काठमाडौं– गोष्ठिमा सहभागी हुन अमेरिका पुगेर सम्पर्कविहिन भएकी कालिकोटकाे तिलागुफा नगरपालिकाकी उपमेयर दन्ता नेपाल दर्शनाले आफू लुकेकाे नभई स्वास्थ्यमा गम्भीर समस्या आएका कारण उपचाररत रहेको दाबी गरेकी छन्।
उपमेयर अमेरिकामा सम्पर्कविहिन भएको समाचार सार्वजनिक भएपछि निस्कृय बनाएको आफ्नो फेसबुक अकाउन्ट सक्रिय गराउँदै उनले स्वास्थ्य समस्याका कारण अमेरिकामा बसेको र भारतीय मुलका चिकित्सकले आफ्नो उपचार गरिरहेको दाबी गरेकी हुन्। उनले आफ्नो उपचार अझै पाँच महिना जारी रहने र त्यसपछि स्वदेश फर्कने बताएकी छन्।
उनको फेसबुक स्टाटसको सम्पादित अंश :
सम्पूर्ण सुभचिन्तकहरुमा नमस्कार!
ओरालो लागेको मृगलाई सबैले खेद्छ्न् भन्थे हो रहेछ। आज आएर बुझ्दै छु। म हराएको पनि छैन। म कतै लुकेको पनि छैन। म मेयर रतन शाहीलाई जानकारी नदिएर पनि आएको होइन। उहाँले नै भ्रमण स्वीकृत गरेर आएको हो। अमेरीकाबाट बारबार फोन गर्दा, कार्यालयमा मेयरलाई सम्पर्क गर्दा उहाँको फोन कहिले पनि उठेन र प्रमुख प्रशासकीय अधिकृत उद्धव रिजालजीसँग पनि कुरो भएको हो।
वार्ड अध्यक्षहरुसँग पनि कुरो भएको हो। कतैबाट केही प्रतिक्रिया आएन। सहयोग त झन् कुरै भएन। अमेरिका आउँदाको प्लेन टिकट पनि नगरले पैसा हालेको नभएर मैले पनि बारबार माग्ने जस्तो कति चोटि कल गर्नु। मेयरलाई मेरो के मतलब र याद हुने कुरो पनि भएन र बारबार भीख मागिनँ।
मैले सोचेँ म बरु मर्छु, तर सरकारी पैसामा उपचार गर्दिनँ, माग्दिन पनि किन कि मलाई मेरो प्लेन टिकटको पैसा त मेरो दाजुहरु पार्वत जी नेपाली, कालीप्रसाद पाण्डे दाजु र सुनिता पाण्डेले हाल्नुभएको हो। त्यसैले मागिनँ। सपछि मैले सरकारको सुक्का पैसा पनि मलाई चाहिएन कसैले दिए पनि भनेको हो।
अहिले म राम्रोसँग बोल्न पनि सक्दिन। अलि-अलि चल्न सक्ने भएको छु। यसको सबै उपचार भारतकी डा. अञ्जीरकुमारले गर्दै हुनुहुन्छ। म पूर्णरुपमा निको हुन अझै समय लाग्छ। ५ महिना लाग्ने भनेको छ। मान्छेको शरीर न हो कहिले कहाँ के हुन्छ कसैलाई पत्तै नहुने रहेछ। जसरी भए पनि बाच्नै पर्ने देशमा रोगी नेताले सबै पैसा सिध्याए पनि हामीले नै भन्ने फेरि मलाई उपचार गर भन्न पनि मेरो नैतिकले दिएन।
त्सैले मैले सहयोग मागिनँ। गल्ती गरे माफ माउँ। मेरो स्वास्थभन्दा ठूलो केही छैन। कृपया मलाई बाच्न दिनुहोस्। म बाँचे त अरुको सेवा गर्न सक्छु। यदि म नै राम्रो भएन भने? म दुनियाँकै शक्तिशाली भए पनि केही छैन मलाई। मलाई जिम्मेवारीका बारेमा राम्रोसँग थाहा छ, यति कुरा बुझेकी छु जस्तो लाग्छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।