रिय सभामा जानैपर्छ भन्ने छैन। उहाँ ६ महिनाका लागि अर्थमन्त्री बन्न सक्नुहुन्छ।’
उनले पार्टीको वर्तमान विवादलाई बहसका रुपमा लिइदिन आग्रह गरेका छन्। जिवित पार्टीमा बहस र विवाद सामान्य रहेको बताउँदै उनले पार्टी निर्णय मान्ने दोहोर्याए। प्रधानमन्त्रीले पार्टीको निर्णय नमान्ने कुराको कल्पनासम्म नगरेको प्रचण्डको भनाइ छ। उनले भने, ‘उहाँ र मेरो अध्यक्षतामा बसेको बैठकले निर्णय गरेको हो। उक्त सिटमा गौतम नै जानुहुन्छ।’
खतिवडालाई अर्थमन्त्रीबाट हटाउने विषयमा कुनै लबिङ नभएको उनले दाबी गरे। यस विषयमा कसैसँग कुरा नभएको बताउँदै यो कपोलकल्पित आरोप रहेको उनको भनाइ थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
