राँची- यो समयमा टाटा कम्पनीको कूल नाफा १० अर्ब (१०० विलियन) डलरभन्दा धेरै छ। यसका संस्थापक जमशेदजी टाटाको नाममा सन् १९१९ मा तत्कालीन विहारमा जमशेदपुर नामको सहर नै बसाइएको थियो। टाटा कम्पनीकै मालिकको नाममा राखिएको यो सहरमा गत मंगलबार एक महिलाले भोकबाट बचाउन आफ्नो २० दिनको बच्चा बिक्री गरेको घटना सार्वजनिक भएको छ।
झारखण्डको यो सहरमा एक आमाले आफ्नो बच्चालाई दुई हजार रुपैयाँमा बिक्री गरेकी हुन्। यसकाे कारण हो भोक र जाडोबाट बच्न उनीसँग पैसा छैन र भविष्यमा हुने आश पनि छैन।
दैनिक भिख मागेर गुजारा गर्दै आएकी ती महिलाले आफ्नो बच्चा बिक्री नगर्ने हो भने भोक र जाडोकै कारणले आफ्नो मृत्यु हुने निश्चित रहेकाे बताइन्। टाटानगर स्टेशनबाहिर चाइबासा स्टान्डमा स्कुटी चढेर तीन मानिस उक्त बच्चा किन्न आएका थिए।
तिनीहरू युवक, युवती र एक वृद्धा थिए। आरक्षण केन्द्रको पछाडि बसेकी एक महिला जो सफाइ कर्मचारीको ड्रेसमा थिइन्‚ उनले वृद्ध महिलालाई झोलाबाट निकालेर स्वीटर दिइन्। त्याे खरिद गरिएको बच्चालाई लगाइदिइन्।
बच्चाको आमाको हातमा केही पैसा राख्दै उनीहरुले बच्चालाई स्कुटरमा राखेर लगे। भीख माग्ने ती महिलाको तीन वर्षकी छोरी पनि छिन्। आमा छोरी दुवै सडकमा बसेर भिख माग्ने गर्छन्। बच्चा बेचेको सूचना पाएर रेलकर्मीले उनलाई यसबारे सोधपुछ गरेका थिए। उनले यदि आफ्नो बच्चा नबेचे भोक र ठण्डीले सबै परिवार नै मर्ने दाबी गरेकी थिइन्।
यो कुरा सञ्चार माध्यममा आएपछि झारखण्डका मुख्यमन्त्री हेमन्त सोरेनले यस विषयलाई अनुसन्धान गर्न निर्देशन दिएका छन्। उनले सामाजिक सञ्जाल ट्वीटरमा लेख्दै घटनाको बारेमा अध्ययन गर्न आफूले निर्देशन दिएको बताए। जमशेदपुर रेल डिएसपी नूर मुस्तफाले बच्चा २० दिनको भएको बताए। महिलाले आफ्नो बच्चा स्टेशन सफाइकर्मी बिकी मुखीलाई दिएको पाइएको छ।
बिकीले आफ्नो सालीको बच्चा नभएकाले उनलाई पाल्ने गरी लिएकी हुन्। यो घटना सार्वजनिक भएर जब अनुसन्धान सुरु भयो तब उनले उक्त बच्चा फिर्ता दिइन्। भिख मागिरहेकी महिला अहिले एक्लै छन्। श्रीमानले उनलाई छाडिसकेका छन्। उनका श्रीमान अहिले मुम्बइमा बस्ने गर्दछन्।
यस्तो अवस्थामा उनले रेल स्टेशनमा भिख माग्दै त्यहीं सुतेर रात कटाउने गरेकी छन्। रेल प्रहरीले बच्चालाई लोकल थाना बागबेडामा सुम्पिएको छ।
यसरी बच्चा किन बिक्री गरेको भनी सोधेको प्रश्नमा ती महिलाले बच्चा, आफू र आफ्नी अर्की छोरीलाई जिउँदो राख्न आफूले यस्तो कदम चालेको बताइन्।
‘म र छोरी बाँच्नका लागि त भिख मागिरहेका छौं‚ ’ उनले भनिन्‚ ‘ उसलाई मसँग राखेर कहाँबाट खुवाउनु? यस्तोमा उसलाई बचाउन मैले अरु कसैको जिम्मा लगाउने निर्णय गरेकी हुँ।’ माया लागेर आफूसँग राखेर उसको ज्यान जानुभन्दा अरुलाई बेच्ने निर्णय गरेको उनले बताइन्।
यो घटना सार्वजनिक भएपछि सरकारले यो परिवारलाई प्रत्येक महिना २-२ हजार दिने निर्णय गरेको छ। भिखारी महिला र उनका दुवै बच्चाको अवस्था खराब रहेकाले हाल उनीहरूको सदर अस्पतालमा भर्ना गरेर उपचार भइरहेको छ। अस्पतालबाट डिस्चार्ज भएपछि उनीहरुलाई शेल्टर होममा पठाइने स्थानीय सरकारले जनाएको छ।
जाडो र भोकका कारण आफ्नो बच्चा अर्काको हातमा सुम्पन बाध्य भएको उनको भनाइ थियो।
आफ्नो छोराको र परिवारको बाँकी जीवनलाई ध्यानमा राखेर आफूले सो निर्णय गरेको उनले बताएकी थिइन्।
२०१८ मा लोकसभामा केन्द्रीय मन्त्री भएका थावरचन्द गहलोतले गराएको जानकारीअनुसार झारखण्डमा १० हजार ८ सय १९ भिखारी छन्। यसमा ५ हजार ५ सय २२ पुरुष र ५ हजार २ सय ९७ महिला छन्।
भारतभर कुल ४ लाख १३ हजार ६ सय ७० भिखारी छन्। जसमा २ लाख २१ हजार ६ सय ७३ पुरुष र १ लाख ९१ ह्जार ९ सय ९७ महिला छन्। पछिल्लो सरकारको कार्यकालमा २२ जना खान नपाएर मरेका छन्। २०१७ मा सिमडेगामा सन्तोषीकुमारी नामकी एक महिला भात भात भनेर चिच्च्याउँदै मरेकी थिइन्। वर्तमान मुख्यमन्त्रीले यो घटनालाई चुनावी नारा नै बनाएका थिए। तर केन्द्र सरकारले हालसम्म एकजना पनि भोकले नमरेको दाबी गर्दै आएको छ।
हिन्दी पत्रिका द प्रिन्टबाट भावानुवाद
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791537260-1791790325.jpeg)
-1786602170.png)
