एजेन्सी– सन् २०१९ मा विश्वले कैयौँ चर्चित व्यक्तित्वलाई गुमाएको छ। राष्ट्र तथा सरकार पूर्व प्रमुखदेखि चर्चित कलाकार तथा लेखकहरुको २०१९ मा निधन भएको छ। कसैको निधन अदालतमा बयान दिदाँदिदै भएको छ भने कसैले स्टेजमा प्रस्तुति दिइरहेका बेला ज्यान गएको छ। सन् २०१९ मा अस्ताएका विश्वका केही व्यक्तिलाई यहाँ स्मरण गरिएको छ:
१. बलिउड अभिनेता कादर खानको निधन
बलिउड अभिनेता कादर खानको सन् २०१९ कै पहिलो दिन जनवरी १ मा ८१ वर्षको उमेरमा निधन भयो। क्यानडाको एक अस्पतालमा उपचार गराइरहेका खानको निधन भएको थियो। दुई दिनअघि नै उनको निधन भएको हल्ला फैलिएको थियो। त्यो हल्लाको परिवारजनले खण्डन गरे पनि हल्ला नै सत्य सावित हुन पुगेको जानकारी पछि आयो। अफगानिस्तानमा जन्मिएर भारतीय सिने क्षेत्रमा चर्चित खान भारतीय साहित्यमा अब्बल लेखक र हाँस्यविधामा जमेका कलाकार थिए।
२. संसारकै ज्येष्ठ पुरुषको बिदाइ
‘गिनिज बुक अफ वल्र्ड रेकर्ड’ का अनुसार विश्वकै सबैभन्दा ज्येष्ठ पुरुष मानिएका जापानी नागरिक मसाजो नोनाकाको ११३ वर्षको उमेरमा सन् २०१९ जनवरी २० मा निधन भयो। उनको जन्म सन् १९०५ मा भएको थियो। सन् २०१८ मा उनलाई स्पेनका नागरिक फ्रान्सीस्को नुनेज ओलिभेराको निधन भएपछि जीवित पुरुषमध्ये संसारकै सबैभन्दा जेठो व्यक्ति घोषणा गरिएको थियो।
३. अष्ट्रेलियाली पूर्व प्रधानमन्त्री बवको निधन
लेबर पार्टीका प्रभावशाली नेता एवं) सन् १९८३ देखि १९९१ सम्म अष्ट्रेलियाको प्रधानमन्त्री बनेका बव हकको पनि २०१९ मै ८९ वर्षको उमेरमा निधन भयो। आफ्नो ८ वर्षे कार्यकालमा चिकित्सकीय सेवा र राजनीतिक रुपान्तरणको नमूना स्थापित गरेका बवको सन् २०१९ को मे १६ मा निधन भएको हो। बव नेतृत्वको सरकारले अष्ट्रेलियाको अर्थतन्त्रलाई आधुनिकीकीरण गर्दै आर्थिक स्वतन्त्रता र रोजगारीमा वृद्धि गराएको थियो।
४. मलेसियाका सातौँ राजाको निधन
.jpg)
मलेसियाका सातौँ राजा तथा प्रसिद्ध फुटबल खेलाडी सुल्तान अहमद शाहको सन् २०१९ को मे २२ मा ८८ बर्षको उमेरमा निधन भयो। पाहाङ राज्यका पाँचौ राजा सुल्तान सन् १९७९ देखि १९८४ सम्म पाँच वर्ष सातौँ केन्द्रीय राजा बनेका थिए। सन् १९३० मा जन्मिएका उनी सन् १९७४ मा पाहाङ राज्यको राजा बनेका थिए।
५. नाट्य क्षेत्रले गुमायो लोकप्रिय नाट्यकर्मी
