इटहरी- अहिले सुनसरीको इटहरीमा दोस्रो राष्ट्रिय उद्यमशील महिला मेलामा चलिरहेको छ, जहाँ पश्चिम जुम्लादेखि पूर्वको इलामसम्मका उत्पादन बिक्रीका लागि राखिएको छ। त्यही लहरमा छिन् जुम्लाकी गंगादेवी राउत। उनले मार्सी चामल, तिते फापरको पिठो, सिमीको दाल, जौको सातुदेखि स्याउका प्याकेट लहरै मिलाएर राखेकी छिन् ।
संखुवासभाका नरेन्द्र राईले घरेलु उद्योगबाटै उत्पादित कपडा लिएर आएका छन्। तेह्रथुम ढाका उद्योगका कमल राईले ढाकाका कपडाको स्टल राखेका छन्। काठमाडौंकी बिष्णुकुमारी पौडेलले हातबाट बनेका सजावटका सामग्री ल्याएर सजाएकी छिन् । त्यस्तै झापाकी सम्झना ढाका उद्योगकी सञ्चालिका तिला लिम्बु पनि त्यहीँ छिन्।
यस्तै १ सय वटा पसलका स्टल मेलामा छन्। तर सबैको समान समस्या छ । मंसीर २८ गते उद्घाटन भएदेखि नै व्यापार नभएकाले उनीहरु चिन्तित छन्। ५ दिन बितिसक्दा समेत आफूहरुले खासै कारोबार गर्न नसकेको उनीहरु बताउँछन् । ग्राहकको उपस्थिति नै न्युन भएकाले कारोबार हुन नसकेको उनीहरुको भनाइ छ । ग्राहक आउने समयमा प्रवेश शुल्क लिने र बजारमा ग्राहकका लागि सूचना पु¥याउन नसकेका कारण व्यापार हुन नसकेको उनीहरुको बुझाइ छ।
इटहरीमा ठूलै व्यापार हुन्छ भन्ने सुनेर आएकी जुम्लाकी गंगादेवी चाँडै मेला समाप्त भए हुन्थ्यो भन्ने सोचमा छिन् । अहिलेसम्म आउने जाने खर्च बराबरको पनि व्यापार नभएको उनी सुनाउँछिन् । राधाकृष्ण सप्लायर्सका प्रोपाइटर नगेन्द्र फुयालको पनि अवस्था उस्तै छ। ग्राहकको चहलपहल नभएपछि व्यापार शुन्य भएको उनी बताउँछन् । साँझमा मान्छे आउने बेला सांस्कृतिक कार्यक्रमका लागि भनेर प्रवेश शुल्क उठाउँदा आएका मानिस पनि फर्कने गरेको उनको बुझाइ छ।
नेपाल उद्यमशील महिला संघद्वारा आयोजित मेला पुस ६ गतेसम्म चल्ने जनाइएको छ । तर उता व्यापारीहरु भने आजभोलि नै बन्द भइदिए हुने बताउँछन् । मेलामा नेपाल सरकार व्यापार तथा निकासी प्रवद्र्धन केन्द्र र प्रदेश १ उद्योग, पर्यटन, वन तथा वातावरण मन्त्रालय मेलाको सहआयोजक छन्। नेपाल सरकारको ७ लाख ५० हजार र प्रदेश सरकारको सोही बराबरको सहयोगमा मेला आयोजना गरिएको हो । त्यसका अलावा स्थानीय व्यापारीबाट पनि आर्थिक संकलन गरिएको छ।
सरकारको लगानीमा आयोजित मेलामा सयवटा स्टलबाट प्रति स्टल ५ हजारका दरले रकम उठाइएको छ । जसबाट ५ लाख रुपैयाँभन्दा बढी आम्दानी भएको छ । तर आयोजकले न्युनतम खानेपानी र ट्वाइलेटको समेत राम्रो व्यवस्थापन गर्न सकेका छैनन् । यसले गर्दा व्यापारी निराश छन् ।
संघको केन्द्रीय कार्यसमितिले आयोजना गरेको कार्यक्रमको व्यवस्थापन पक्ष फितलो देखिँदा सरकारको लगानी डुबेको छ । टाढाबाट आएका उद्यमी मेलाप्रति रुष्ट देखिएका छन्।
सरकारी तथा निजी उद्यमीको लगानी समस्यामा परे पनि आयोजक संस्था भने मालामाल देखिएका छन्। १ सय रुपैयाँ प्रवेश शुल्क र पार्र्किङ शुल्क बाट पनि अतिरिक्त आम्दानी भइरहेको छ । उता संघकी महासचिव राधा कार्कीले महिला उद्यमीलाई प्रोत्साहन दिने उद्येश्यले कार्यक्रम आयोजना गरिएको बताईन् । यसअघि काठमाडौंको भृकुटीमण्डपमा आयोजित मेला दोस्रो पटक इटहरीमा लागेको हो । नेपाली कला र उत्पादन विदेश निर्यात गर्ने उद्येश्यले मेला आयोजना गरिएको उनको भनाइ छ ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।