जनकपुर– प्रदेश २ का मुख्यमन्त्री लालबाबु राउतले नेपाल र भारतको सम्बन्ध विशेष भएको बताएका छन्।
भारतीय पर्यटन राज्यमन्त्री प्रह्लादसिंह पटेललाई बिहीबार जनकपुरमा स्वागत गर्दै मुख्यमन्त्री राउतले विश्वमा कुनै दुई देशबीच नरहेको सम्बन्ध नेपाल र भारतबीच रहेको बताए।
उनले भारतीय पर्यटन राज्यमन्त्रीको आगमनले प्रदेश २ को पर्यटनमा टेवा पुग्ने विश्वाससमेत व्यक्त गरे।
भारतीय प्रधानमन्त्री नरेन्द्र मोदी र उत्तरप्रदेशका मुख्यमन्त्री योगी आदित्यनाथको जनकपुरधाम आगमनले पर्यटक संख्यामा वृद्धि भएको उनको भनाइ थियो।
जनकपुरको सीताशरण होटेलमा भएको भेटवार्तामा राउतले भारतीय पर्यटन राज्यमन्त्री पटेललाई जानकी मन्दिरको तस्वीर र दोसल्ला ओढाएर स्वागत गरे।
पटेल जनकपुर विमानस्थलबाट सोभैm जानकी मन्दिर पुगेर दर्शन पुजा गरेका थिए।
मोदीले घोषणा गरेको एक अर्ब रुपैयाँ सहयोगका लागि लिखित प्रस्ताव पठाउन आग्रह
भारतीय राज्यमन्त्री पटेलले मोदीले विवाह पञ्चमी महोत्सवका बेला जनकपुरधाम आउँदा घोषणा गरेको एक अर्ब रुपैयाँ सहयोगका लागि भारतलाई लिखित प्रस्ताव पठाउन नेपाल सरकारलाई आग्रह गरेका छन् । यसबारे आफूले पर्यटनमन्त्री योगेश भट्टराईसँगसमेत कुरा गरेको भन्दै उनले नेपाल सरकारले जति छिटो प्रस्ताव पठाउन सक्छ त्यति नै छिटो काम अघि बढ्ने आश्वासन दिए।
उनले नेपाल र भारतको रामायणकालीन धार्मिक र साँस्कृतिक सम्बन्ध रहेको जिकिर गरे।
मन्त्री पटेलले भारतले नेपालको विकास हेर्न चाहेको भन्दै पर्यटन क्षेत्रको विकासमा सहयोग गर्नेसमेत प्रतिबद्धता जनाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
