कटारी– उदयपुरको कटारी नगरपालिकामा २ वर्षअघि भएको युवती हत्यामा उनकै श्रीमान र परिवार संलग्न भएको खुलासा भएको छ। कटारी नगरपालिका ४ सिम्लेमा उदयपुरगढी ५ बाहुनीटारकी १७ वर्षीया संगीता विश्वकर्मालाई उनकै श्रीमान युवराज कार्की, ससुरा नैनबहादुर कार्की र देवर सुजन कार्कीले हत्या गरेको खुलेको हो।
२०७४ कात्तिक १४ गते सिम्लेस्थित जंगलमा सडेको अवस्थामा रुखमा झुण्डिएको शव फेला परेको थियो। सो घटनाको लामो अनुसन्धानपश्चात प्रहरीले गत मंसिर २२ मा देवर सुजन कार्कीलाई पक्राउ गरेको ईलाका प्रहरी कार्यालय कटारीका प्रमुख डिएसपी प्रेमसागर केसीले बताए। कटारीबाटै सुजनलाई नियन्त्रणमा लिएर गरिएको अनुसन्धानपश्चात बुवा नैनबहादुर र दाजु मृतकका श्रीमान युवराज कार्कीलाई काठमाडौंको कपनबाट मंसिर २३ गते नियन्त्रणमा लिईएको थियो।
‘सुजनलाई पक्राउ गरेपछि अन्य दुईजना काठमाडौंमा रहेका खुल्नासाथ पक्राउ गर्न सफल भयौं,’ डिएसपी केसीले भने, ‘‘फरार तीनैजना पक्राउ गर्न नियमित अनुसन्धान गरिरहेका थियौं।’ त्यसक्रममा युवराजले विवाह गरी ल्याएकी संगीता दलित रहेको थाहा पाएपछि परिवार नै मिलेर हत्या गरेको खुलेको पनि प्रहरीले जनाएको छ।
फोन सम्पर्कबाट आपसमा सम्बन्ध जोडेका युवराज र संंगीताले भागीविवाह गरी संगीता कार्कीको घरमा आएको पनि अनुसन्धानबाट खुलेको छ। घटनाबारे थप अनुसन्धान भईरहेको जनाउँदै डिएसपी केसीले आईतबार पुर्पक्षका लागि जिल्ला अदालतमा पेश गरिएको पनि जानकारी दिए । जिल्ला अदालतले आईतबार नै पुर्पक्षका लागि थुनामा राख्न आदेश दिएको प्रहरीले जनाएको छ।
२ वर्षअघि नै मृतकका परिवारले प्रहरीमा जाहेरी दिएका थिए। घटनाबारे प्रहरीले २ वर्ष लामो अनुसन्धानपछि हत्या भएको निष्कर्षका साथ उनीहरुलाई नियन्त्रणमा लिएको हो।
घटना भएको समयमा प्रहरी कार्यालय कटारीका प्रमुख डिएसपी महेन्द्रकुमार श्रेष्ठ थिए। त्यसपछि डिएसपी मेघराज अधिकारी र ध्रुव श्रेष्ठले ईलाका प्रहरी कार्यालय कटारीको जिम्मेवारी सम्हालेका थिए। हालका कार्यालय प्रमुख डिएसपी प्रेमसागर केसीले नियमित अनुसन्धानपछि उनीहरुलाई पक्राउ गर्न सफल भएका हुन्।
घटनापश्चात् भारतको दार्जिलिङ पुगेका उनीहरु त्यसपछि नेपाल आएका थिए। सुराकीका आधारमा सुजन कार्की फेला परेपछि नैनबहादुर र युवराज काठमाडौंबाट पक्राउ परेका थिए। पक्राउ गर्नका लागि ईलाका प्रहरी कार्यालय कटारीबाटै प्रहरी खटाईएको थियो। डिएसपी केसीले ९ महिनाअघि कटारीको जिम्मेवारी सम्हालेका थिए। ‘परिचय कार्यक्रममै यो घटना रहस्यमय रहेको गुनासो आएपछि गम्भीर रुपमा अनुसन्धानमा लागेका थियौं,’ डिएसपी केसीले भने, ‘अन्ततः अनुसन्धानको केही समयपछि पक्राउ गर्न सपmल भयौं।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1765528419.png)
-1764146706.png)
-1763721444.png)
-1765273665.jpg)
