इटहरी– इटहरी उपमहानगरपालिकाका वरिष्ठ इन्जिनियर अर्जुन दाहालले राजीनामा दिएका छन् । उपप्रमुखले काम गर्न नदिएको भन्दै उनले राजीनामा बुझाएका हुन्। उपमेयर लक्ष्मी गौतमले आफुलाई बारम्बार फोन र म्यासेजमा धम्की दिएकाले आफूले काम गर्न सक्ने अवस्था नभएको भन्दै राजीनामा दिएको उनले बताएका छन्।
उपमेयर गौतमले आफूले मुद्धा हाल्नै लाग्दा अरु कसैले अगाडि नै हालेको भन्दै धम्की दिएको दाहालले राजीनामा पत्रमा उल्लेख गरेका छन्। उपप्रमुखले आफ्नो कार्यसम्पादनको बिषयमा बारम्बार असन्तुष्टि राखेको र जति सम्झाउँदा पनि नभएकाले राजीनामा दिन बाध्य भएको उनको भनाइ छ।
केही समयअगाडि इटहरीको भाटभटेनीको भवनमा कानुनलाई छल्दै इन्जिनियरले निर्माण अनुमति दिएको विषय बाहिर आएको थियो। इटहरीको भवन ऐन २०७५ को दफा २४ मा उपमेयर संयोजक भएको निरीक्षण समितिमा प्रमुख प्रशासकीय अधिकृतलगायत स्ट्रक्चर इन्जिनियरसमेत हुन्छन्।
तर भाटभटेनी निर्माण नक्सा पासको सिफारिस दिने समितिका संयोजक अर्थात् उपप्रमुख लक्ष्मी गौतमलाई थाहै नदिइ भाटभटेनीलाई नक्सा अनुमति दिएको आरोप उनलाई लागेको थियो। इजाजत दिँदा सम्बन्धित १६ नम्बर वडाका अध्यक्षलाई संयोजक बनाएर भाटभटेनीलाई इजाजत दिएको थियो । तर भवन निर्माणसम्बन्धी ऐनले भने उपप्रमुखबाहेक अन्यले सो समितिको संयोजक बन्न पाउने प्रावधान नै राखेको छैन।
बाटोमै निर्माण सामग्री राखेर काम गर्दा जनताको गुनासो आएपछि उपप्रमुख गौतमले भाटभटेनीको फायल मगाएपछि निर्माण अनुमति दिएको थाहा पाएको बताउँदै आएकी छिन् । आफ्नो अनुपस्थितिमा बिना अधिकार पास गरेको नक्सा अहिले गौतमले नै राखेकी छिन्। नियमविपरीत भएको बैठकमा उपमहानगरपालिकाका वरिष्ठ इन्जिनियर अर्जुन दाहालको सकृयतामा भाटभटेनीलाई इजाजत दिँदा १६ नम्बर वडाध्यक्ष दीपनारायण चौधरी, निमित्त प्रमुख प्रशासकीय अधिकृत अम्बिकाकुमारी शाहको हस्ताक्षर थियो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