भारतीय नाट्यकर्मीमध्ये सम्भवतः सबैभन्दा लोकप्रिय गिरिश कर्नाडको ८१ वर्षको उमेरमा जुन १० मा निधन भयो। भारतको सबैभन्दा उच्च साहित्यिक पुरस्कार जनपीठलगायतका सम्मान पाएका कर्नाडले भारतीय समाज र समय प्रतिबिम्बितमा आधारित थुप्रै नाटक लेख्नुका साथै मौलिक छाप पार्ने अभिनय गरेका छन्। हालको कर्नाटक राज्यमा जन्मिएका कर्नाडले बेलायतको अक्सफोर्ड विश्वविद्यालयमा गणित विषयको उच्च शिक्षामा छात्रवृत्तिमा अध्ययन गरेका थिए। अक्सफोर्ड विद्यार्थी युनियनका अध्यक्षसमेत रहेका उनी भारत फर्केर कलाकर्ममा लागेका थिए।
६. अदालतमा बयानकै क्रममा मृत्यु
इजिप्टका पूर्व राष्ट्रपति मोहम्मद मोर्सीको जुन १७ मा निधन भयो। आफूविरुद्धको जासुसीको अभियोगसम्बन्धी मुद्दाको सुनुवाइका लागि कायरोस्थित अदालतमा बयान दिइरहेका बेला उनको निधन भएको हो। मुस्लिम ब्रदरहुडका ६७ वर्षीय नेता मोर्सीलाई सन् २०१२ मा निर्वाचित भएको एक वर्षमै इजिप्टको सेनाले अपदस्थ गरी जेल हालेको थियो।
७. स्टेजमा प्रस्तुतिकै क्रममा अस्ताए हाँस्य कलाकार
‘स्ट्याण्डअप कमेडी’ का लागि चर्चित मञ्जूनाथ नायडुको जुलाई २१ मा प्रस्तुति दिने क्रममा दुबईमा स्टेजमै निधन भयो। प्रस्तुति दिँदै गर्दा अचानक ढलेका बेला दर्शकले त्यसलाई प्रस्तुतिकै लागि ढलेको ठानेका थिए। आफ्नो परिवार र डिप्रेसनका बारेमा बताउँदै ठट्टा गरिरहेका बेला उनी ढलेका थिए। स्टेजमा गएको एक मिनेटमै उनी ढलेका थिए। आबुधाबीमा जन्मेका मञ्जुनाथका बाबुआमाको भने उनी सानै छँदा निधन भएको थियो। उनको यस्तो अनौठो निधनले विश्वभरि नै चर्चा पाएको थियो।
८. चिनियाँ पूर्व प्रधानमन्त्री पेङको निधन
चीनका पूर्वप्रधानमन्त्री ली पेङको ९० वर्षको उमेरमा जुलाई २२ मा निधन भयो। चीनका अन्य शीर्ष पदमा रहेर सन् १९८० र १९९० को दशकमा उनले काम गरेका थिए। पेङ सन् १९८९ मा नेपाल भ्रमणमा आएका थिए। सन् १९८९ मा बेइजिङमा प्रजातन्त्र पक्षधरमाथि भएको दमनमा मुख्य भूमिका खेलेको पात्रको रुपमा उनी बढी चर्चित थिए।
९. चर्चित साहित्यकार मोरिसनको मृत्यु
विश्व चर्चित साहित्यकार तथा साहित्य विधामा नोबेल पुरस्कार विजेता टोनी मोरिसनको पनि यसैवर्ष अगस्ट ५ मा निधन भयो। ८८ वर्षमा निधन भएकी मोरिसनलाई अमेरिकामा अल्पसंख्यक समुदाय, अफ्रिकी अमेरिकीको पक्षमा बोल्ने र लेख्ने सशक्त व्यक्ति मानिन्छ। मोरिसन नोबेल पुरस्कार जित्ने पहिलो अफ्रिकी–अमेरिकी महिला पनि थिइन्। उनले ११ वटा उपन्यास तथा बालबालिकाका निम्ति धेरै किताब र निबन्ध लेखेकी छन्। उनका उपन्यासहरू ‘द न्यूयोर्क टाइम्स’ अखबारको सबभन्दा धेरै बिक्ने सूचीमा धेरै पटक परेका छन्। उनले सन् २०१२ मा तत्कालीन अमेरिकी राष्ट्रपति बाराक ओबामाको हातबाट ‘प्रेजिडेन्सियल मेडल अफ फ्रिडम’ पाएकी थिइन्।
१०. स्वराजलाई गुमाउँदा दक्षिण एसिया शोकाकुल
