दुई पटक संविधानसभाको सदस्य भई संविधान लेखन र कानुन निर्माणमा सक्रिय युवा नेता रविन्द्र अधिकारी संस्कृति, पर्यटन तथा नागरिक उड्डयन मन्त्री बनेका छन्। संसदको विकास समितिमा सभापति रहँदा राष्ट्रिय गौरवका आयोजनाहरुमा नियमित अनुगमन गर्दै अधिकारीले विकासको सम्भावना बढाउन अनुगमन जरुरी हुन्छ भन्ने देखाएका थिए।
विकासप्रेमी नेताको परिचय बनाएका अधिकारीले मन्त्री भएर अबको समयमा गर्ने कामबारे आम जनताले चासोपूर्वक हेरेका छन्। देश विकासमा महत्वपूर्ण भनेर बताइँदै आएको पर्यटन क्षेत्रलाई योगदान दिने अवस्थामा पुर्याउन मन्त्री अधिकारीसामु विविध चुनौती छन्। त्रिभुवन विमानस्थलको सुधार, देशका अन्य स्थानमा अन्तर्राष्ट्रिय र राष्ट्रिय विमानस्थलको निर्माणका साथै राष्ट्रिय ध्वजावाहक वायुसेवा निगमको अवस्थालाई सुधार गर्नु उनका मुख्य चुनौती देखिन्छन्।
यिनै विषयमा नेपाल लाइभका दुर्गा दुलाल र हिम विक्रम केसीले मन्त्री अधिकारीसँग गरेको कुराकानी:
विकास समितिमा बसेर देशको पूर्वाधार तथा विकास-निर्माणमा देखिएका समस्या समाधानमा पहल गर्नुभयो। संस्कृति, पर्यटन तथा नागरिक उड्डयन मन्त्रालयको जिम्मेवारी सम्हालेसँगै तपाईंले देखेका चुनौती के हुन्?
म अहिले सूचना संकलन गरिरहेको छु। मुख्य चुनौती हाम्रा संस्थाहरुले पर्यटन विकासका लागि कति योगदान गर्ने बनाउने भन्ने हो। कामचलाउ रुपमा विकासका काम भइरहेका छन्। यस्तो अवस्थाले पर्यटन क्षेत्रको प्रगति हुँदैन। त्यसैले अहिलेको परम्परागत तरिका बदलेर नयाँ तरिकाबाट अगाडि लैजान चाहन्छौं। अहिले जुन गतिहीनता र सुस्तता छ, त्यसलाई बदल्छौं।
पर्यटन र नागरिक उडड्यन क्षेत्रको विकासका लागि तपाईंले निर्धारण गरेका प्राथमिकता के-कस्ता छन्?
पर्यटन क्षेत्रलाई हामी राष्ट्रिय विकासका लागि योगदान गर्ने क्षेत्रको रुपमा विकास गर्न चाहन्छौं। देशको कुल ग्रार्हस्थ उत्पादन (जिडिपी) मा २५ प्रतिशत हिस्सा पुर्याउन सक्दा मात्र पर्यटन क्षेत्रको योगदान गनिन्छ। हामीले अहिले देश विकासमा कृषि, पर्यटन र ऊर्जाको योगदान भनेर गफ मात्र दिइरहेका छौं। पर्यटनको योगदान बलियो नभए हामीले पर्यटन हाम्रो हो भने पनि त्यसको केही अर्थ हुँदैन। धेरैभन्दा धेरै पर्यटक ल्याउने लक्ष्य पूरा गर्न पर्यटन क्षेत्रमा निजी क्षेत्रलाई सँगसँगै अगाडि बढाउने, आवश्यक पूर्वाधार निर्माण गर्ने र पर्यटन सम्बद्ध उद्यमीहरु विकास गर्न हाम्रो ध्यान जानेछ।
अहिले भएको संरचनामा त्रिभुवन विमानस्थलको व्यवस्थित सञ्चालनका लागि पोखरा, भैरहवा लगायतका विमानस्थल निर्माणको कुरा टुंगो लगाउनेछौं। विराटनगर र नेपालगञ्ज लगायत विमानस्थलको विस्तार गरेर ठूला जहाजहरु चल्न मिल्ने हिसाबले लैजादैछौं। राष्ट्रिय ध्वजावाहक नेपाल वायुसेवा निगमलाई प्रतिस्पर्धी बनाएर लैजाने मेरो संकल्प हो। निगमले अहिलेकै मोडलमा काम गर्न सक्छ कि नयाँ मोडलमा लैजाने भन्नेमा पुनरावलोकन गरेर आवश्यक परेमा नेपाल टेलिकमको मोडेलमा लैजान्छौं। अर्थात् सरकारी र निजी साझेदारी मोडलमा लैजानेछौं।
पर्यटन क्षेत्रको सुधारका लागि तपाईंका भावी योजना के-के छन्?
