प्यूठान- जिल्लाको मल्लरानी गाउँपालिका–३ चौरपानीका ६६ वर्षीय खोडस गिरीलाई आफ्नै श्रीमतीको हत्या अभियोगमा प्रहरीले पक्राउ गरेको छ।
५८ वर्षीया लोकादेवी गिरीको हत्या आरोपमा उनकै पति खोडस मंगलबार उनलाई पक्राउ गरेको हो। हत्या गरेको आशंकामा मृतकका पतिलाई खोडसलाई नियन्त्रणमा लिएर अनुसन्धान थालेको जिल्ला प्रहरी कार्यालय प्यूठानका प्रहरी निरीक्षक लोकेन्द्र जीसीले गिरीलाई बताए।
आइतबार गाउँमा बसेको गरिबी निवारण कोष समूहको मासिक बैठकमा लोकादेवी उपस्थित नभएपछि स्थानीयले महिलाको सोधीखोजी थालेका थिए। १२ दिन अघिदेखि सम्पर्कविहीन गिरीको शवलाई आफन्त र स्थानीयले आफ्नो घरदेखि अन्दाजी १५० मिटरको दूरीमा रहेको डट्टाकुरा खर्यानमा गाडेर खरको मुठाले ढाकेको अवस्थामा फेला पारेका थिए।
'लोकादेवीलाई खर्यानमा गाडेजस्तो देखेपछि प्रहरीलाई खबर गर्यौं,' स्थानीय माधव पौडेलले भने, ‘प्रहरी आएपछि गाडेको शव निकालियो।’
लोकादेवीलाई हत्या गरी अनुहारै नदेखिने गरी गाडेको अवस्थामा शव फेला परेको प्रहरी निरीक्षक जिसीले बताए। मृतक लोकादेवीका तीन छोरा र दुई छोरी छन्।
घटनाको भित्री पाटो
प्यूठान जिल्लाको मल्लरानी गाउँपालिका-३ चौरपानीमा वृद्ध गिरी दम्पती बस्दै आएका थिए। उमेर बढ्दै जाँदा सबै छोराछोरीहरू कामको शिलशिलामा घर बाहिर बस्दथे। स्थानीयहरूका अनुसार गिरी दम्पतीको बेलाबेलामा घरायसी झगडा भई रहन्थ्यो। झगडाले विकराल रूप लिँदा खोडसले लोकादेवीको हत्या गर्न पुगे।
६६ वर्षीय खोडस र ५८ वर्षिया लोकादेवी पछिल्लो ३ वर्षदेखि श्रीमान र श्रीमतीले छुट्टाछुट्टै भान्सा गर्दै आएका थिए। घरमा खासै मेल थिएन। श्रीमती बस्ने घरमा बिजुलीको सुविधा थिएन। श्रीमानले त्यहाँ बिजुली बाल्न दिएका थिएनन्। तर गाउँलेहरुले सहयोग जुटाएर त्यो घरमा बिजुली बालिदिएका थिए।छुट्टाछुट्टै बस्दै आएका उनीहरू खाना भने श्रीमती बस्ने गरेकै स्थानमा खाने गर्थे। श्रीमान् र श्रीमतीले एकै समयमा खाना भने खाँदैनथे।
२०७६ पौष ९ गते रातीको श्रीमतीले खाना पकाएर खाएर सुतेकी थिइन्। त्यसपछि श्रीमानले पकाएर खाने पालो थियो। झगडा साम्य भइसकेको थिएन। बिजुली बालेर भात पकाएर खाने क्रममा श्रीमानश्रीमतीबीच पछिल्लो पटक झगडा भयो। श्रीमतीसँग बिजुली प्रयोगका विषयमा पछिल्लोपटक विवाद भएको खोडसले स्वीकार गरेका छन्।
श्रीमानले श्रीमतीलाई झम्टिए। धकेलेर भर्याङमा पुर्याए। अनि घरेलु औजार प्रयोग गरी हत्या नै गरेको हुन सक्ने प्रहरीले बताएको छ। हत्यामा प्रयोग भएका घरेलु औजार समेत फेला परिसकेको बताइएको छ।
तर आफूले घरेलु हतियार प्रयोग गरी हत्या नगरेको बताउँदै धकेल्ने क्रममा भर्याङमा ठोक्किदा टाउकोमा चोट लागेर रक्ताम्य भएको र केही समयपछि मृत्यु भएको स्वीकारेका छन्।
जब श्रीमतीको मृत्यु भयो त्यसपछि श्रीमानले घर नजिकैको खर्यानमा खाडल खनी पुरेका थिए। उनले पुरेको १२ दिनपछि श्रीमतीलाई खाडलमा पुरेको मृत अवस्थामा स्थानीयले फेला पारेका हुन्।
गाउँमा गरिबी निवारण कोषको हरेक महिनामा बैठक बस्ने गर्दथ्यो। बैठकमा अनुपस्थित भएपछि महिला समूहले खानतलासी सुरु गरेका थिए। अनि घर नजिकैको खर्यानमा खाडलमा पुरेको अवस्थामा स्थानीयले भेटाएका हुन्। त्यसपछि प्रहरीलाई खबर गरेका थिए। घटनाका सम्बन्धमा थप अनुसन्धान भइरहेको प्रहरीले जानकारी दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
