जनकपुर- प्रदेश २ का मुख्यमन्त्री लालबाबु राउतले प्रदेशमा चाँडै प्राविधिक विश्वविद्यालय स्थापना हुन लागेको बताएका छन्।
नेपाल तराई इन्जिनियर्स एशोसिएशनले जनकपुरधाममा शनिबार आयोजना गरेको ‘प्रदेश २ मा इन्जिनियरिङ कलेजको आवश्यकता’ विषयक कार्यशाला गोष्ठीलाई सम्बोधन गर्दै मुख्यमन्त्री राउतले प्राविधिक विश्वविद्यालय बनाउने उद्घोष गरे ।
मुख्यमन्त्री राउतले प्राविधिक विश्वविद्यालय स्थापनाको गृहकार्य अन्तिम चरणमा रहेको र सदनमा यसै महिना विधेयक प्रस्तुत हुने जानकारी दिए।
केन्द्रको असहयोगका कारण प्रदेश २ को शैक्षिक हैसियतमा ह्रास आएको उल्लेख गर्दै उनले पूरानो गरिमा पुनः स्थापित गर्न सबै पक्षलाई सहयोग गर्न आग्रह समेत गरे।
मुख्यमन्त्री राउतले प्रदेशलाई प्राविधिक शिक्षाको हब बनाउने प्रदेश सरकारको घोषणाअनुरुप प्राविधिक शिक्षा विधेयक सदनमा छलफलमा लगिने बताउँदै विधेयक पारित भएलगत्तै ‘एक पालिका एक प्राविधिक विद्यालय’ स्थापनाको अभियान पनि सुरु हुने प्रतिबद्धता जनाए।
शिक्षा नै विकासको पहिलो खुड्किलो रहेको बताउँदै उनले प्रदेश सरकारले शिक्षामा पनि प्राविधिक शिक्षालाई प्राथमिकतामा राखेको स्पष्ट पारे।
एशोसिएशनका अध्यक्ष डा अजय झाको अध्यक्षतामा भएको उक्त गोष्ठीमा भौतिक पूर्वाधार मन्त्री जितेन्द्र सोनल, आन्तरिक मामिला तथा कानुनमन्त्री ज्ञानेन्द्रकुमार यादव, मुख्य न्यायाधिवक्ता दिपेन्द्र झा, नीति आयोगका उपाध्यक्ष डा भोगेन्द्र झा, इन्जिनियर सत्यनारायण साहलगायतका वक्ताहरुले इन्जिनियरिङ कलेजको आवश्यकता र औचित्यबारे आआफ्नो धारणा राखेका थिए ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।