भारतकी पूर्व विदेशमन्त्री एवं सत्तारुढ भारतीय जनता पार्टीकी वरिष्ठ नेतृ सुषमा स्वराजको अगस्त ६ मा निधन भयो। स्वराजलाई भारतमा प्रभावशाली र सशक्त नेतृका रुपमा स्मरण गरिन्छ । सन् २०१६ मा मिर्गौला प्रत्यारोपण गरेकी स्वराजले स्वास्थ्य समस्याकै कारण गत लोक सभा चुनावमा उम्मेदवारी दिएकी थिइनन्। उनी सन् २०१४ को २६ मे देखि पाँच वर्ष भारतको विदेश मन्त्री भएकी थिइन्।
११. भारतीय नेता अरुण जेटलीको निधन
लामो समयदेखि बिरामी परेका भारतका पूर्व अर्थमन्त्री तथा भारतीय जनता पार्टीका नेता अरुण जेटलीको पनि २०१९ मै निधन भयो। दिल्लीस्थित एम्स अस्पतामा भर्ना गरिएका जेट्लीको अगस्ट २४ मा निधन भयो। प्रधानमन्त्री नरेन्द्र मोदीका विश्वासपात्र ६६ वर्षीय जेटली सत्तारूढ भारतीय जनता पार्टीका वरिष्ठ नेता थिए। उनले भारत स्वतन्त्र भएपछि पहिलो पटक ल्याइएको वस्तु तथा सेवा कर लागू गर्न महत्वपूर्ण भूमिका खेलेका थिए। जेटली अर्थमन्त्री भएकै बेला प्रधानमन्त्री मोदीले ५०० र १,००० दरका भारतीय रुपैयाँका नोट वित्तीय प्रणालीबाट हटाउने निर्णय गरेका थिए।
१२. ३७ वर्ष शासन गरेका मुगाबेको विदेशमा मृत्यु
जिम्बाब्वेका पूर्व राष्ट्रपति रोबर्ट मुगाबेको ९५ वर्षको उमेरमा सेप्टेम्बर ६ मा विदेशमा निधन भयो। उनले जिम्बाब्वे स्वतन्त्र भएपछि देशको प्रथम प्रधानमन्त्री हुदै राष्ट्रपति भएर ३७ बर्ष एकछत्र शासन गरेका थिए। उनलाई सन् २०१७ को नोभेम्बरमा सेनाले अपदस्थ गरेर नजरबन्दमा राखेको थियो। नजरबन्दमै रहेका बेला विरामी भएपछि सिङ्गापुरमा उपचारका क्रममा उनको निधन भएको हो। उनका उत्तराधिकारी एमरसन मनाङ्गाग्वाले उनलाई ‘जिम्बाव्वे स्थापना गर्ने पिता’ तथा ‘मुक्तिका प्रतीक’ को सङ्ज्ञा दिएका थिए।
१३. जापानका सुधारवादी पूर्वप्रधानमन्त्रीको बिदाइ
जापानका लोकप्रिय नेताको छवि बनाएका पूर्व प्रधानमन्त्री यासुहिरो नाकासोनेको १०१ वर्षको उमेरमा नोभेम्बर २९ मा निधन भयो। सन् १९८२ देखि १९८७ सम्म पाँच वर्ष जापानको प्रधानमन्त्री रहेका नाकासोनेले रुस र अमेरिकाबीचको शीतयुद्धकालीन समयमा जापानलाई पश्चिमा राष्ट्रसँगको गठबन्धनमा उभ्याएको र आर्थिक तथा सामरिक रुपमा बलियो राष्ट्र बनाएकोमा उनको उच्च प्रशंसा गर्ने गरिन्छ ।
यसबाहेक विश्वका अरु पनि केही चर्चित व्यक्तित्वलाई विश्वले सन् २०१९ मा गुमाएको छ। अर्जेन्टिनाका पूर्व राष्ट्रपति फर्नान्डो डे ला, हलिउड स्टार जेन माइकल भिनसेन्टलगायतको पनि यसै वर्ष निधन भएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
