डडेल्धुरा–अजयमेरु गाउँपालिकाले अढाइ वर्षमा गरेका कामको विवरण सार्वजनिक गरेको छ। सोमबार जिल्ला सदरमुकाममा पत्रकार सम्मेलन गरि गाउँपालिकाले २०७४ असार १९ देखि २०७६ पुस १९ गतेसम्म गरेका काम सार्वजनिक गरेको हो।
हालसम्म ५ वटा गाउँसभा तथा ७८ वटा कार्यपालिका बैठक सम्पन्न भएको गाउँपालिकाले जनाएको छ। कार्यपालिका तथा गाउँसभाबाट ६५० भन्दा बढी निर्णय तथा ५२ वटा ऐन, कानुन, कार्यविधि, तथा नियमावली पारित भइ कार्यान्वयनमा रहेको गाउँपालिकाले जनाएको छ।
गाउँपालिकाले ढिमला–भद्रपुर सडक (विनय मार्ग) विस्तार सम्पन्न गरेको छ। अनारखोली– वझकोटखतेडा सडक ट्रयाक खोल्ने काम सम्पन्न भइ खतेडा पहिलोपटक सडक सञ्जालले जोडिएको छ। अनारखोली–देवल (पंकज मार्ग)को सडक जोडिएको तथा सुचारु भएको गाउँपालिकाले जनाएको छ। डडेल्धुरादेखि अजयमेरुकोट हुँदै भद्रपुर सडक जोडिएको गाउँपालिका अध्यक्ष उमेशप्रसाद भट्टले जानकारी दिए।
‘अधिकांश गाउँ, टोल सडक सञ्जालले जोडिसकेका छांै भने बाँकी सबै सडक आगामी आर्थिक वर्षमा जोड्ने लक्ष्य लिएका छौँ,’ उनले भने, ‘मालझुल–देवल सडक सुचारु गरिएको छ।’
दुई दशकदेखि प्रतिक्षारत अजयमेरु गाउँपालिकाका सबै वडा जोड्ने उग्रतारा–मेलौली सडक कालोपत्रेका लागि अथक प्रयास पश्चात संघीय सरकारको समपुरक अनुदान स्वीकृत गराउन सफल भएको उनले बताए।
६५ घरधुरीमा व्यवसायीक तरकारी खेती तालिम सम्पन्न भई ४ सय १२ जनसंख्या लाभान्वित भएको गाउँपालिकाले जनाएको छ। जनतालाई गाउँपालिका केन्द्रमा सहज पहुँचका लागि २ वटा जिप खरिद गरि सञ्चालनमा ल्याएको समेत गाउँपालिका अध्यक्ष भट्टले बताए।
‘शिक्षा क्षेत्रमा आवश्यक सुधार तथा प्रभावकारी बनाउन सम्पूर्ण वडामा विद्यालयको नियमित अनुगमन गर्ने गरेका छौँ,’ उनले भने, ‘गाउँपालिका स्तरमा शिक्षा क्षेत्रमा एकरूपताका लागि गाउँपालिकाको अजयमेरु गाउँपालिका नामक छुट्टै शैक्षिक क्यालेण्डर प्रकाशनमा ल्याएका छौँ।’
आवश्यक पूर्वाधार, विद्यार्थी संख्याका आधारमा २ वटा प्राविलाई माविमा मर्जसमेत गरिएको गाउँपालिकाले जनाएको छ। गाउँपालिकाअन्तर्गतका विभिन्न विद्यालयमा शिक्षक दरबन्दी रिक्त रहेको अवस्थालाई मध्यनजर गर्दै गाउँपालिकाले २८ जना स्वयंसेवक शिक्षक भर्ना गरेको छ।
शिक्षा क्षेत्रमा समयपालनाका निमित्त सम्पूर्ण अधारभूत विद्यालयमा ई–हाजिर जडान र भद्रपुर माविमा सिसिटिभी जडान गरिएको जनाइएको छ। विद्यार्थी लाई आफ्नो स्थानीय तहबारे जानकारी गराउने उद्देश्यले कक्षा १ देखि ५ सम्म ‘हाम्रो अजयमेरु’ नामक स्थानीय पाठ्यक्रम निर्माण तथा निःशुल्क वितरण गरी पठनपाठनसमेत भइरहेको गाउँपालिका अध्यक्ष भट्टले बताए।
नमूना कृषि कार्यक्रमअन्तर्गत गाउँपालिकाभित्र २ वटा तरकारी पकेट, २ वटा माहुरी पकेट र १ मसला पकेट क्षेत्र निर्माण गरी कार्यक्रम अगाडि बढाएको छ। साथै गाउँपालिकाले २ वटा बाख्रा स्रोत केन्द्र र २ वटा भैसी स्रोत केन्द्रको स्थापना गरेको छ।
अढाइ वर्षको अवधिमा गाउँपालिकाले गाउँपालिकाका विभिन्न स्थानहरूमा विभिन्न समयमा ५ पटक पशु स्वास्थ्य सेवा घुम्ती शिविर सञ्चालन, गाउँपालिकाका विभिन्न स्थानमा ६ वटा डाले घाँस नर्सरी स्थापना गरेको छ। यस्तै भैंसीलाई सुत्केरी भत्तासमेत वितरण गरिएको गाउँपालिकाले जनाएको छ।
युवालक्षित स्वरोजगार बाख्रापालन कार्यकम्रबाट हालसम्म एक हजार युवा व्यवसायीलाई आधुनिक खोर निर्माण गराइ व्यवसायीक बाख्रापालनमा सहयोग गरेकोसमेत गाउँपालिकाका प्रमुख प्रशासकीय अधिकृत खेमराज पौडेलले जानकारी दिए।
‘साविकका सम्पूर्ण स्वास्थ्य चौकीहरूमा ल्याव सेवा सञ्चालनमा ल्याइएको छ,’ उनले भने, ‘स्वास्थ्य चौकीको पहुँचबाट टाढा रहेका २ स्थानमा सामुदायिक स्वास्थ्य एकाइ थप भइ सञ्चालनमा ल्याएको छ र थप २ स्थानमा यही महिनाभित्र सञ्चालनमा ल्याउने तयारी भइरहेको छ।’
‘अजयमेरु गाउँपालिकाको सान, स्वास्थ्य र समृद्ध गाउँपालिका हाम्रो अभियान’ भन्ने नाराअन्तर्गत स्वास्थ्य संस्थामा आउने बिरामीको नङ काटिदिने र हात धोइदिने कार्यको थालनी गरिएको गाउँपालिका उपाध्यक्ष कलावती भाणले जानकारी दिइन्।
युवा लक्षित कार्यक्रमबाट युवालाई हाउसवायरिङ्ग, बासका सामान बनाउने तालिम, गलैंचा बुन्ने तालिक जस्ता सीप विकासका तालिम सञ्चालन गरिएकोसमेत उनले बताइन्।
गाउँपालिकाको पहलमा गाउँपालिका केन्द्रमा बैंक, प्रहरी चौकी, नेपाल टेलिकमको टावर, वन कार्यलय स्थापना भएका छन्। खानेपानीको चरम समस्यामा रहेका बस्तीमा खानेपानीको विस्तार गर्न गरिएकोसमेत गाउँपालिकाले जनाएको छ। अजयमेरु कोटलाई नेपालको पर्यटकीय गन्तव्यमा समावेश गर्न सफल भएको गाउँपालिकाको दाबी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1765528419.png)
-1764146706.png)
-1763721444.png)
-1765273665.jpg)
