एजेन्सी– बेलायतमा १५९ वटा यौन अपराधमा संलग्न भएका एक व्यक्तिको पहिचान प्रहरीले सार्वजनिक गरेको छ। १५९ मध्ये १३६ वटा बलात्कारमा संलग्न भएका इन्डोनेसियाका रिनहार्ड सनागालाई सार्वजनिक गरिएको हो।
यसअघि नै २ मुद्दामा दोषी ठहरिएपछि सनागा आजीवन जेल सजाय काटिरहेको छ। उनलाई १३६ वटा बलात्कार, ८ वटा बलात्कारको प्रयास र १४ अन्य अपराधको मुद्दामा दोषी ठहर गरिएको छ।
सनागाले १९० जना मानिसलाई निशाना बनाएको प्रमाण पाइएको प्रहरीको दाबी छ।
प्रहरीका अनुसार बेलायतको न्यायिक इतिहासमा सनागा सम्भवतः सबैभन्दा खतरनाक बलात्कारी हुन्। सोमबार अदालतको सुनुवाइका क्रममा न्यायाधीश सुजैन गोडार्डले सनागालाई रिहा गर्नु खतरनाक हुने बताउँदै उनलाई आजीवन जेल सजायको फैसला सुनाएका थिए। कम्तीमा पनि उनलाई ३० वर्ष जेलमा राख्न न्यायाधीशको आदेश छ।
सनागा नाइट क्लब र बारबाहिर बसेर त्यहाँबाट निस्कने पुरुषलाई कुर्ने गर्थे। त्यसपछि रक्सी खुवाउने वा ट्याक्सी बोलाइदिने लोभ देखाउँदै आफ्नो फ्ल्याटमा लैजान्थे।
बलात्कारअघि उनले बेहोस बनाउने औषधि दिने गरेको बताइएको छ। अधिकांश पीडित बिउँझेपछि आफूलाई के भयो भनेर थाहै पाउँदैनथे।
पक्राउ पर्नुअघि सनागा युनिभर्सिटी अफ लिड्समा पिएचडीका विद्यार्थी थिए र कैयौं वर्षदेखि पुरुष बलात्कारमा उनको संलग्नता देखिएको थियो।
उनले शिकार बनाएका एक व्यक्ति बलात्कारका क्रममा होसमा आएपछि प्रहरी बोलाएका थिए र सनागालाई जुन २०१७ मा पक्राउ गरिएको थियो।
प्रहरीले उनको मोबाइल फोन अनुसन्धान गर्दा चकित पर्यो, जहाँ उसले बलात्कारका क्रममा बनाएका सयौं घन्टाको भिडियो थिए।
यही भिडियो बेलायतको इतिहासमा बलात्कारको सबैभन्दा ठूलो अनुसन्धानको प्रमाण बन्यो।
प्रहरीका अनुसार सनागाले पीडितलाई बेहोस बनाउन निकै खतरनाक प्रतिबन्धित लागूऔषधको प्रयोग गर्यो।
बेलायती गृहमन्त्री प्रिति पटेलले यस्ता लागूऔषधको प्रयोग गरिनु निकै चिन्ताजनक भएको बताएकी छन्।
सनागाले भने आफू निर्दोष भएको दाबी गर्दै सबै पुरुषले सहमतिमै सम्बन्ध बनाएको बताएको छ।
सनागाबाट पीडित कैयौं पुरुषहरुको म्यानचेस्टरस्थित सेन्ट मेरी सेक्सुअल एसल्ट रेफरल सेन्टरमा काउन्सिलिङ भइरहेको छ।
-बीबीसीबाट
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791796975.png)
-1786602170.png)
