इन्डोनेसिया- इन्डोनेसियाको उत्तरपश्चिमी क्षेत्रमा मङ्गलबार ६.२ म्याग्नीच्युडको भूकम्प आएको छ।
शक्तिशाली भूकम्प आएपनि कुनै क्षतिको विवरण भने प्राप्त भइनसकेको र सुनामी चेतावनीको कुनै सूचना जारी नगरिएको अधिकारीहरुले जनाएका छन्।
अमेरिकी भूगर्भ विभागका अनुसार सुमात्रादेखि पश्चिमतर्फ पर्ने सिमेउलु टापुमा केन्द्रबिन्दु भएर भूकम्प आएको हो।
इन्डोनेसियाली मौसम तथा भूभौतिक विभागले पनि सुनामीको चेतावनी नरहेको स्पष्ट पारेको समाचारमा जनाइएको छ।
भूकम्पपछि स्थानीय बासिन्दा त्रसित भएका छन् भने भूकम्पको झट्का महसूस गर्ने बित्तिकै स्थानीयबासी घरबाहिर दौडिएका थिए।
‘हामीले अहिले सामुद्रिक किनाराको अवलोकन गरिरहेका छौं, सामुद्रिक पानीको चाल कस्तो छ भन्ने हेरिरहेका छौं,’ एक स्थानीयबासीले बताए। कुनै मानवीय क्षति र भौतिक संरचना क्षतिको विवरण अहिलेसम्म प्राप्त नभएको अधिकारीहरुले जनाएका छन्।
इन्डोनेसियामा यस्ता भूकम्प, ज्वालामुखी र आँधी बेला बेलामा आइरहने गरेको छ। यसअघि सन् २०१८ मा सुलावेसी टापूमा आएको ७.५ म्याग्नीच्युडको भूकम्प र सुनामीका कारण २२ सयभन्दा बढीको मृत्यु भएको थियो भने एक हजारभन्दा बढी बेपत्ता भएको घोषणा गरिएको थियो। -रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791796975.png)
-1786602170.png)
