एजेन्सी – भारतमा नागरिकता कानुन संशोधनको विरोधमा उत्रिएकामध्ये ५६ प्रदर्शनकारीलाई वाराणासी सेशन कोर्टले धरौटीमा रिहा गर्ने आदेश गरेको छ।
नागरिकता संशोधन कानुन(सीएए)को विरुद्धमा प्रदर्शन गरेको भन्दै पक्राउ परेका उनीहरु बुधबार अदालतबाट धरौटीमा छुटेका हुन्। बाँकी तीन व्यक्तिको निवेदनमा भने छुट्टै सुनुवाइ गर्ने तयारी अदालतले गरेको छ। यसरी छुट्नेमा १४ महिने बच्चाकी आमा-बुबा पनि परेका छन्। सरकारले ७३ जना प्रदर्शनकारीलाई पक्राउ गरेको थियो।
यसरी पक्राउ पर्नेमा सामाजिक कार्यकर्तासँगै वामदलका नेता र छात्रहरु थिए। वाराणसीमा भएको विरोध प्रदर्शनमा पक्राउ परेका उनीहरु पहिलो पटकका लागि जमानतमा छुटेका हुन्।
सीएएको विरोधमा १९ डिसेम्बरमा बेनियाँ क्षेत्रबाट निकालिएको र्यालीमा सहभागी भएका ५९ प्रदर्शनकारीलाई पक्राउ गरिएको थियो। सोही दिन १७ जना अन्य प्रदर्शनकारीलाई दशाश्वमेध घाट क्षेत्रबाट पक्राउ गरिएको थियो।
.png)
उनीहरुविरुद्ध गम्भीर अपराधमा संलग्न भएको दाबी गर्दै प्रहरीले तल्लो अदालतमा पेश गरेपछि उनीहरुको धरौटी माग अस्वीकार भएको थियो। यसरी पक्राउ पर्नेमा वातावरणको क्षेत्रमा काम गर्दै आएका सामाजिक कार्यकताहरुसमेत रहेका थिए।
नागरिकता कानुन संवैधानिक व्यवस्थाविपरीत भएकाले खारेज हुनुपर्ने जिकीर गर्दै आन्दोलनमा उत्रेका दम्पती १२ दिनसम्म जेलमा बसेका थिए। उनीहरुको बच्चा चम्पकले जेलमा रहँदा खान-पिउन बन्द गरेपछि उनीहरु तनावमा थिए। आफ्नो सन्तानको प्राण संकटमा परेपछि उनीहरुले रिहाइका लागि प्रधानमन्त्री नरेन्द्र मोदीलाई चिट्ठी लेखेका थिए। बच्चाको जीवन रक्षाका लागि पहल गरिदिन उनीहरुले जेलबाटै पत्र लेखेका थिए।
शान्तिपूर्ण प्रदर्शनमा पक्राउ परेका व्यक्तिलाई धारा १४४ उल्लंघनको आरोपमा १२ दिनसम्म थुनामा राख्नु गलत भएको तर्क पेश गरिएको थियो। अदालतमा बच्चाको स्वास्थ्य अवस्थाका बारेमा पनि प्रश्न उठाइएको थियो। लोकतन्त्रमा शान्तिपूर्ण विरोध गर्न पाउनु जनताको अधिकार भएकाले यसलाई अपराध मानेर थुनामा राख्नु गलत भएको जिकीर कानुन व्यवसायीले गरेका थिए।
.png)
अदातलले ५६ जना प्रर्दशनकारीलाई २५-२५ हजार धरौटी माग गर्ने आदेश गरेको थियो। अदालतलको आदेश ढिला आउँदा उनीहरु बिहीबारमात्रै रिहा हुन पाएका छन्।
सामाजिक कार्यकर्ता रहेकी एकता र उनका पतिको १४ महिने बच्चासहित बिहीबार मिलन भएको छ। ‘मेरी छोरी चम्पक मेरो दूधमा निर्भर थिइन्। म धेरै तनावमा थिएँ‚’ उनले भावुक हुँदै भनिन्‚ ‘यी १२ दिन म निकै मुस्किलमा थिएँ।’
सात मिनेट‚ जसले उनलाई थप एक दिन थुनामै राख्यो
अदालतको आदेश सात मिनेट ढिलो हुँदा उनी थप एक दिन हिरासतमै बिताउन बाध्य भइन्। बुधबार उनीहरुको सुनुवाइ समाप्त भएको थियो र अदालतले आदेश जारी गरेको थियो। उक्त आदेश लिएर जाँदा वाराणसी सेन्ट्रल जेलका अधिकारीले अदालतद्वारा जारी धरौटी आदेश सात मिनेट ढिलो भएको भनी फर्काएका थिए।
एकताका एक नातेदारले बच्चाको स्वास्थ्य अवस्था नाजुक भएकाले आमालाई रिहा गरिदिन आग्रह गरेका थिए। तर उनीहरुले बिहीबार पुनः आउनु भनी फर्काएका थिए।
चम्पकका काका शशिकान्त तिवारीले भने‚ ‘मैले जेल अधिक्षकसँग धेरै बिन्ती गरेँ। १४ महिनाकी बच्ची‚ जसले दुई साता आमाबिना बिताइन् उनको ख्याल गरिदिनुस्।’ उनले आफ्नो कुरामा विश्वास नगरी पत्र बुझ्ने समय सकिएको मात्र जानकारी गराएर फर्काएको बताए।
.JPG)
‘दिउँसो ३ बजेमात्र हामीले धरौटी आदेश पाएका थियौ’ शशिकान्तले भने‚ ‘लगत्तै हामी जेल पुगेका थियौ लगभग पाँच बजे पुगेका थियौं।’ केही समय बाँकी हुँदै आफूहरु पुगेको उनले बताए पनि जेल अधिक्षकले स्वीकार नगरेको उनको भनाइ छ।
‘तपाई सात मिनेट ढिला हुनुभएको छ‚’ उनले जेल अधिक्षकको भनाइ सुनाए‚ ‘अदालतको रिहाइ आदेश आजका लागि काम लाग्दैन त्यसैले आज छोड्दैनौ।’
शशिकान्तले यस्तो समयमा विवेक देखाउनु पर्ने भन्दै केही उदाहारण उनले सुनाए पनि अधिक्षक तयार नभएको बताए। जेल अधिक्षक पीके त्रिवेदीले भने आफूहरुले कसैलाई पनि रातमा रिहा गर्न नसक्ने भएकाले फिर्ता पठाइएको र बिहीबार रिहा गरिएको बताए। नियमअनुसार कैदीहरुलाई अँध्यारो सुरु भएपछि रिहा गर्ने अधिकार जेल अधिकारीलाई नभएको उनले दाबी गरे।
उनीहरूको संवाद चलिरहँदा सूर्यास्त भएकाे थिएन। वाराणासीमा ५:२० मामात्र सूर्यास्त भएको उनले बताए। रोचक त यो थियो कि रिहाइ आदेश भएको कुरा जेलका अधिकारीहरुलाई उनीहरु पुग्नुभन्दा धेरै घन्टा पहिले थाहा थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791799330.png)
-1791796975.png)
-1786602170.png)