अहिले कुनै ठोस योजना बनाएको छैन। केही समयमा विस्तृत योजना सार्वजनिक हुन्छ। मेरो अहिलेको एकमात्र सोच भनेको आफ्नो मन्त्रालय मातहत रहने कार्यालयहरुलाई समान व्यवहार गर्दै काम गर्ने वातावरण बनाइदिने हो। सुरुमा म त्यसको कार्ययोजना बनाइरहेको छु।
मन्त्रालयको भूमिका संरक्षक र अभिभावकको हो भन्ने कुरा मातहतका कार्यालयलाई महसुस गराउन जरुरी देखेको छु। सबै निकायलाई काम गर्ने वातावरण बनाइदिएर परिणाम निकाल्न सहयोग गर्नु मेरो पहिलो चरणको दायित्व हो। काम गर्ने वातावरण दिने हो भने उनीहरुको क्षमता र त्यहाँभित्रको कमजोरी थाहा पाउन सकिन्छ।
नेपाल वायुसेवा निगमको सुधारका लागि तपाईंले के गर्ने सोच राख्नुभएको छ?
नेपाल वायुसेवाको नाम र बदनाम दुवै छ। यसलाई अब स्तरोन्नति गर्नुको विकल्प छैन। यसमा मेरो सोच- तीन वटा जहाज चलाउन १८ सय मानिस चाहिने अवस्थाको अन्त्य गर्छु।
राष्ट्रिय ध्वजावाहक वायुसेवा निगम समस्याग्रस्त अवस्थाबाट गुज्रिरहेको छ। निगमलाई आजको हालतमा पुर्या उने कर्मचारी र पदाधिकारीमाथि कारबाही हुन्छ त?
सबै कुरा हुन्छ। अहिले म अध्ययनकै चरणमा भएकाले तपाईंहरुले दुई महिनापछि आएर सोध्नुभयो भने सबै जवाफ पाउनुहुनेछ। नेपालको वायुसेवामा एक प्रकारको सिन्डिकेट जस्तो देखिएको छ। त्यसलाई अन्त्य गर्दै प्रतिस्पर्धी र त्यसमा पनि स्वस्थ वायुसेवा बनाउने मेरो लक्ष्य हो। सरकारी वायुसेवा निगममा विविध समस्यादेखि एकमात्र अन्तर्राष्ट्रिय विमानस्थलमा चरम विकृति छ। मेरो कार्यकालमा विकृतिरहित विमानस्थल बन्नेछ।
पर्यटन नेपालको रोजगारी र विकासको मुख्य क्षेत्र हो भन्ने कुरामा भाषण मात्र सुनिन्छ। यसमा तपाईंको धारणा के छ?
नेपालको विकासको एकमात्र सम्भावना भएको क्षेत्र पर्यटन नै हो, यसमा विवाद छैन। तर, हामीले हालसम्म कुरा गरे अनुसार काम गर्न सकेका छैनौं। अबको मेरो उद्देश्य कुरा होइन, काम गर्ने हो। खासगरी राष्ट्रिय अर्थतन्त्रमा २५ प्रतिशत हिस्सा पुर्याउन सक्दा मात्र पर्यटन क्षेत्रले योगदान गरेको मानिन्छ। तर, हाम्रोमा त्यो अवधारणा स्थापित हुन सकेको छैन। हामीसँग पर्यटकीय आकर्षणका धेरै ठाउँ छन्, जसको प्रचारप्रसार हुन सकेको छैन। हामी पर्यटन हाम्रो अबको विकास गर्ने र रोजगारी दिने क्षेत्र हो भन्छौं, तर त्यस अनुरुपका काम हुन सकेका छैनन्। यो अवस्था अब अन्त्य हुन्छ। पर्यटन मन्त्रालय अन्तर्गतका विद्यमान संरचनालाई व्यवस्थित गर्ने र नियम-कानुन अन्तर्गत सञ्चालन गर्ने मेरो सोच हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
